(ភ្នំពេ​ញ)៖​ ក្នុងឆមាសទី១ ឆ្នាំ២០២៦នេះ ការធ្វើពាណិជ្ជកម្មរវាងកម្ពុជា និងដៃគូរពាណិជ្ជកម្មអន្តរជាតិសំខាន់សម្រេចបានទឹកប្រាក់ ជាង៣៦,៨៤ ពាន់ដុល្លារអាម៉េរិក កើនឡើងជាង២០% ដោយបានកើនពីចំនួនជាង៣០​ពាន់លានដុល្លារអាម៉េរិក កាលពីឆ្នាំមុន។នេះបើយោងតាមរបាយការណ៍របស់អគ្គនាយកដ្ឋានគយនិងរដ្ឋាករកម្ពុជា នៅថ្ងៃទី១០ ខែកក្កដា ឆ្នាំ២០២៦នេះ។

យោងតាមទិន្នន័យអគ្គនាយកដ្ឋានគយនិងរដ្ឋាករកម្ពុជា បាន​បង្ហាញថា ​ចាប់ពីខែមករា ​ដល់​ខែ​មិថុនា ​២០២៦ ​កម្ពុជា​នាំទំនិញ​ចេញ​ទៅ​ទីផ្សារអន្តរជាតិ​មាន​តម្លៃ​១៧ ​ពាន់លានដុល្លារ ​កើនឡើង ១៩,៥% ចំណែកឯ​ទំនិញ​នាំ​ចូល​មក​វិញ​មាន​តម្លៃជាង​ ១៩,៧៦ ​ពាន់លានដុល្លារ ​កើនឡើង​ ២១,៤%។​

ប្រទេសចិននៅតែជាដៃគូពាណិជ្ជកម្មដ៏ធំបំផុតរបស់កម្ពុជា ដោយមានទំហំពាណិជ្ជកម្មជាង ១១​ពាន់លានដុល្លារអាម៉េរិក កើនឡើង ២៥.៤%។ ក្នុងនោះ ការនាំចេញទៅចិនកើនឡើង ២៥.៧% និងការនាំចូលពីចិនកើនឡើង ២៥.៤%។ សហរដ្ឋអាម៉េរិកបន្តជាទីផ្សារនាំចេញដ៏សំខាន់សម្រាប់កម្ពុជា ដោយមានការនាំចេញក្នុងទំហំទឹកប្រាក់ជាង៧ពាន់លានដុល្លារកើនឡើង ២៩.៨%។ចំណែក​ ប្រទេសវៀតណាម ជប៉ុន និងថៃ ក៏បានបង្ហាញពីកំណើនទំហំពាណិជ្ជកម្មគួរឱ្យកត់សម្គាល់ផងដែរ។

កំណើននៃទំហំពាណិជ្ជកម្មនេះ ឆ្លុះបញ្ចាំងពីភាពធន់ និងសក្ដានុពលនៃសេដ្ឋកិច្ចកម្ពុជា ក្នុងការធ្វើសមាហរណកម្មទៅក្នុងខ្សែសង្វាក់ផ្គត់ផ្គង់សកល និងការពង្រីកទីផ្សារនាំចេញ។ ទោះបីជាមានឱនភាពពាណិជ្ជកម្មក៏ដោយ ក៏កំណើននៃការនាំចេញបង្ហាញពីការប្រកួតប្រជែងរបស់ផលិតផលកម្ពុជានៅលើទីផ្សារអន្តរជាតិ ដែលជាកត្តារួមចំណែកយ៉ាងសំខាន់ដល់កំណើនសេដ្ឋកិច្ចជាតិ។

​អ្នកឧកញ៉ា ​លឹម ហេង ​អនុប្រធានសភាពាណិជ្ជកម្មកម្ពុជា ​ធ្លាប់បានលើកឡើងថា​ បើទោះបីជា​កម្ពុជានាំចូលច្រើនមែនពិត ប៉ុន្ដែសេដ្ឋកិច្ចនៅកម្ពុជានៅតែរីកចម្រើន ដោយសារកម្ពុជានាំចូលវត្ថុធាតុដើមមកកែច្នៃនាំចេញ មិនមែននាំចូលផលិតផលសម្រេចនោះទេ។

​អ្នកឧកញ៉ា លឹម ហេង បាន​ដឹងថា «ជាង៣០ឆ្នាំមកនេះកម្ពុជា សេដ្ឋកិច្ចកម្ពុជាមានកំណើន ដោយសារតែការនាំចូលច្រើន សូមបញ្ជាក់ត្រង់ចំណុចនេះថា អ្នកខ្លះថាប្រទេសមួយមានសេដ្ឋកិច្ចរីកចម្រើន ដោយសារតែមានការនាំចេញច្រើន បើនាំចូលច្រើននឹងមានឱនភាពសេដ្ឋកិច្ច ប្រទេសជឿនលឿននាំចេញច្រើនទើបសេដ្ឋកិច្ចរីកចម្រើន ប៉ុន្ដែកម្ពុជាកំណើនសេដ្ឋកិច្ចរីកចម្រើន ដោយសារតែការនាំចូល តែកម្ពុជានាំចូលតែវត្ថុធាតុដើមច្រើនប៉ុណ្ណោះ មិនមែននាំចូលផលិតផលសម្រេចនោះទេ»៕