(ភ្នំពេញ)៖ រាជរដ្ឋាភិបាលកម្ពុជា បានធ្វើការវាយតម្លៃ​ការគ្រប់គ្រងថវិការបស់រដ្ឋបាលថ្នាក់ជាតិ ក្នុងរយៈពេល ៥ខែដើមឆ្នាំ ២០២៦ មានទិសដៅវិជ្ជមាន និងមានស្ថិរភាពជារួម ដោយឆ្លុះបញ្ចាំងពីការកែលម្អជាបន្តបន្ទាប់នៃប្រសិទ្ធភាពក្នុងការគ្រប់គ្រងហិរញ្ញវត្ថុ ការពង្រឹងវិន័យថវិកា និងសមត្ថភាពក្នុងការរក្សាសមតុល្យហិរញ្ញវត្ថុ។​

​យោងតាមរបាយការណ៍ស្ថិតិហិរញ្ញវត្ថុរដ្ឋាភិបាល ប្រចាំខែឧសភា ឆ្នាំ២០២៦នេះ បានបញ្ជាក់ថា ក្នុងរយៈពេល ៥ ខែដើមឆ្នាំ ២០២៦ ការអនុវត្តថវិការបស់រដ្ឋបាលថ្នាក់ជាតិមានអតិរេកសរុបចំនួន ៧៣៨ប៊ីលានរៀល (ប្រមាណជាង១៨៣លានដុល្លារ) ខណៈដែលរយៈពេលដូចគ្នាក្នុងឆ្នាំ២០២៥ មានឱនភាពសរុប ១ ១៤២ ប៊ីលានរៀល។ ការផ្លាស់ប្តូរពីឱនភាពទៅជាអតិរេកនេះ គឺជាសញ្ញាវិជ្ជមានយ៉ាងខ្លាំង ដែលបង្ហាញពីភាពរឹងមាំនៃសេដ្ឋកិច្ច និងការគ្រប់គ្រងហិរញ្ញវត្ថុរបស់រដ្ឋាភិបាល។

​តាមរយៈរបាយការណ៍នេះបានបញ្ជាក់យ៉ាងដូច្នេះថា «ក្រុមការងារបានសង្កេតឃើញថា អតិរេកថវិកាក្នុងរយៈពេល ៥ ខែដើមឆ្នាំ ២០២៦ ត្រូវបានបង្ហាញតាមទ្រព្យសកម្មហិរញ្ញវត្ថុដែលមានប្រមាណជា ៧៥០ប៊ីលានរៀល និងបំណុលមានប្រមាណជា ១២ប៊ីលានរៀល។ លទ្ធផលទាំងនេះបានបញ្ជាក់យ៉ាងច្បាស់ថា ការគ្រប់គ្រងថវិការបស់រដ្ឋបាលថ្នាក់ជាតិក្នុងរយៈពេល ៥ខែដើមឆ្នាំ ២០២៦ មានទិសដៅវិជ្ជមាន និងមានស្ថិរភាពជារួម។ វាឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាល ក្នុងការកែលម្អប្រសិទ្ធភាពនៃការគ្រប់គ្រងហិរញ្ញវត្ថុ ការពង្រឹងវិន័យថវិកា និងសមត្ថភាពក្នុងការរក្សាសមតុល្យហិរញ្ញវត្ថុ ប្រកបដោយចីរភាព។ ភាពជោគជ័យនេះនឹងបន្តរួមចំណែកដល់ការអភិវឌ្ឍសេដ្ឋកិច្ចជាតិ និងការលើកកម្ពស់ជីវភាពរស់នៅរបស់ប្រជាពលរដ្ឋកម្ពុជា»។

​ការអនុវត្តចំណូលរបស់រដ្ឋបាលថ្នាក់ជាតិ​ ក្នុងខែឧសភា ឆ្នាំ២០២៦​ សម្រេចបាន ២ ២៣២ ប៊ីលានរៀល ស្មើនឹង ៧.៥៣% នៃច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០២៦។ ក្នុងនោះ ចំណូលពន្ធ (Taxes revenue)មានចំនួន ១ ៧៨០ ប៊ីលានរៀល, ពន្ធលើទំនិញ និងសេវាប្រើប្រាស់ ១ ០៧៤ ប៊ីលានរៀល​, អាករពិសេស ​ ៤១៨ ប៊ីលានរៀល, អំណោយ ​១០ ប៊ីលានរៀល, និងចំណូលផ្សេងៗ ៤៤៣ ប៊ីលានរៀល ។ បើធៀបនឹងខែមុន, ការអនុវត្តចំណូលរដ្ឋបាលថ្នាក់ជាតិថយ ១៨.៦៤% ។ ក្នុងនោះចំណូលពន្ធថយ ២៩.៧០%, អំណោយថយ ៦៤.៩៧%​ ខណៈចំណូលផ្សេងៗកើន ១៤០.២៣% ។ បើធៀបនឹងខែឧសភា ឆ្នាំ២០២៥​ ការអនុវត្តចំណូលរបស់រដ្ឋបាលថ្នាក់ជាតិថយ ៨.២៩% ក្នុងនោះចំណូលពន្ធថយ ៤.២១%, អំណោយថយ ៤.៣០% និងចំណូលផ្សេងៗថយ ២១.៧៦% ។

ចំណែក​ការអនុវត្តចំណាយសរុបរបស់រដ្ឋបាលថ្នាក់ជាតិ​ ក្នុងខែឧសភា ឆ្នាំ២០២៦ អនុវត្តបាន ៩៥៧ ប៊ីលានរៀល ក្នុងនោះចំណាយ (expense) ចំនួន៧៨៨ ប៊ីលានរៀល និងចំណាយវិនិយោគលើទ្រព្យសកម្មមិនមែនហិរញ្ញវត្ថុ ​១៦៩ប៊ីលានរៀល។ បើធៀបនឹងខែមុន​ ការអនុវត្តចំណាយសរុប (expenditure) របស់រដ្ឋបាលថ្នាក់ជាតិថយ ២២.៥៥%, ក្នុងនោះ ចំណាយថយ ២០.៣៧%, និងចំណាយវិនិយោគលើទ្រព្យសកម្មមិនមែនហិរញ្ញវត្ថុ ថយ ៣៩.៣៨% ។ បើធៀបនឹងខែឧសភា ឆ្នាំ២០២៥, ការអនុវត្តចំណាយសរុប ថយ ៥៣.០៤% ក្នុងនោះ ចំណាយថយ ២៤.៥១% និងចំណាយវិនិយោគលើទ្រព្យសកម្មមិនមែនហិរញ្ញវត្ថុថយ ៨២.៩៧% ។

​ផ្អែកលើលទ្ធផលចំណូល-ចំណាយនេះ ការអនុវត្តថវិការបស់រដ្ឋបាលថ្នាក់ជាតិក្នុងខែឧសភា ឆ្នាំ២០២៦ មានអតិរេកសរុប ១ ២៧៥ ប៊ីលានរៀល ខណៈខែឧសភា ឆ្នាំ២០២៥ មានអតិរេកសរុប ៣៩៦ប៊ីលានរៀល៕