​(ភ្នំពេញ)៖ លោក ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបាន​គូសបញ្ជាក់ថា ការដាក់អត្រាពន្ធគយថ្មី ១០% បូកនឹង MFN របស់សហរដ្ឋអាមេរិក ​នឹងមិនបង្កផលប៉ះពាល់ដល់ទីផ្សារនាំចេញរបស់កម្ពុជា ទៅកាន់សហរដ្ឋអាមេរិកនោះទេ ព្រោះកម្ពុជាធ្លាប់បានអនុវត្តអត្រាពន្ធស្រដៀងគ្នានេះរួចមកហើយ។

​លោក ប៉ែន សុវិជាតិ គូសបញ្ជាក់បែបនេះ ធ្វើឡើងបន្ទាប់ពីកម្ពុជាបានបញ្ចប់ការចរចាយ៉ាងស្វិតស្វាញជាមួយសហរដ្ឋអាមេរិក និងបានបំពេញលក្ខខណ្ឌមួយចំនួន។ ​ជាលទ្ធផលកម្ពុជាត្រូវបានដាក់បញ្ចូល ក្នុងចំណោមក្រុមប្រទេសមួយចំនួនទៀត ដូចជា បង់ក្លាដែស កាណាដា អេក្វាទ័រ ហ្គាតេម៉ាឡា ហុងឌូរ៉ាស ឥណ្ឌា ឥណ្ឌូនេស៊ី ហ្ស៊កដានី ដែលត្រូវអនុវត្តអត្រាពន្ធ ១០% បូកនឹងMFN ចាប់ពីថ្ងៃទី២៤ ខែកក្កដានេះតទៅ។

លោក ប៉ែន សុវិជាតិ បានបន្ថែមថា ការដែលកម្ពុជាស្ថិតក្នុងចំណោមប្រទេស ដែលអនុវត្តអត្រាពន្ធ ១០% នេះ គឺជាសញ្ញាវិជ្ជមានមួយដែលបង្ហាញថា កម្ពុជានៅតែជាប្រទេសមួយ ដែលគោរពតាមការប្រុងប្រៀបបំពេញលក្ខខណ្ឌនានា ទាក់ទងនឹងការអនុវត្តជំពូក ៣០១ របស់សហរដ្ឋអាមេរិក។ ក្រៅពីនេះ ក៏មានការណែនាំឲ្យការិយាល័យតំណាងពាណិជ្ជកម្មសហរដ្ឋអាមេរិក (USTR) បង្កើតតារាងកូតាសម្រាប់រយៈពេល ៣ឆ្នាំ សម្រាប់ប្រទេសកម្ពុជា បង់ក្លាដែស ឥណ្ឌូនេស៊ី និងម៉ាឡេស៊ី ក្នុងការនាំចូលវត្ថុធាតុដើមវាយនភណ្ឌពីសហរដ្ឋអាមេរិក។

លោក​បន្ថែមថា «យើងសង្ឃឹមទោះ ជាអនុវត្តពន្ធ ១០% ដូចដែលបានបញ្ជាក់នៅក្នុងសេចក្តីសម្រេចនេះក្ដី ក៏ការនាំចេញរបស់យើងទៅកាន់ទីផ្សារអាមេរិកនៅតែរក្សាបាននូវទំហំ និងឧត្តមភាពឈរជើង ដូចរយៈពេលកន្លងមក ដូចដែលធ្លាប់បានទទួលអនុវត្តកន្លងមកអីចឹងហើយ។ ក៏សូមជម្រាបជូនទៅអ្នកនាំចេញទាំងអស់ និងបងប្អូនសាធារណជនផងដែរថា អ្វីដែលជាការអនុវត្តបច្ចុប្បន្ននៅក្នុងការណែនាំរបស់សហរដ្ឋអាមេរិក ចំពោះការអនុវត្តពន្ធ ១០% បូកនឹង MFN នេះ គឺជាការអនុវត្តនៅក្នុងករណីដែលជាលក្ខខណ្ឌរបស់សហរដ្ឋអាមេរិក ហើយក៏ជាលទ្ធផលនៃកិច្ចខិតខំប្រឹងប្រែងនៃការចរចាពិគ្រោះយោបល់ យ៉ាងស្វិតស្វាញរបស់រាជរដ្ឋាភិបាលដែរ ដែលបានសម្រេចធ្វើឲ្យប្រទេសយើងស្ថិត នៅក្នុងចំណោមត្រឹមតែ ១០% បូកនឹង MFN»។ ​

សូមជម្រាបថា ទំនាក់ទំនងពាណិជ្ជកម្មរវាងកម្ពុជា និងសហរដ្ឋអាមេរិក បានបន្តបង្ហាញពីកំណើនដ៏រឹងមាំ ដោយសម្រេចបានទំហំទឹកប្រាក់សរុបជាង ៧.៤ពាន់លានដុល្លារ ក្នុងរយៈពេល៦ខែដំបូងនៃឆ្នាំ២០២៦ កើនឡើង ៣១.៤% បើធៀបនឹងរយៈពេលដូចគ្នាកាលពីឆ្នាំមុន ដែលឆ្លុះបញ្ចាំងពីសារៈសំខាន់នៃទីផ្សារអាម៉េរិក សម្រាប់​កម្ពុជា។

ក្នុងឆមាសទី១ ឆ្នាំ២០២៦ ការនាំចេញរបស់កម្ពុជា ទៅកាន់ទីផ្សារសហរដ្ឋអាមេរិក មានរហូតដល់ ៥.៦ពាន់លានដុល្លារ​កើនឡើង២៩.៨% បើធៀបនឹងរយៈពេលដូចគ្នាកាលពីឆ្នាំមុន ដែលមានទំហំ ៥.៥ពាន់លានដុល្លារ។

ជាមួយគ្នានេះ ការនាំចូលពីសហរដ្ឋអាមេរិកមកកម្ពុជា ក៏មានការកើនឡើងយ៉ាងគំហុកផងដែរ ដោយសម្រេចបានទំហំ ៣០៧លានដុល្លារ មានកំណើន ៨៦.៤% បើធៀបនឹងរយៈពេលដូចគ្នាកាលពីឆ្នាំមុន៕