(ហ្សឺណែវ, ស្វ៊ីស)៖ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម នារសៀលថ្ងៃអង្គារ ទី៧ ខែកក្កដា ឆ្នាំ២០២៦ ទីក្រុងហ្សឺណែវ ប្រទេសស្វ៊ីសបានអនុញ្ញាតជូនលោកស្រី Aissatou Diallo នាយិកាប្រតិបត្តិនៃលេខាធិការដ្ឋានកម្មវិធីពង្រឹងក្របខណ្ឌ សមាហរណកម្ម (EIF) ចូលជួបសម្តែងការគួរសមនិងពិភាក្សាការងារ។

ក្នុងជំនួបនេះ ភាគីទាំងពីរបានផ្លាស់ប្តូរទស្សនៈអំពីការអនុវត្តកម្មវិធី EIF ដំណាក់កាលទី៣ ព្រមទាំងពិភាក្សាអំពីគំនិតផ្ដួចផ្ដើមផ្សេងៗ ដើម្បីគាំទ្រដល់ការអភិវឌ្ឍន៍វិស័យពាណិជ្ជកម្មរបស់ប្រទេសអភិវឌ្ឍន៍តិចតួច តាមរយៈជំនួយរបស់ EIF។

លោកស្រីរដ្ឋមន្ត្រី បានវាយតម្លៃខ្ពស់ចំពោះកម្មវិធី EIF ដែលជាដៃគូអភិវឌ្ឍន៍ដ៏សំខាន់មួយរបស់កម្ពុជាក្នុងវិស័យពាណិជ្ជកម្ម ហើយបានជម្រាបជូនថា កម្ពុជាត្រៀមខ្លួនជានិច្ចក្នុងការចូលរួមជាមួយ EIF ក្នុងសកម្មភាពកៀរគរជំនួយក៏ដូចជាចែករំលែកឧត្តមានុវតន៍ទាក់ទងនឹងការអនុវត្តកម្មវិធី EIF នៅកម្ពុជាជូនដល់ប្រទេសអភិវឌ្ឍន៍តិចតួចដទៃ ក៏ដូចជាដៃគូអភិវឌ្ឍន៍ផងដែរ។