(ភ្នំពេញ)៖ ក្នុងឆមាសទី១ ឆ្នាំ២០២៦នេះ កម្ពុជាបានសម្រេចការនាំចេញគ្រាប់ស្វាយចន្ទីឆៅក្នុងបរិមាណដ៏ច្រើនលើសលប់ប្រមាណជាង១លានតោន ដោយរកចំណូលបានជាង ១ ៧០០លានដុល្លារអាម៉េរិក។ នេះបើយោងតាមទិន្នន័យក្រៅផ្លូវការពីសមាគមស្វាយចន្ទីកម្ពុជា។

លោក អួន ស៊ីឡុត ប្រធានសមាគមស្វាយចន្ទីកម្ពុជាបានប្រាប់បណ្តាញព័ត៌មាន Fresh News នៅថ្ងៃទី២៣ ខែកក្កដានេះថា គ្រាប់ស្វាយចន្ទីឆៅប្រមាណ ១ ០៣០ ០០០ តោន ត្រូវបាននាំចេញទៅកាន់ប្រទេសវៀតណាម ផ្តល់ចំណូលបានប្រមាណ ១ ៧៥១លានដុល្លារអាម៉េរិក កើនឡើង ២៨.៩% បើធៀបនឹងរយៈពេលដូចគ្នាកាលពីឆ្នាំមុន។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានមានប្រសាសន៍ថា ស្របពេលដែលការនាំចេញកើនឡើង តម្លៃស្វាយចន្ទីនៅឆ្នាំនេះក៏ល្អប្រសើរជាងឆ្នាំមុនផងដែរ។ ជាក់ស្តែង ក្នុងខែកក្កដា នេះ គ្រាប់ស្វាយចន្ទីស្រស់មានតម្លៃ ៨ ២០០រៀលក្នុងមួយគីឡូក្រាម ខណៈកាលពីឆ្នាំ២០២៥ មានតម្លៃត្រឹមតែ ៧ ៥០០រៀលប៉ុណ្ណោះ។

លោកបន្ថែមថា ដោយសារតម្លៃគ្រាប់ស្វាយចន្ទីឆៅ ល្អជាងរាល់ឆ្នាំ ដូច្នេះហើយទើបនាំឱ្យ ពាណិជ្ជករបង្ខំចិត្តលក់គ្រាប់ឆៅទៅក្រៅប្រទេស ដោយបច្ចុប្បន្ន គ្រាប់សម្រាប់បម្រើដល់ការកែច្នៃក្នុងស្រុកមានបរិមាណតិចតួចប៉ុណ្ណោះ ស្របពេលដែលលទ្ធភាពនៃការកែច្នែក្នុងស្រុកនៅមានកម្រិត។

លោកប្រធានសមាគមបានបន្តទៀតថា សម្រាប់ទិន្នផលឆ្នាំនេះ ក៏ផ្តល់ផលល្អផងដែរ បើទោះបីជាកម្ពុជារងឥទ្ធិពលអ៊ែលនីណូក៏ដោយ។ លោកសង្ឃឹមថា ឥទ្ធិពលអ៊ែលនីណូនេះនឹងមិនផ្តល់ផលប៉ះពាល់ដល់ដំណាំស្វាយចន្ទីឡើយ ដោយសារដំណាំនេះធន់នឹងកម្តៅ ប្រសិនបើសីតុណ្ហភាពក្រោម ៤១-៤២អង្សាសេ នោះនឹងមិនផ្តល់ប៉ះពាល់ដល់ស្វាយចន្ទីឡើយ។

ជុំវិញបញ្ហានេះ សមាគមនឹងបន្តបណ្តុះបណ្តាលកសិករ ដើម្បីបង្កើនសមត្ថភាពដាំដុះឱ្យទទួលបានទិន្នផល។ កាលពីឆ្នាំ២០២៥ កន្លងទៅ សមាគមបានរៀបចំសិក្ខាសាលាចំនួន ៤០លើក ដើម្បីបញ្រ្ជាប់ចំណេះដឹងដល់កសិករប្រមាណ ៨,០០០គ្រួសារ ពីបច្ចេកទេសនៃការដាំដុះស្វាយចន្ទីឱ្យទទួលបានទិន្នផលខ្ពស់។ ការខិតខំប្រឹងប្រែងទាំងនេះ នឹងរួមចំណែកដល់ការអភិវឌ្ឍវិស័យស្វាយចន្ទីកម្ពុជាឱ្យកាន់តែរីកចម្រើន និងមានសក្តានុពលខ្ពស់នាពេលអនាគត៕