(ភ្នំពេញ)៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា ការធ្វើការងារជាន់គ្នារបស់ស្ថាប័នអន្តរក្រសួង បានបង្កការលំបាកដល់អ្នករកស៊ី និងរារាំងការវិនិយោគ ហេតុនេះហើយវិស័យឯកជនតែងតែ ស្នើសុំឲ្យមានប្រតិភូកម្មអំណាច និងការបង្កើតច្រកចេញចូលតែមួយ សម្រាប់ការស្នើសុំច្បាប់អាជីវកម្ម និងការវិនិយោគ ដើម្បីជៀសវាងការរត់ទៅក្រសួងច្រើន។

លោកបន្ថែមថាវិស័យឯកជន ជាពិសេសសភាពាណិជ្ជកម្មកម្ពុជា បានលើកឡើងជាបន្តបន្ទាប់អំពីសារៈសំខាន់នៃការអនុវត្តប្រព័ន្ធច្រកចេញចូលតែមួយ សម្រាប់ការស្នើសុំច្បាប់អាជីវកម្ម និងការអនុម័តគម្រោងវិនិយោគ។ បញ្ហាប្រឈមចម្បងដែលធុរជនជួបប្រទះ គឺការរត់ការឯកសារទៅកាន់ក្រសួង ឬស្ថាប័នច្រើន ដែលបង្កឱ្យមានការពន្យារពេល និងការចំណាយពេលវេលាច្រើន។ ដូច្នេះ ការបង្កើតច្រកចេញចូលតែមួយ គឺជាដំណោះស្រាយដ៏មានប្រសិទ្ធភាពមួយ ដើម្បីកាត់បន្ថយបន្ទុកទាំងនេះ។

ជាមួយគ្នានេះ លោកបានអំពាវនាវឲ្យមន្ត្រី និងស្ថាប័នដឹកនាំគិតពីផលប្រយោជន៍ជាតិជាធំ ជំនួសឲ្យផលប្រយោជន៍អំណាចក្រសួងខ្លួនឯង។

អ្នកឧកញ៉ា លឹម ហេង គូសបញ្ជាក់បែបនេះធ្វើឡើងក្នុងកម្មវិធី FRESH BUSINESS​ កិច្ចពិភាក្សាលើប្រធានបទ៖ «ការអនុវត្តច្បាប់ធុរកិច្ចរវាងមន្ត្រី និងធុរជន»។

សូមស្តាប់ការលើកឡើងរបស់​អ្នកឧកញ៉ា លឹម ហេង៖