(ភ្នំពេញ)៖ លោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល គាំទ្រចំពោះគម្រោងអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស នៅខេត្តព្រះសីហនុ ដែលគ្រោងវិនិយោគឡើងដោយក្រុមហ៊ុន ២នៅកម្ពុជា គឺក្រុមហ៊ុន World Bridge Group របស់អ្នកឧកញ៉ា សៀ ឬទ្ធី និងក្រុមហ៊ុនសូស៊ីយេត កុងសេសស្បូនរ ដឺ ឡាអេរ៉ូព័រ (SCA) របស់បារាំង ដើម្បីតភ្ជាប់បណ្តាញដឹកជញ្ជូនទំនិញ រវាងផ្លូវអាកាសនិងផ្លូវសមុទ្រ។

នៅថ្ងៃទី២១ ខែកក្កដា ឆ្នាំ២០២៦ ក្រុមហ៊ុន World Bridge Group និងក្រុមហ៊ុន សូស៊ីយេត កុងសេសស្បូនរ ដឺ ឡាអេរ៉ូព័រ (SCA) បាន​ចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការបង្កើតក្របខ័ណ្ឌកិច្ចពិភាក្សាសម្រាប់ការអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស និងភស្តុភារកម្មនៅអាកាសយានដ្ឋានអន្តរជាតិខេត្តព្រះសីហនុ។​

កិច្ចសហការ​រវាងស្ថាប័នឯកជនឈានមុខទាំងពីរនេះ គឺដើម្បីបង្កើតក្របខ័ណ្ឌ កិច្ចពិភាក្សាសម្រាប់ការអភិវឌ្ឍមជ្ឈមណ្ឌលដឹកជញ្ជូនទំនិញតាមផ្លូវអាកាស និងភស្តុភារកម្ម(Air Cargo and Logistic Hub) នៅអាកាសយានដ្ឋានអន្តរជាតិ ខេត្តព្រះសីហនុ ដែលជាដំណាក់កាលថ្មីមួយទៀត ជួយទ្រទ្រង់ដល់ខ្សែច្រវ៉ាក់ ភស្តុភារកម្មកម្ពុជា ជាពិសេសការប្រែក្លាយទៅជាមជ្ឈមណ្ឌលភស្តុភារកម្ម ដែលអាចតភ្ជាប់បណ្តាញដឹកជញ្ជូនទំនិញ រវាងផ្លូវអាកាសនិងផ្លូវសមុទ្រផងដែរ។
​
ពិធីចុះ MoU រវាង ក្រុមហ៊ុន World Bridge Group និង​ SCA​ ​បានប្រព្រឹត្តទៅក្រោមអធិបតីភាពលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល ​និងមានការចូលរួមពី លោក អូលីវីយេ រីឆាដ (Olivier Richard) ឯកអគ្គរដ្ឋទូតបារាំងប្រចាំប្រទេសកម្ពុជា អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាលក្រុមហ៊ុន World Bridge Group និងលោក Julien BERT នាយកប្រតិបត្តិនៃក្រុមហ៊ុន SCA។

​លោកបណ្ឌិត ម៉ៅ ហាវណ្ណាល់ បានគូសបញ្ជាក់ថា ការចូលរួមចំណែករបស់វិស័យឯកជនក្នុងវិស័យអាកាសចរណ៍ស៊ីវិលនេះ គឺពិតជាបានឆ្លើយតបដោយផ្ទាល់ និងមានប្រសិទ្ធភាពស្របតាម «យុទ្ធសាស្ត្របញ្ចកោណ ដំណាក់កាលទី១» របស់រាជរដ្ឋាភិបាលកម្ពុជា អាណត្តិទី៧ នៃរដ្ឋសភា។ ជាពិសេស គម្រោងនេះស្ថិតនៅក្នុងបញ្ចកោណទី២ ស្តីពី ការធ្វើពិពិធកម្មសេដ្ឋកិច្ច និងការបង្កើនភាពប្រកួតប្រជែង និងមុំទី២ ស្តីពី ការលើកកម្ពស់ការតភា្ជប់ និងការបង្កើនប្រសិទ្ធភាពនៃវិស័យដឹកជញ្ជូន ឡូជីស្ទីក។

លោកបញ្ជាក់ថា រដ្ឋលេខាធិការដ្ឋានអាកាសចរណ៍ស៊ីវិល ក៏បានត្រៀមខ្លួនជានិច្ច ដើម្បីជួយគាំទ្រដល់ការអភិវឌ្ឍមជ្ឈមណ្ឌលភស្តុភារកម្មនេះ តាមរយៈការផ្ដល់ប្រឹក្សា និងការណែនាំបំពេញបែបបទតាមបទប្បញ្ញត្តិសេដ្ឋកិច្ច និងបច្ចេកទេសអាកាសចរណ៍ស៊ីវិល ដើម្បីឱ្យការដឹកជញ្ជូនទំនិញតាមផ្លូវអាកាសមានការរីកចម្រើន ប្រកបដោយចីរភាព សន្តិសុខ សុវត្ថិភាព និងរួមចំណែកដល់ការអភិវឌ្ឍសេដ្ឋកិច្ចជាតិ៕