(ភ្នំពេញ)៖ អគ្គនាយកដ្ឋានពន្ធដារ បានចេញសេចក្តីជូនដំណឹងមួយ ដើម្បីរំលឹកដល់ម្ចាស់អចលនទ្រព្យទាំងអស់ ដែលមានអចលនទ្រព្យស្ថិតនៅរាជធានីភ្នំពេញ និងបណ្តាខេត្តនានា ឲ្យរួសរាន់បំពេញកាតព្វកិច្ចប្រកាសបង់ពន្ធលើអចលនទ្រព្យ និងពន្ធលើដីធ្លីមិនបានប្រើប្រាស់ សម្រាប់ឆ្នាំ២០២៦។ កាលបរិច្ឆេទចុងក្រោយសម្រាប់ការបង់ពន្ធទាំងពីរប្រភេទនេះ គឺត្រឹមថ្ងៃទី៣០ ខែកញ្ញា ឆ្នាំ២០២៦ ខាងមុខនេះ។

អគ្គនាយកដ្ឋានពន្ធដារបានសង្កេតឃើញថា ម្ចាស់អចលនទ្រព្យមួយចំនួននៅពុំទាន់បានបំពេញកាតព្វកិច្ចបង់ពន្ធនៅឡើយ។ លើសពីនេះ ក៏មានម្ចាស់អចលនទ្រព្យមួយចំនួន នៅពុំទាន់បានស្នើសុំចុះបញ្ជី ឬធ្វើបច្ចុប្បន្នភាពព័ត៌មានអចលនទ្រព្យ ឲ្យបានពេញលេញក្នុងប្រព័ន្ធគ្រប់គ្រងទិន្នន័យរបស់អគ្គនាយកដ្ឋានពន្ធដារ។ ករណីខ្លះ ម្ចាស់អចលនទ្រព្យក៏បានរកឃើញព័ត៌មានមិនត្រឹមត្រូវ បន្ទាប់ពីទទួលបានសេចក្តីជូនដំណឹងរំលឹក។

ដើម្បីធានាបាននូវភាពត្រឹមត្រូវ និងជំរុញការប្រមូលពន្ធប្រកបដោយប្រសិទ្ធភាព អគ្គនាយកដ្ឋានពន្ធដារ សូមក្រើនរំលឹកដល់ម្ចាស់អចលនទ្រព្យទាំងអស់ មេត្តាអញ្ជើញទៅបំពេញកាតព្វកិច្ចចុះបញ្ជី ឬធ្វើបច្ចុប្បន្នភាពព័ត៌មានអចលនទ្រព្យឲ្យបានត្រឹមត្រូវ នៅសាខាពន្ធដារខេត្ត-ខណ្ឌ ដែលអចលនទ្រព្យនោះស្ថិតនៅ ឬនៅអគ្គនាយកដ្ឋានពន្ធដារផ្ទាល់សម្រាប់អចលនទ្រព្យទូទាំងប្រទេស។

ការបង់ប្រាក់ពន្ធអាចធ្វើឡើងនៅគ្រប់សាខាធនាគារពាណិជ្ជ ដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ ឬបង់ពន្ធតាមអនឡាញតាមរយៈកម្មវិធីទូរសព្ទដៃអ្នកជាប់ពន្ធ (GDT Taxpayer App)។

អគ្គនាយកដ្ឋានពន្ធដារសង្ឃឹមយ៉ាងមុតមាំថា ម្ចាស់អចលនទ្រព្យទាំងអស់នឹងរួសរាន់ទៅបំពេញកាតព្វកិច្ចបង់ពន្ធ ឲ្យបានទាន់ពេលវេលាកំណត់ ដើម្បីជៀសវាងការរងនូវទណ្ឌកម្មរដ្ឋបាល រួមមានពន្ធបន្ថែម និងការប្រាក់ តាមច្បាប់ស្តីពីសារពើពន្ធជាធរមាន៕