រដ្ឋមន្ត្រីក្រសួងពាណិជ្ជកម្មកម្ពុជា ចូលរួមបើកកិច្ចប្រជុំមហាសន្និបាតលើកទី៦៨ របស់អង្គការកម្មសិទ្ធិបញ្ញាពិភពលោក (WIPO) និងគូសបញ្ជាក់ពីតួនាទីកម្មសិទ្ធិបញ្ញាក្នុងការជំរុញប្រព័ន្ធនវានុវត្តន៍ និងកំណើនសេដ្ឋកិច្ចប្រកបដោយចីរភាព
07-07-2026 21:32
(ហ្សឺណែវ, ស្វ៊ីស)៖ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា នាព្រឹកថ្ងៃអង្គារ ទី៧ ខែកក្កដា ឆ្នាំ២០២៦ បានអញ្ជើញចូលរួមក្នុងពិធីបើកកិច្ចប្រជុំមហាសន្និបាតលើកទី៦៨ របស់សមាជិកអង្គការកម្មសិទ្ធិបញ្ញាពិភពលោក (WIPO) ដែលប្រារព្ធឡើងនៅទីស្នាក់ការកណ្តាលនៃអង្គការ WIPO នាទីក្រុងហ្សឺណែវ ប្រទេសស្វ៊ីស ដោយមានការចូលរួមពីរដ្ឋមន្ត្រី និងថ្នាក់ដឹកនាំជាន់ខ្ពស់មកពីបណ្តាប្រទេសជាសមាជិក WIPO ដើម្បីពិភាក្សាអំពីការពង្រឹងប្រព័ន្ធកម្មសិទ្ធិបញ្ញាអន្តរជាតិ ការលើកកម្ពស់ប្រព័ន្ធអេកូឡូស៊ីនវានុវត្តន៍ និងការពង្រីកកិច្ចសហប្រតិបត្តិការអន្តរជាតិ ក្នុងគោលបំណងជំរុញកំណើនសេដ្ឋកិច្ចប្រកបដោយចីរភាព បរិយាបន្ន និងភាពធន់។
ក្នុងឱកាសនោះ លោកស្រីរដ្ឋមន្ត្រី បានសម្តែងនូវការអបអរសាទរចំពោះការទទួលបានការបោះឆ្នោតជ្រើសតាំងរបស់ ឯកឧត្តម Carlos D. Sorreta ជាប្រធានមហាសន្និបាត WIPO លើកទី៦៨ និងការទទួលបានការបោះឆ្នោតជ្រើសតាំងសារជាថ្មីរបស់ ឯកឧត្តម Daren Tang ជាអគ្គនាយក WIPO សម្រាប់អាណត្តិទី២។
លោកស្រីរដ្ឋមន្ត្រី បានគូសបញ្ជាក់ថា ខណៈដែលនវានុវត្តន៍កំពុងជំរុញការផ្លាស់ប្តូរសេដ្ឋកិច្ចពិភពលោកយ៉ាងឆាប់រហ័ស បញ្ហាប្រឈមដ៏សំខាន់គឺការធានាឱ្យបណ្តាប្រទេសទាំងអស់អាចចូលរួមក្នុងប្រព័ន្ធនវានុវត្តន៍ពិភពលោកប្រកបដោយសមធម៌ និងទទួលបានអត្ថប្រយោជន៍ពីការអភិវឌ្ឍសេដ្ឋកិច្ចពឹងផ្អែកលើចំណេះដឹង និងភាពច្នៃប្រឌិត៕
