(ភ្នំពេញ)៖ ក្នុងឆមា​សទី១ ឆ្នាំ២០២៦នេះ កម្ពុជាបានសម្រេចការនាំចេញទំនិញសំខាន់ៗទៅកាន់ប្រទេសអេស្ប៉ាញ ដែលទើបក្លាយជាម្ចាស់ពានរង្វាន់បាល់ទាត់ពិភពលោក FIFA World Cup 2026 ក្នុងទំហំទឹកប្រាក់ជិត ៦០០លានដុល្លារអាមេរិក។ នេះបើយោងតាមរបាយការណ៍របស់ក្រសួងពាណិជ្ជកម្ម ដែលបានបង្ហាញពីកំណើនគួរឱ្យកត់សម្គាល់ ក្នុងទំនាក់ទំនងពាណិជ្ជកម្មរវាងប្រទេសទាំងពីរ។

របាយការណ៍បានបញ្ជាក់ថា ចាប់ពីខែមករា ដល់ខែមិថុនា ឆ្នាំ២០២៦ ទំហំនាំចេញរបស់កម្ពុជាទៅកាន់ប្រទេសអេស្ប៉ាញ បានកើនឡើងដល់ជាង ៥៨៩លានដុល្លារអាមេរិក ​កើនឡើង ១៥.៤៤% បើធៀបនឹងរយៈពេលដូចគ្នាកាលពីឆ្នាំមុន ដែលមានតម្លៃជាង ៥១១លានដុល្លារអាមេរិក។ កំណើននេះឆ្លុះបញ្ចាំងពីសន្ទុះវិជ្ជមាន និងការរីកចម្រើននៃសមត្ថភាពផលិតកម្ម និងការប្រកួតប្រជែងរបស់កម្ពុជាលើទីផ្សារអន្តរជាតិ។

ទន្ទឹមនឹងនេះ ការនាំចូលពីប្រទេសអេស្ប៉ាញមកកាន់កម្ពុជា ក៏មានការកើនឡើងផងដែរ ដោយសម្រេចបានជាង ១៤លានដុល្លារអាមេរិក ដែលជាកំណើន ៤០.៤៣%​ ដែលធ្វើទំហំពាណិជ្ជកម្មសរុបរវាងកម្ពុជា និងអេស្ប៉ាញ​បានឈានដល់ជាង ៦០៣លានដុល្លារអាមេរិក កើនឡើង ១៥.៩២% បើធៀបនឹងឆ្នាំមុន ដែលមានតម្លៃ ៥២១លានដុល្លារអាមេរិក។

តួលេខទាំងនេះបង្ហាញពីភាពរឹងមាំ និងសក្តានុពលដ៏ធំធេងនៃកិច្ចសហប្រតិបត្តិការពាណិជ្ជកម្មទ្វេភាគី ដែលរួមចំណែកយ៉ាងសំខាន់ដល់កំណើនសេដ្ឋកិច្ចជាតិ៕