(ភ្នំពេញ)៖ រយៈពេល៦ខែ ឆ្នាំ២០២៦ កម្ពុជាបាននាំចូលទំនិញពីសិង្ហបុរី ជាង១,១៩៥លានដុល្លារ កើនចំនួន២៣១ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥ ដែលក្នុងនោះភាគច្រើន ជាប្រេងឥន្ទនៈ។ នេះបើតាមរបាយការណ៍ របស់អគ្គនាយកដ្ឋានគយ និងរដ្ឋករកម្ពុជា។

បើតាមរបាយការណ៍,​ ទំហំពាណិជ្ជកម្មរវាងកម្ពុជា-សិង្ហបុរី នៅក្នុងរយៈពេល៦ខែ ឆ្នាំ២០២៦ សម្រេចបានចំនួន១,២៣៧លានដុល្លារ កើនឡើង២១៦ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥ ចំនួន៣៩១លានដុល្លារ។

ក្នុងរយៈពេល៦ខែ ឆ្នាំ២០២៦នេះ កម្ពុជាបាននាំចេញទំនិញ ទៅកាន់ទីផ្សារសិង្ហបុរី ចំនួនជិត៤២លានដុល្លារ កើនឡើងជាង៣៦ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥ មានចំនួនត្រឹមតែ៣០លានដុល្លារ។

ថ្លែងប្រាប់បណ្ដាញព័ត៌មាន Fresh News នៅថ្ងៃទី១៤ ខែកក្កដា ឆ្នាំ២០២៦នេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានបញ្ជាក់ថា «ការនាំទំនិញពីសិង្ហបុរី មានការកើនឡើង ដោយសារយើងបិទព្រំដែនគោកកម្ពុជា-ថៃ ដែលធ្វើឲ្យទំនិញមួយភាគធំ ដែលយើងនាំពីថៃកន្លងមក បង្វែរនាំចូលពីសិង្ហបុរីមកវិញ»។

បន្ថែមពីនោះទៀត អ្នកឧកញ៉ា លឹម ហេង បានលើកឡើងថា ការកើនឡើងនេះ គឺជាសញ្ញាល្អមួយ ក្នុងការជំនួសទីផ្សារថៃ ហើយភាគច្រើន កម្ពុជានាំចូលពីសិង្ហបុរី គឺ ប្រេង, គ្រឿងបរិក្ខារអគ្គិសនី ក៏ដូចជាម្ហូបអាហារ និងទំនិញមួយចំនួនទៀត។

អ្នកឧកញ៉ា លឹម ហេង បានឲ្យដឹងថា សិង្ហបុរីពិតមែនជាប្រទេស មិនមែនជាប្រទេសផលិត តែប្រទេសសិង្ហបុរី ជាប្រទេសចែកចាយទំនិញ ដូច្នេះធ្វើឲ្យការនាំចូលទំនិញពីសិង្ហបុរី មានការកើនឡើង ហើយទន្ទឹមនេះ កម្ពុជាក៏បាននាំចេញទំនិញ ទៅសិង្ហបុរី មានការកើនឡើងផងដែរ៕