(ភ្នំពេញ)៖ ក្នុងឆមាសទី១ ឆ្នាំ២០២៦ វិស័យអាកាសចរណ៍ស៊ីវិលនៅ​កម្ពុជា បានបង្ហាញពីនិន្នាការចម្រុះគួរឱ្យកត់សម្គាល់ ដោយការដឹកជញ្ជូនទំនិញតាមផ្លូវអាកាស បង្ហាញពីកំណើនដ៏លេចធ្លោ​ ផ្ទុយទៅវិញចំនួនអ្នកដំណើរមានការថយចុះ ៧% ខណៈដែលចំនួនជើងហោះហើរចេញ-ចូល (ទ្វេទិស) រក្សាបាននូវស្ថិរភាពទាំងស្រុង ​ស្របពេលជើងងហោះហើររំលងដែនអាកាស ​នៅតែបន្តពង្រីកខ្លួនជាលំដាប់ក្នុងអត្រា ៤%។ នេះបើតាមការបញ្ជាក់ឱ្យដឹងពីលោក ស៊ីន ចាន់សិរីវុត្ថា​ រដ្ឋលេខាធិការ និងជាអ្នកនាំពាក្យអាកាសចរស៊ីវិលកម្ពុជា។

លោកបញ្ជាក់ថា ក្នុងឆមាសទី១ ឆ្នាំ២០២៦នេះ បរិមាណទំនិញតាមផ្លូវអាកាសសរុបបាន ៤៧​ ៦២៧ តោនកើនឡើងរហូតដល់ ២៩% ធៀបនឹងរយៈពេលដូចគ្នាក្នុងឆ្នាំ២០២៥​។ ​ការកើនឡើងក្នុងកម្រិតខ្ពស់បែបនេះ ក្នុងខណៈពេលដែលជើងហោះហើរសរុបមានកម្រិតថេរ ​ដែលបង្ហាញឱ្យឃើញថា កម្ពុជាកំពុងទាក់ទាញជើងហោះហើរដឹកទំនិញតាមផ្លូវអាកាស (Dedicated Freighters) ច្រើនជាងមុន ឬការប្រើប្រាស់ទំហំផ្ទុកទំនិញក្រោមពោះយន្តហោះ (Belly-hold Capacity) មានប្រសិទ្ធភាពខ្ពស់ ឆ្លុះបញ្ចាំងពីការពង្រឹងខ្សែច្រវាក់ផ្គត់ផ្គង់ និងការរីកចម្រើននៃវិស័យ e-commerce នៅក្នុងប្រទេស។

ផ្ទុយទៅវិញ ចរាចរណ៍អ្នកដំណើរសរុបបានថយចុះ ៧% មកត្រឹម ៣,២៦៩,២៩៧ នាក់។ ការធ្លាក់ចុះនេះត្រូវបានគេមើលឃើញថាជាឥទ្ធិពលនៃរដូវកាលបៃតង (Low-Season) នៃវិស័យទេសចរណ៍ក្នុងតំបន់។ ទោះបីជាចំនួនអ្នកដំណើរថយចុះក៏ដោយ ចំនួនជើងហោះហើរចេញ-ចូលសរុបនៅតែរក្សាបាននូវស្ថិរភាពទាំងស្រុង​ ជាមួយនឹងចំនួន ៣២,៣០៦ ជើង​ ដែលបង្ហាញថា ក្រុមហ៊ុនអាកាសចរណ៍នានានៅតែបន្តរក្សាជើងហោះហើរដដែលដើម្បីរក្សាពេលវេលាហោះហើរ-ចុះចត (Slots) ក៏ប៉ុន្តែចំនួនកៅអីដែលមានអ្នកជិះមានការថយចុះ។

លោក សិរីវុត្ថា បញ្ជាក់ថា និន្នាការនេះទាមទារឱ្យមានការកែលម្អការរៀបចំកម្មវិធីលើកទឹកចិត្តរួមគ្នារវាងតួរអង្គពាក់ព័ន្ធ (អាកាសចរណ៍ស៊ីវិល ទេសចរណ៍ និងប្រតិបត្តិករអាកាសយានដ្ឋាន) ជាក់លាក់ឡើងវិញ ដើម្បីទាក់ទាញប្រភពទីផ្សារអ្នកដំណើរថ្មីៗត្រឡប់មកវិញ។

អាកាសចរណ៍ស៊ីវិល បានឱ្យដឹងផងដែរ ចំនួនជើងហោះហើររំលងដែនអាកាស (Overflights) ក៏បន្តកើនឡើង ៤%។

បើតាមអាកាសចរណ៍ស៊ីវិល អាកាសយានដ្ឋានអន្តរជាតិតេជោ (KTI) បានក្លាយជាមជ្ឈមណ្ឌលស្នូលដ៏សំខាន់ ដោយគ្រប់គ្រងជាង ៧០% នៃជើងហោះហើរសរុបក្នុងបណ្តាញអាកាសចរណ៍ជាតិ។ ចំណែកឯតំបន់ទេសចរណ៍វប្បធម៌សៀមរាបអង្គរ (SAI) ទទួលបាន ២៤% និងតំបន់ឆ្នេរព្រះសីហនុ (KOS) ទទួលបានត្រឹមតែ ៥.៣% ប៉ុណ្ណោះ។

បច្ចុប្បន្នកម្ពុជាមានក្រុមហ៊ុនអាកាសចរណ៍ចំនួន ៣៣ ក្រុមហ៊ុន ក្នុងនោះក្រុមហ៊ុនជាតិចំនួន ០៤ និងក្រុមហ៊ុនអាកាសចរណ៍អន្តរជាតិចំនួន ២៩​ កំពុងដំណើរការ៕