(ភ្នំពេញ)៖ តាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា បានបង្ហាញថា ប្រទេសចិននៅតែបន្តជាដៃគូពាណិជ្ជកម្មដ៏ធំបំផុតរបស់កម្ពុជា សម្រាប់ឆមាសទី១ ឆ្នាំ២០២៦ នេះ ដោយ ទំហំពាណិជ្ជកម្មសរុបរវាងប្រទេសទាំងពីរបានកើនឡើងគួរឱ្យកត់សម្គាល់ប្រមាណ២៥.៤% ដែលមានទំហំជាង ១១ពាន់លានដុល្លារអាម៉េរិក។

ក្នុងរយៈពេលប្រាំមួយខែដំបូងនៃឆ្នាំ២០២៦ ចាប់ពីខែមករា ដល់ខែមិថុនា កម្ពុជាបាននាំចេញទំនិញទៅកាន់ប្រទេសចិនក្នុងតម្លៃ ៩៤៣ លានដុល្លារអាម៉េរិកកើនឡើង ២៥.៧%។ ចំណែកការនាំចូលពីចិនមកកម្ពុជាវិញ មានតម្លៃប្រមាណជាង ១០ ពាន់លានដុល្លារអាម៉េរិក កើនឡើង ២៥.៤% បើធៀបនឹងរយៈពេលដូចគ្នាកាលពីឆ្នាំមុន។
ផលិតផលសំខាន់ៗដែលកម្ពុជានាំចេញទៅកាន់ប្រទេសចិនភាគច្រើនជាផលិតផលកសិកម្ម ដែលមានគុណភាពខ្ពស់ រួមមាន អង្ករ ផ្លែមៀនស្រស់ ចេកស្រស់ ស្វាយ ដំឡូងមី និងទុរេន ជាដើម។ ក្នុងរយៈពេលប្រាំមួយឆ្នាំចុងក្រោយនេះ កម្ពុជាបាននាំចេញអង្ករទៅកាន់ប្រទេសចិន ហុងកុង និងម៉ាកាវ សរុបចំនួន ១៧០ ៤៨៣ តោន ដែលគិតជាទឹកប្រាក់ប្រមាណ ៩៩.៦៧ លានដុល្លារអាម៉េរិក។

ក្រៅពីប្រទេសចិន កម្ពុជាក៏មានដៃគូពាណិជ្ជកម្មសំខាន់ៗផ្សេងទៀតដូចជា សហរដ្ឋអាម៉េរិក វៀតណាម និងជប៉ុន ដែលសុទ្ធសឹងតែបានបង្ហាញពីកំណើនទំហំពាណិជ្ជកម្មផងដែរ។
កំណើនដ៏រឹងមាំនៃទំហំពាណិជ្ជកម្មនេះបាន ឆ្លុះបញ្ចាំងពីភាពធន់ និងសក្តានុពលនៃសេដ្ឋកិច្ចជាតិ។ ការបន្តពង្រីកទំនាក់ទំនងពាណិជ្ជកម្មជាមួយបណ្តាប្រទេសនានា គឺជាកត្តាគន្លឹះក្នុងការជំរុញកំណើនសេដ្ឋកិច្ចកម្ពុជាឱ្យកាន់តែរីកចម្រើន និងធានាបាននូវចីរភាពសេដ្ឋកិច្ចរយៈពេលវែង។
សូមជម្រាបថា ក្នុងរយៈពេល៦ ខែដំបូងនៃឆ្នាំ២០២៦ ទំហំពាណិជ្ជកម្មសរុបរបស់កម្ពុជាបានកើនឡើងគួរឱ្យកត់សម្គាល់ប្រមាណ ២០.៥% ធៀបនឹងរយៈពេលដូចគ្នាឆ្នាំ២០២៥ ដោយសម្រេចបានជាង ៣៦។ ការនាំចេញរបស់កម្ពុជាមានតម្លៃជាង ១៧,ពាន់លានដុល្លារអាម៉េរិក កើនឡើង ១៩.៥% ខណៈការនាំចូលមានតម្លៃ ជាង១៩ ពាន់លានដុល្លារអាម៉េរិក កើនឡើង ២១.៤%៕