(ភ្នំពេញ)៖ ទំហំពាណិជ្ជកម្មសរុបរវាងកម្ពុជា និងថៃ ​សម្រេចជាង ១.៣៧ ពាន់លានដុល្លារអាមេរិក នៅក្នុងឆមាសទី១ ឆ្នាំ២០២៦ នេះ​ តែទោះបីជាយ៉ាងណា​ តួលេខនេះបានបង្ហាញពីការធ្លាក់ចុះគួរឱ្យកត់សម្គាល់ទាំងការនាំចេញ និងការនាំចូលរវាងប្រទេសទាំងពីរ បើធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមទិន្នន័យពីអគ្គនាយកដ្ឋានគយ និងរដ្ឋា​ករកម្ពុជា។

របាយការណ៍បានបង្ហាញថា ការនាំចេញរបស់កម្ពុជាទៅកាន់ប្រទេសថៃ មានតម្លៃជាង ៣៥៧ លានដុល្លារអាមេរិក ដែលជាការថយចុះ ២០.៣ ភាគរយ។ ​ចំណែកឯការនាំចូលរបស់ថៃមកកាន់កម្ពុជាវិញ ក៏បានបង្ហាញពីការធ្លាក់ចុះយ៉ាងខ្លាំងផងដែរ ដោយមានតម្លៃជាង១ ពាន់លានដុល្លារអាមេរិក ធ្លាក់ចុះរហូតដល់ ៤១ ភាគរយ។ ការធ្លាក់ចុះនៃការនាំចូលនេះ អាចឆ្លុះបញ្ចាំងពីការផ្លាស់ប្តូរទម្លាប់នៃការប្រើប្រាស់របស់ពលរដ្ឋកម្ពុជា ដែលធ្វើពហិការឈប់ប្រើប្រាស់ទំនិញថៃ ការកើនឡើងនៃផលិតផលក្នុងស្រុក ឬការស្វែងរកប្រភពផ្គត់ផ្គង់ថ្មី។

​​អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា ​បច្ចុប្បន្ននេះ ការនាំចូលភាគច្រើនពីថៃ គឺជាវត្ថុធាតុដើមសម្រាប់បម្រើដល់ផលិតកម្មរបស់រោងចក្រ សហគ្រាស និងអ្នកវិនិយោគ​នៅក្នុង​កម្ពុជា ដែលធ្លាប់នាំចូលកន្លងមក។ ក្រៅពីនេះ គឺជាប្រភេទផលិតផលប្រើប្រាស់ ​ដែលនៅតែមានតម្រូវការប្រើប្រាស់មួយចំនួនតូចប៉ុណ្ណោះ ដែលកម្ពុជាមិនទាន់អាចផលិតបាន។

​លោកបញ្ជាក់ថា ផលិតផលមួយចំនួនទៀត ត្រូវបានសិប្បកម្មក្នុងស្រុក សហគ្រាសធុនតូច និងមធ្យមរបស់កម្ពុជា បានពង្រីកខ្លួន និងពង្រឹងសមត្ថភាពក្នុងការផលិតជំនួសផលិតផលថៃបានយ៉ាងច្រើន។ មិនតែប៉ុណ្ណោះ ផលិតផលដែលខ្វះ ត្រូវបាននាំចេញពី ប្រទេសជិតខាងដូចជាវៀតណាម ក៏ដូចជាប្រទេសក្នុងតំបន់អាស៊ានដូចជាម៉ាឡេស៊ី សិង្ហបុរី និងចិនជាដើម ក៏បានបំពេញតម្រូវការទីផ្សារដែលធ្លាប់ជាចំណែករបស់ថៃផងដែរ ដែលជាហេតុធ្វើឱ្យការជួញដូររវាងកម្ពុជា-ថៃ មានការធ្លាក់ចុះ។

អ្នកឧកញ៉ា លឹម ហេង បានចាត់ទុកការណ៍នេះថាជារឿងល្អសម្រាប់ស្មារតីជាតិនិយមរបស់ខ្មែរ។ លោកបានបញ្ជាក់ថា ប្រជាពលរដ្ឋគ្រប់រូបមានសិទ្ធិក្នុងការធ្វើពហិការទំនិញថៃ ហើយនេះគឺជាសិទ្ធិផ្ទាល់ខ្លួនរបស់ពួកគេ។

ជាមួយគ្នានេះ លោកក៏បានអំពាវនាវដល់ប្រជាពលរដ្ឋខ្មែរដែលមានស្មារតីជាតិនិយម ឲ្យបន្តប្រើប្រាស់សិទ្ធិបុគ្គលរបស់ខ្លួនក្នុងការធ្វើពហិការផលិតផលថៃគ្រប់ប្រភេទ ដើម្បីគាំទ្រផលិតផលក្នុងស្រុក និងលើកស្ទួយសេដ្ឋកិច្ចជាតិ៕