(ភ្នំពេញ)៖ ដើម្បីជំរុញកាហ្វេខ្មែរឱ្យកាន់តែល្បីល្បាញ និងឈានទៅកាន់ទីផ្សារអន្តរជាតិ ក្រុមហ៊ុន គិរីកាហ្វេ (Kiri Coffee) បានរៀបចំជំនួបពិភាក្សាការងារយ៉ាងសំខាន់មួយ ជាមួយលោក Vithya Taing នាយកប្រតិបត្តិនៃក្រុមហ៊ុន GOLD STAR TRADING SWISS B.I.G GmbH មកពីប្រទេសស្វ៊ីស។ ជំនួបនេះធ្វើឡើងក្នុងគោលបំណងពង្រឹងកិច្ចសហប្រតិបត្តិការ ដើម្បីនាំចេញគ្រាប់កាហ្វេគុណភាពខ្ពស់របស់ គិរីកាហ្វេ ទៅកាន់ទីផ្សារធំៗនៅតំបន់អឺរ៉ុប រួមមានប្រទេសស្វ៊ីស និងប្រទេសអ៊ីតាលី។

ក្នុងឱកាសដ៏ពិសេសនោះ តំណាងក្រុមហ៊ុនមកពីប្រទេសស្វ៊ីស ក៏បានចុះទស្សនកិច្ចផ្ទាល់ដល់ទីតាំងរោងចក្ររបស់ គិរីកាហ្វេ ដែលកំពុងដំណើរការសាងសង់ និងត្រៀមបំពាក់ម៉ាស៊ីនទំនើបៗ។ មិនតែប៉ុណ្ណោះ លោក Vithya Taing ក៏បានចូលរួមតេស្តរសជាតិកាហ្វេដោយផ្ទាល់ផងដែរ។ ក្រោយពីបានភ្លក់រសជាតិ លោកបានសម្តែងនូវការកោតសរសើរយ៉ាងខ្លាំង ចំពោះក្លិនឈ្ងុយ និងរសជាតិដ៏ពិសេសនៃគ្រាប់កាហ្វេខ្មែរ ដែលបង្ហាញពីសក្ដានុពលដ៏ធំធេងរបស់កាហ្វេកម្ពុជា។

កិច្ចសហប្រតិបត្តិការនេះ គឺជាជំហានដ៏សំខាន់មួយរបស់ គិរីកាហ្វេ ក្នុងការនាំយករសជាតិកាហ្វេខ្មែរដ៏មានគុណភាពទៅកាន់ពិភពលោក។ ជាមួយគ្នានេះ វាក៏រួមចំណែកយ៉ាងសកម្មក្នុងការលើកកម្ពស់ជីវភាពកសិករក្នុងស្រុក ដែលជាអ្នកដាំដុះកាហ្វេ ព្រមទាំងបង្ហាញពីកិត្តិនាមផលិតផលកសិកម្មរបស់កម្ពុជាលើឆាកអន្តរជាតិផងដែរ។