(ភ្នំពេញ)៖ លោក ហេង សុគង់ រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្ត បានថ្លែងថា ​បន្ទាប់ពីប្រមុខរាជរដ្ឋាភិបាលពិនិត្យ និងកែសម្រួលនីតិវិធីនៃការចុះបញ្ជីសម្រាប់ SME សម្រាប់ផលិតផលសាប៊ូដែលមិនមានហានិភ័យ ដូចជាសាប៊ូជូតផ្ទះ ឬសាប៊ូលាងបន្ទប់ទឹក ដែលមិនប៉ះពាល់ផ្ទាល់ដល់រាងកាយមនុស្ស គឺអាចអនុញ្ញាតឱ្យចូលទៅកាន់ទីផ្សារ បានក្នុងរយៈពេលត្រឹមតែ ៦ថ្ងៃប៉ុណ្ណោះ។

​ដោយឡែកចំពោះផលិតផលសាប៊ូ ដែលមានហានិភ័យមធ្យម និងហានិភ័យខ្ពស់ ជាពិសេសប្រភេទដែលប៉ះពាល់ផ្ទាល់ដល់រាងកាយមនុស្ស នឹងតម្រូវឱ្យមានការធ្វើតេស្តចាំបាច់ ដូចជាការធ្វើតេស្តលក្ខណៈមីក្រូជីវសាស្ត្រ រូបវន្ត និងគីមី រួមទាំងការពិនិត្យវត្ថុធាតុដើមឱ្យបានគ្រប់ជ្រុងជ្រោយ។ ទោះជាយ៉ាងណាក៏ដោយ ដំណើរការធ្វើតេស្តនេះ ក៏នឹងមិនតម្រូវឱ្យមានរយៈពេលយូរដែរ ដោយនឹងកំណត់រយៈពេលច្បាស់លាស់ ដើម្បីធានាថាផលិតផលរបស់ម្ចាស់សិប្បកម្មអាចឈានទៅកាន់ទីផ្សារបានកាន់តែឆាប់រហ័ស។

មន្រ្តីជាន់ខ្ពស់ក្រសួងឧស្សាហកម្ម រូបនេះបានបញ្ជាក់ថា ការអនុវត្តគម្រោងសាកល្បង (Pilot Project) ទៅលើសិប្បកម្មផលិតសាប៊ូនេះ គឺមានសារៈសំខាន់ណាស់ក្នុងការលើកកម្ពស់សហគ្រាសធុនតូច និងមធ្យម (SMEs) ដែលជាឆ្អឹងខ្នងនៃកំណើនសេដ្ឋកិច្ចជាតិ។ រាជរដ្ឋាភិបាលនឹងជំរុញធ្វើយ៉ាងណាឱ្យម្ចាស់សិប្បកម្មទទួលបាននូវភាពអំណោយផលគ្រប់គ្រាន់ក្នុងការនាំផលិតផលរបស់ខ្លួនទៅកាន់ទីផ្សារ។

លោកបន្ថែថា បច្ចុប្បន្ន យន្តការលម្អិតនៃការអនុវត្តនេះ កំពុងស្ថិតក្នុងការប្រជុំពិភាក្សា ដើម្បីរៀបចំឱ្យបានល្អិតល្អន់ ក្នុងគោលបំណងធានាទាំងល្បឿននៃការចូលទីផ្សារ និងគុណភាពផលិតផលសម្រាប់ជាប្រយោជន៍ដល់អ្នកប្រើប្រាស់។

សូមជម្រាបថា ការសម្រួលនីតិវិធីនេះនៃការចុះបញ្ជីនេះ គឺស្របតាមការប្តេជ្ញាចិត្តរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលបានលើកឡើងពីការជំរុញការងារនេះដោយផ្ទាល់​ បន្ទាប់ពីសម្តេចមើលឃើញបញ្ហាប្រឈមជាច្រើន ជាពិសេសការចុះបញ្ជីសហគ្រាសខ្នាតតូច និងមធ្យម នៅតែស្មុគស្មាញ មិន​លឿន​រហ័ស។​

សម្តេចមានប្រសាសន៍ថា ការចុះបញ្ជីសហគ្រាសខ្នាតតូច និង​មធ្យម​នេះ មិនត្រូវ​ឱ្យសហគ្រិន​សុំ​ច្បាប់​ក្រសួង ស្ថាប័នច្រើនកន្លែង​ដូចពី​មុនឡើយ។ ក្រសួង ស្ថាប័នពាក់​ព័ន្ធ​ត្រូវ​ធ្វើការជាមួយគ្នា ដើម្បីសម្រួល​នីតិវិធី​ទាំងអស់ជូនអ្នកស្នើសុំចុះបញ្ជី ហើយត្រូវការពារផលប្រយោជន៍របស់ពួកគេ តាមរយៈការប្រយុទ្ធប្រឆាំង​ផលិត​ផល​ក្លែងក្លាយឱ្យមានប្រសិទ្ធភាព។

សម្តេចមហាបវរធិបតី បានលើកឡើងថា មិនត្រូវឱ្យម្ចាស់សហគ្រាស ម្ចាស់​អាជីវកម្ម កាន់ឯកសារដើរច្រើនកន្លែងនោះទេ ត្រូវរៀបចំប្រព័ន្ធបច្ចេក​វិទ្យាចុះបញ្ជីកាន់ឯកសារទៅតែមួយកន្លែង ហើយឯកសាររត់ទៅគ្រប់ក្រសួង ស្ថាប័ន៕