(ភ្នំពេញ)៖ និយ័តករធានារ៉ាប់រងកម្ពុជា (ន.ធ.ក.) នៅថ្ងៃទី២៤ ខែកក្កដា ឆ្នាំ២០២៦នេះ បានរៀបចំ «វេទិកានិយ័តករ និងអគ្គនាយកធានារ៉ាប់រង» ដើម្បីពិភាក្សាអំពីបញ្ហាប្រឈម និងដាក់ចេញនូវវិធានការសំខាន់ៗ សម្រាប់ជំរុញការអភិវឌ្ឍវិស័យធានារ៉ាប់រងនៅកម្ពុជា។

វេទិកានេះ ត្រូវបានធ្វើឡើងក្រោមវត្តមានលោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា និងលោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា។

លោក ប៊ូ ច័ន្ទភីរូ បានគូសបញ្ជាក់ថា វេទិកានេះជាយន្តការនៃភាពជាដៃគូរវាងរដ្ឋ និងវិស័យឯកជន ដើម្បីរួមគ្នាដោះស្រាយបញ្ហាប្រឈម និងឧបសគ្គនានា ក្នុងគោលបំណងលើកកម្ពស់ការអភិវឌ្ឍវិស័យធានារ៉ាប់រងឱ្យកាន់តែមានប្រសិទ្ធភាព ចីរភាព និងបរិយាបន្ន។

លោកបានបន្ថែមថា ទីផ្សារធានារ៉ាប់រងកម្ពុជា នៅតែរក្សាកំណើនប្រមាណ ៥ភាគរយ ក្នុងរយៈពេល ៦ខែដើមឆ្នាំ២០២៦នេះ បើទោះបីជាមានវិបត្តិក្រៅប្រទេស និងបញ្ហានៅតាមព្រំដែនក៏ដោយ។

បន្ទាប់ពីបានពិភាក្សាលើបញ្ហាប្រឈម ដែលបានលើកឡើង «វេទិកានិយ័តករ និងអគ្គនាយកធានារ៉ាប់រង» ឆ្នាំ២០២៦ សម្រេចដូចខាងក្រោម៖

១៖ និយ័តករធានារ៉ាប់រងកម្ពុជា នឹងសិក្សារៀបចំបង្កើតមជ្ឈមណ្ឌលទិន្នន័យធានារ៉ាប់រងឱ្យបានឆាប់ សម្រាប់គ្រប់គ្រង រក្សាទុក និងចែករំលែកទិន្នន័យធានារ៉ាប់រង ដល់ប្រតិបត្តិករ ធានារ៉ាប់រង និងភាគីពាក់ព័ន្ធទាំងអស់ ដើម្បីធានាបាននូវមូលដ្ឋានទិន្នន័យគ្រប់គ្រាន់ និងរឹងមាំសម្រាប់ រៀបចំផលិតផលធានារ៉ាប់រងឱ្យមានគុណភាព និងមានតម្លៃសមរម្យ អាចប្រកួតប្រជែងជាមួយ ទីផ្សារក្នុងតំបន់។

២៖ និយ័តករធានារ៉ាប់រងកម្ពុជា នឹងចាប់ផ្តើមអនុវត្តជាផ្លូវការ នៃការផ្តល់សេវាសាធារណៈ តាមប្រព័ន្ធអេឡិចត្រូនិច (E-Service for Business) ចាប់ពីថ្ងៃទី១ ខែមករា ឆ្នាំ២០២៧ តទៅ។

៣៖ និយ័តករធានារ៉ាប់រងកម្ពុជា នឹងដាក់ចេញនូវគោលការណ៍ណែនាំ ស្តីពីស្តង់ដារនៃកិច្ចព្រមព្រៀង រវាងអន្តរការីធានារ៉ាប់រង និងក្រុមហ៊ុនធានារ៉ាប់រង ដោយមានកំណត់កម្រៃជើងសា និង កម្រៃផ្សេងៗ ឱ្យបានច្បាស់លាស់។

៤៖ វេទិកានិយ័តករ និងអគ្គនាយកធានារ៉ាប់រង និងត្រូវពង្រីកបន្ថែមអតិថិជនធានារ៉ាប់រង ទៅជាវេទិកានិយ័តករ អគ្គនាយក និងអតិថិជនធានារ៉ាប់រង ចាប់ពីឆ្នាំ២០២៧តទៅ។

៥៖ ប្រតិបត្តិករធានារ៉ាប់រង ត្រូវពង្រឹងការអនុវត្តកាតព្វកិច្ច ផ្តល់របាយការណ៍ប្រចាំគ្រា ជូនដល់និយ័តករ អនុលោមតាមលិខិតបទដ្ឋានគតិយុត្តជាធរមាន ដើម្បីលើកកម្ពស់គុណភាព នៃ ទិន្នន័យទីផ្សារធានារ៉ាប់រង។

វិធានការទាំង៥នេះ ត្រូវបានចាត់ទុកថាជាជំហានដ៏សំខាន់មួយក្នុងការពង្រឹងការគ្រប់គ្រងវិស័យធានារ៉ាប់រង ការធ្វើឌីជីថលភាវូបនីយកម្មសេវាសាធារណៈ ការបង្កើនតម្លាភាព និងការលើកកម្ពស់ទំនុកចិត្តរបស់អតិថិជន សំដៅជំរុញឱ្យវិស័យធានារ៉ាប់រងកម្ពុជារីកចម្រើនប្រកបដោយចីរភាព និងបរិយាបន្ន៕