(ភ្នំពេញ)៖ ស្របពេលដែលសហគ្រាសក្នុងស្រុក ព្យាយាមពង្រឹងការផលិតទាំងគុណភាព និងបរិមាណ ដើម្បីឆ្លើយតបនឹងការគាំទ្ររបស់ប្រជាពលរដ្ឋ ប៉ុន្តែក៏មានការហូរចូលនូវផលិតផលក្លែងក្លាយ ការក្លែងបន្លំផលិតផល និងការរត់ពន្ធទំនិញជាច្រើន។

អ្នកជំនាញចាត់ទុកថា បញ្ហាទាំងនេះ គឺជាដើមហេតុបំផ្លាញទីផ្សារសហគ្រាសធុនតូច និងមធ្យមកម្ពុជាដោយស្វ័យប្រវត្តិ​ និងធ្វើឱ្យបាត់បង់ជំនឿទុកចិត្តពីអ្នកវិនិយោគក្នុងស្រុក និងបរទេស។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានគូសបញ្ជាក់ថា បញ្ហាផលិតផលក្លែងក្លាយនេះ គឺជាគ្រោះថ្នាក់ដល់សេដ្ឋកិច្ចជាតិ និងសុខុមាលភាពរបស់ប្រជាពលរដ្ឋ។ លោកបានបន្ថែមថា ប្រសិនបើជាវត្ថុប្រើប្រាស់ វានឹងគំរាមកំហែងដល់សុវត្ថិភាព ហើយបើជាម្ហូបអាហារវិញ វានឹងប៉ះពាល់ដល់សុខភាព។ ​

លោកបន្ថែមថា ក្រៅពីផលិតផលក្លែងក្លាយ ការរត់គេចពន្ធក៏ជាឧបសគ្គដ៏ធំមួយ ដែលចូលរួមបំផ្លាញសេដ្ឋកិច្ចកម្ពុជា។ ការរត់គេចពន្ធធ្វើឱ្យទំនិញមិនស្របច្បាប់ អាចប្រកួតប្រជែងជាមួយទំនិញស្របច្បាប់ ដែលធ្វើឱ្យសហគ្រាសក្នុងស្រុកពិបាកប្រកួតប្រជែង។

លោកមានប្រសាសន៍ថា ដើម្បីដោះស្រាយបញ្ហានេះ គឺទាមទារឱ្យមានការលុបបំបាត់ទីផ្សារអនឡាញដែលមិនស្របច្បាប់ និងការអនុវត្តច្បាប់ដោយតម្លាភាព និងប្រសិទ្ធភាពពីសំណាក់ក្រសួងស្ថាប័នមានសមត្ថកិច្ច។

លោកបានបញ្ជាក់យ៉ាងដូច្នេះថា «វាជាការពិតណាស់ ផលិតផលក្លែងក្លាយចូលទីផ្សារហើយវាបំផ្លាញទីផ្សារសហគ្រាសធុនតូច និងមធ្យមកម្ពុជាដោយស្វ័យប្រវត្តិ។ ហើយដូចខ្ញុំនិយាយមិញអញ្ចឹង បើសិនជាម្ហូបអាហារវាបំផ្លាញសុខុមាលភាពរបស់ប្រជាពលរដ្ឋ បើសិនជារបស់ប្រើប្រាស់វានឹងគ្មានសុវត្ថិភាពសម្រាប់អ្នកប្រើប្រាស់។ ដូច្នេះហើយបានជារាជរដ្ឋាភិបាលយើងបានដាក់ចេញនូវច្បាប់ការពារអ្នកប្រើប្រាស់ និងការប្រកួតប្រជែង។ នេះជាចំណុចសំខាន់ដែលត្រូវអនុវត្តទាំងអស់គ្នា។ ដូច្នេះយើងទាមទារចាំបាច់ត្រូវតែលុបបំបាត់នូវទីផ្សារអនឡាញដែលមិនស្របច្បាប់។ ​បើសិនជាគាត់ចុះបញ្ជីត្រឹមត្រូវ ទំនិញគាត់នាំចូលបង់ពន្ធត្រឹមត្រូវ អនុលោមតាមច្បាប់ គឺជារឿងល្អ។ តែបើសិនជាគាត់ចូលមកដោយទីផ្សារងងឹត ដោយដូចខ្ញុំនិយាយមិញរត់គេចពន្ធ ឬក៏ផលិតក្លែងក្លាយលក់អនឡាញ គឺជាការបំផ្លាញសេដ្ឋកិច្ច និងសុខុមាលភាព។ ត្រូវយកមកដាក់ទោសទាំងអស់គ្នាដើម្បីជៀសវាង»។

​លោកបាន បានអំពាវនាវដល់អាជ្ញាធរឱ្យស្រាវជ្រាវរកឫសគល់នៃបញ្ហា និងដាក់ទោសអ្នកពាក់ព័ន្ធទាំងអស់។ សភាពាណិជ្ជកម្មកម្ពុជាក៏បានអំពាវនាវដល់អាជីវករ និងអ្នកវិនិយោគទាំងអស់ ឱ្យចូលរួមសហការតាមរយៈយន្តការរាជរដ្ឋាភិបាល ដើម្បីរាយការណ៍ពីបញ្ហាផ្សេងៗដែលរាំងស្ទះដល់ការវិនិយោគ និងការអនុវត្តច្បាប់។ ការរួមគ្នាទប់ស្កាត់បញ្ហាទាំងនេះ នឹងជួយពង្រឹងសេដ្ឋកិច្ចជាតិ និងបង្កើនទំនុកចិត្តដល់ប្រជាពលរដ្ឋ និងអ្នកវិនិយោគ៕