(ភ្នំពេញ)៖ លោកស្រី ប៊ុត ប៊ុនសីហា អនុប្រធាននាយកប្រតិបត្តិធនាគារអេស៊ីលីដា បានថ្លែងឲ្យដឹង ចំពោះធនាគារអេស៊ីលីដា មិនដែលឱ្យបុគ្គលិករបស់ខ្លួនទូរស័ព្ទ ទៅកាន់អតិថិជនឱ្យដកសាច់ប្រាក់ចេញពីគណនី ឬធ្វើបច្ចុប្បន្នភាពប្រព័ន្ធប្រត្តិបត្តិការនោះទេ ប្រសិនបើមានអាចនេះជាករណីបោកប្រាស់។

ការលើកឡើងរបស់លោកស្រីធ្វើឡើងក្នុងកម្មវិធី CYBER SECURITY: កម្មវិធី «ជជែកអំពីសន្តិសុខសាយប័រ» លើប្រធានបទ៖ «វិធានកា​រទប់ស្កាត់របស់អាជ្ញាធរមានសមត្ថកិច្ច ចំពោះការ​ឆបោក​បន្លំខ្លួន​ជា​បុគ្គលិក​ធនាគារ​»។

លោកស្រី ប៊ុត ប៊ុនសីហា បានថ្លែងថា កន្លងទៅយើងធ្លាប់បានឃើញជាក់ស្ដែងថា មានជនបោកប្រាស់អ្នកខលមកតែងតែរំលឹកឲ្យអតិថិជន ដកសាច់ប្រាក់ចេញពីគណនី ឬធ្វើបច្ចុប្បន្នភាពប្រព័ន្ធប្រត្តិបត្តិការជាដើម។ ក្នុងករណីនេះ សូមជម្រាបថា បុគ្គលិកធនាគារមិនមានលក្ខខណ្ឌណាមួយ ខលទៅកាន់អតិថិជន ដើម្បីដកប្រាក់ចេញពីគណនី ធ្វើបច្ចុប្បន្នភាពនោះឡើយ។

លោកស្រីបានបន្ដថា ចំពោះប្រព័ន្ធរបស់ធនាគារ ប្រសិនបើត្រូវការធ្វើអ្វីមួយ គឺគ្រាន់តែ Update នៅ App ប៉ុណ្ណោះ ដោយមិនត្រូវការបុគ្គលិកធនាគារខលប្រាប់នោះទេ។ កន្លងមកខាងវិស័យធនាគារតែងតែជូនដំណឹងទៅដល់អតិថិជនជាច្រើន ក្នុងនោះក៏បញ្ជាក់ថា វិស័យធនាគារមិនមានបុគ្គលិកខលទៅកាន់អតិថិជន ដើម្បីធ្វើអ្វីមួយឡើយ។

លោកស្រីបានបញ្ជាក់ថា សូមជម្រាបជូនដំណឹងដល់សាធារណជន ពិសេសអតិថិជនរបស់ធនាគារអេស៊ីលីដា ​ប្រសិនបើជួបក្នុងករណីដូចបានរៀបរាប់ខាងលើនេះ សូមមេត្តាកុំធ្វើទៅតាមអ្វីដែលជូនបោកប្រាស់ប្រាប់ឲ្យសោះ ឬត្រូវផ្ដល់លេខសំងាត់ ព័ត៌មានផ្ទាល់ខ្លួនទៅកាន់ជនបោកប្រាស់ដែលខលមកនេះឡើយ៕

សូមស្តាប់ការលើកឡើងរបស់លោកស្រី ប៊ុត ប៊ុនសីហា៖