(ភ្នំពេញ)៖ លោក ច័ន្ទ សុផល នាយកមជ្ឈមណ្ឌលសិក្សាគោលនយោបាយ បានប្រាប់អំពីមូលហេតុធំៗជាច្រើន ដែលតម្លៃជីនៅក្នុងប្រទេសកម្ពុជា មានតម្លៃរាងខ្ពស់ជាបណ្ដាប្រទេសជិតខាង កត្តាសំខាន់ៗដែលនាំឲ្យឡើងថ្លៃ គឺការនាំចូលរបស់យើងមានតិចជាង ដែលនាំឲ្យតម្លៃដឹកជញ្ជូនខ្ពស់។

ការលើកឡើងរបស់លោក ច័ន្ទ សុផល ធ្វើឡើងក្នុងកម្មវិធី FRESH BUSINESS: កិច្ចពិភាក្សាលើប្រធានបទ៖ «ថ្លៃដើម និងការប្រកួត​ប្រជែង​ក្នុងវិស័យកសិកម្មកម្ពុជា»។

លោក ច័ន្ទ សុផល បានថ្លែងឲ្យដឹងថា តម្លៃជីខ្ពស់ដោយសារជីខ្លះជាជីនាំចូល ជីខ្លះយើងមិនមានរោងចក្រផលិតដោយខ្លួនឯងឡើយ។ កត្តាដែលនាំឲ្យជីឡើងថ្លៃខ្ពស់ទៀត នោះគឺការនាំចូលតិចៗ ការនាំចូលតិចតម្លៃខ្ពស់ជាងការនាំចូលច្រើន និងត្រូវការសុំការអនុញ្ញាតជាច្រើនក្នុងការនាំចូល ដែលត្រូវចំណាយថវិកាមួយតង់ទៀតលើបញ្ហាទាំងនេះ ដូច្នេះទើបធ្វើឲ្យតម្លៃជីនៅកម្ពុជាថ្លៃជាងបណ្ដាប្រទេសជិតខាង។

លោកបានបន្ថែមថា ក្នុងនោះអ្នកលក់រាយក៏តម្លើងថ្លៃខ្ពស់ទៀត ព្រោះការទិញជីយកទៅដាក់ដំណាំគឺមិនបានទូទាត់លុយភ្លាមៗនោះទេ។ ដើម្បីទិញជីមានតម្លៃធូរ គឺត្រូវតែទិញរួមគ្នាក្នុងបរិមាណច្រើន ព្រមទាំងមានប្រាក់កម្ចីពីធនាគារ ដែលមិនយកការប្រាក់ខ្ពស់ពេក៕

សូមស្តាប់ការលើកឡើងរបស់លោក ច័ន្ទ សុផល៖