យល់ដឹងពីជំនួញ៖ ដំណាំកាហ្វេមានសក្តានុពលខ្លាំង តែខ្វះការវិនិយោគ, វិនិយោគិនខ្មែរ ជំរុញឱ្យអ្នកមានដីទំនេរ នៅភូមិសាស្ត្រអំណោយផល នាំគ្នាដាំកាហ្វេ ដោយធានាផ្តល់ពូជ និងទីផ្សារ (Video inside)
19-07-2026 12:46
(ភ្នំពេញ)៖ កម្ពុជាមានតម្រូវការគ្រាប់កាហ្វេប្រមាណជា ២០ ០០០ តោនក្នុងមួយឆ្នាំ តែការផលិតជាក់ស្តែងបានប្រមាណតែ ២ ០០០តោនប៉ុណ្ណោះក្នុងមួយឆ្នាំ ដែលទិន្នន័យនេះបង្ហាញថា កម្ពុជាត្រូវការគ្រាប់កាហ្វេជិត ១៨ ០០០តោនក្នុងមួយឆ្នាំបន្ថែមទៀត ដែលជាឱកាសល្អសម្រាប់កសិករមានបំណងចង់ដាំដំណាំកាហ្វេ។
ដោយសារដូច្នេះហើយទើបដំណាំកាហ្វេ គឺជាដំណាំដ៏មានសក្តានុពល ត្រូវការការវិនិយោគបន្ថែម ដើម្បីឆ្លើយតបតម្រូវការក្នុងស្រុកផង និងនាំចេញផងដែរ។
ឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកសហគ្រាស Confirel ដែលកំពុងវិនិយោគដាំកាហ្វេ និងកាកាវ នៅខេត្តរតនគិរី បានបញ្ជាក់ឱ្យដឹងថា សម្រាប់គ្រាប់កាហ្វេកម្ពុជាពិតជាមានតម្រូវការច្រើន ហើយខេត្តរតនគិរី និងមណ្ឌលគិរី ពិតជាអំណោយផលសម្រាប់ដំណាំនេះ។
ឧកញ៉ាឱសថបណ្ឌិត គាំទ្រឱ្យមានការវិនិយោគដាំដំណាំកាហ្វេឱ្យនេះឱ្យបានច្រើនថែមទៀត ខណៈផ្ទៃដីនៅខេត្តរតនគិរី និងមណ្ឌលគិរីនៅទូលាយច្រើន ប៉ុន្តែម្ចាស់ដីមិនដាំ។
ឧកញ៉ាឱសថបណ្ឌិតបានឱ្យដឹងថា «កាហ្វេខ្មែរយើងដូចស្វាយចន្ទីដែរ ទីផ្សារវៀតណាមត្រូវការច្រើនដែរ ព្រោះវៀតណាមផលិតមិនគ្រប់ទេ ត្រូវនាំចូលពីគេដែរ ប៉ុន្តែយើងមិនទាន់អាចដាំបានច្រើន ព្រោះដំណាំនេះត្រូវការការថែទាំជាប្រចាំ»។
លោក ជិន ជ័យាបុត្រ ប្រធានក្រុមហ៊ុន គីរីកាហ្វេ (Kiri Coffee) ជាប្រេនកាហ្វេរបស់កូនខ្មែរ ទិញគ្រាប់កាហ្វេសុទ្ធពីខេត្តមណ្ឌលគិរី បានប្រកាសជំរុញឱ្យអ្នកមានដីនៅទីតាំងអំណោយផល សម្រាប់ដំណាំកាហ្វេ ដែលមាននៅខេត្តរតនគិរី មណ្ឌលគីរី ស្ទឹងត្រែង ពោធិ៍សាត់ ជាដើម នាំគ្នាដាំដំណាំកាហ្វេ ព្រោះទីផ្សារកម្ពុជាមានត្រូវការច្រើន។
លោកបញ្ជាក់ថា ជាឱកាសល្អ សម្រាប់អ្នកចង់បង្កើតចំការកាហ្វេ ប្រកបដោយនិរន្តរភាពជាមួយ «គិរីកាហ្វេ» ដោយ «គិរីកាហ្វេ» បើកលក់ កូនកាហ្វេពូជរ៉ូប៊ូស្តា (Robusta) និងអារ៉ាប៊ីកា (Arabica) ដែលមានគុណភាពខ្ពស់ ធានាថាកូនកាហ្វេមានសុខភាពល្អ ឫសរឹងមាំ ធន់នឹងជម្ងឺ និងផ្តល់ទិន្នផលខ្ពស់។
លោកបន្ថែថា «នៅពេលប្រមូលផល ក្រុមហ៊ុនយើងធានាទទួលទិញផលវិញ ១០០% អស់បារម្ភរឿងទីផ្សារ! យើងមានកិច្ចសន្យាទទួលទិញគ្រាប់កាហ្វេពីបងប្អូនកសិករមកវិញ តាមតម្លៃទីផ្សារជាក់ស្តែង»។
សូមជម្រាបថា នាដើមឆ្នាំ២០២៦នេះ Kiri Coffee ទើបចំណាយទុនជិត ១លានដុល្លារ ប្រមូលទិញគ្រាប់កាហ្វេពីបងប្អូនកសិករ ជាជនជាតិដើមភាគតិច នៅក្នុងឃុំប៊ូស្រា ខេត្តមណ្ឌលគិរីបានជិត ៧០០តោន ដើម្បីបម្រើដល់ទីផ្សារកាហ្វេនៅកម្ពុជា។ Kiri Coffee ប្តេជ្ញាចិត្តកសាងកេរ្តិ៍ឈ្មោះ «កាហ្វេខ្មែរពិត ពីដែនដីមណ្ឌលគិរី មិនយកគ្រាប់កាហ្វេបរទេស មកបន្លំខ្មែរនោះទេ»៕
