(ភ្នំពេញ)៖ លោកឧត្តមសេនីយ៍ទោ ហេង សំណាង អនុប្រធាននាយកដ្ឋានប្រឆាំងបទល្មើសបច្ចេកវិទ្យា បានថ្លែងឲ្យដឹង បើទោះបីជាមានការជូនដំណឹងជារឿយៗ ក្រើនរំលឹកឲ្យប្រុងប្រយ័ត្ន អំពីបញ្ហានៃការឆបោក ឬការខលបោកប្រាស់ពីជនបោកប្រាស់យ៉ាងណាក្ដី យើងក៏ឃើញថា នៅតែមានអតិថិជនមួយចំនួនតូចត្រូវបានចាញ់បោក។
ប្រសិនបើប្រជាពលរដ្ឋធ្លាក់ខ្លួនចាញ់បោកជនល្មើស លួចយកគណនីធនាគារ យើងត្រូវផ្ដល់ព័ត៌មានទៅកាន់ធនាគារដោយផ្ទាល់ ដើម្បីធនាគារដោះស្រាយអំពីបញ្ហាទាំងនេះភ្លាមៗ។

ការលើកឡើងរបស់លោកឧត្តមសេនីយ៍ទោ ហេង សំណាង ធ្វើឡើងក្នុងកម្មវិធី CYBER SECURITY: កម្មវិធី «ជជែកអំពីសន្តិសុខសាយប័រ» លើប្រធានបទ៖ «វិធានកា​រទប់ស្កាត់របស់អាជ្ញាធរមានសមត្ថកិច្ច ចំពោះការ​ឆបោក​បន្លំខ្លួន​ជា​បុគ្គលិក​ធនាគារ​»។

លោកឧត្តមសេនីយ៍ទោ ហេង សំណាង បានថ្លែងថា «ក្នុងករណីពលរដ្ឋត្រូវបានចាញ់បោកជនបោកប្រាស់ និងត្រូវបានជនបោកប្រាស់គ្រប់គ្រងគណនី កត្តាដែលត្រូវធ្វើគឺ ត្រូវផ្ដល់ព័ត៌មានទៅកាន់ធនាគារដោយផ្ទាល់, ត្រូវរួសរាន់មកដាក់ពាក្យបណ្ដឹង នៅអាជ្ញាធរមូលដ្ឋានដែលនៅជិតបំផុត។ ចំពោះការដាក់ពាក្យបណ្ដឹង គឺត្រូវធ្វើដោយផ្ទាល់ ដោយភាគីរងគ្រោះត្រូវទៅដោយផ្ទាល់ដាក់បណ្ដឹង ជាមួយអាជ្ញាធរដែលនៅជិតខ្លួន»។

លោកស្រី ប៊ុត ប៊ុនសីហា អនុប្រធាននាយកប្រតិបត្តិធនាគារអេស៊ីលីដា បានថ្លែងថា ដូចគ្នាចំពោះខាងធនាគារនៅពេលទទួលបានបណ្ដឹងបែបនេះ ពីអតិថិជន គឺត្រូវជួយដល់អតិថិជន តាមរយៈការផ្ដល់ដំណឹងឲ្យទៅប្ដឹងដល់អាជ្ញាធរដែលនៅជិតខ្លួន និងជួយសម្រួលរាល់កិច្ចការផ្សេងៗតាមដែលអាចធ្វើទៅបាន៕

សូមស្តាប់ការលើកឡើងរបស់ឧត្តមសេនីយ៍ទោ ហេង សំណាង និងលោកស្រី ប៊ុត ប៊ុនសីហា៖