(ព្រះសីហនុ)៖ លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា (ន.ម.ក.) បានលើកឡើងថា មិនមានលុយណា ធ្លាក់ពីលើមេឃនោះទេ, ខណៈការសន្យាផ្តល់ផលចំណេញខ្ពស់ខុសពីធម្មតា ដោយមិនបាច់ធ្វើអ្វីសោះនោះ​ គឺជាការឆបោក (Scam)។

ការលើកឡើងបែបនេះ ធ្វើឡើងក្នុងឱកាសដែល លោក ស៊ូ សុជាតិ អញ្ជើញចូលរួមក្នុងសិក្ខាសាលា ផ្សព្វផ្សាយស្តីពី «ការគាំពារវិនិយោគិន និងការពង្រឹងការអនុវត្តច្បាប់ ក្នុងវិស័យមូលបត្រ» នៅខេត្តព្រះសីហនុ នៅថ្ងៃទី០៣ ខែសីហា ឆ្នាំ២០២៦។

លោក ស៊ូ សុជាតិ បានផ្ញើជាសារដាស់តឿនថា «មិនមានលុយណាធ្លាក់ពីលើមេឃនោះទេ! ការវិនិយោគពិតប្រាកដ ត្រូវតែផ្អែកលើ សកម្មភាពអាជីវកម្មច្បាស់លាស់ និងមានលទ្ធផលជាក់ស្តែង។ ក៏ប៉ុន្តែការអូសទាញ ជាមួយនឹងការសន្យាផ្តល់ ផលចំណេញ ឬការប្រាក់ខ្ពស់ខុសពីធម្មតា ដោយមិនបាច់ធ្វើអ្វីសោះនោះ គឺជាការឆបោក (Scam) យ៉ាងពិត ប្រាកដ»។

លោក ស៊ូ សុជាតិ បន្ថែមថា ជាការប្រុងប្រយ័ត្នសាធារណជន ត្រូវវិនិយោគតែជាមួយក្រុមហ៊ុន ដែលបានចុះបញ្ជី និងមានអាជ្ញាបណ្ណ ឬការអនុញ្ញាតត្រឹមត្រូវ ពីនិយ័តករមូលបត្រកម្ពុជា ប៉ុណ្ណោះ។

លោក ស៊ូ សុជាតិ បានប្រាប់ឲ្យវិនិយោគជាមួយតែក្រុមហ៊ុនណា​ ដែលមានអាជ្ញាបណ្ណ ឬការអនុញ្ញាតនិងវិនិយោគលើឧបករណ៍ហិរញ្ញវត្ថុ ដែលបានចុះបញ្ជីត្រឹមត្រូវតាមច្បាប់ជាធរមាន ព្រមទាំង រួមគ្នាចាត់វិធានការផ្លូវច្បាប់ឱ្យទាន់ពេលវេលា ដើម្បីទប់ស្កាត់ការកៀរគរ និងការប្រមូលមូលនិធិពីសាធារណ ជនក្រោមរូបភាពវិនិយោគផ្សេងៗ ដោយសន្យាផ្តល់ប្រាក់ចំណេញ ឬការប្រាក់ខ្ពស់ ដែលជាសកម្មភាពខុស ច្បាប់នាំឱ្យប៉ះពាល់ដល់ទ្រព្យសម្បត្តិប្រជាពលរដ្ឋ និងសេដ្ឋកិច្ចជាតិផងដែរ។

ជាមួយគ្នានេះ លោកក៏បានអំពាវនាវដល់សាធារណជន ដែលមានគណនីតេឡេក្រាមពិតប្រាកដរបស់ខ្លួន នៅក្នុងក្រុមតេឡេក្រាមទាំងឡាយណា ដែលផ្សព្វផ្សាយទាក់ទាញសាធារណជន ឱ្យដាក់ប្រាក់វិនិយោគដែលមិនមែនជា ការវិនិយោគស្របច្បាប់ និងមិនមានអាជ្ញាបណ្ណត្រឹមត្រូវ ឬសន្យាផ្តល់ប្រាក់ចំណេញត្រឡប់មកវិញច្រើនខុស ពីធម្មតា សូមរួសរាន់ចាកចេញ (Leave) ពីក្រុមតេឡេក្រាមទាំងនោះជាបន្ទាន់ ដើម្បីចៀសវាងការចាញ់បោក ឬមានការពាក់ព័ន្ធ។

លោក ស៊ូ សុជាតិ បានគូសបញ្ជាក់ថា ក្នុងករណីចាំបាច់ អាជ្ញាធរនឹងចាត់វិធានការផ្សព្វផ្សាយបញ្ជីឈ្មោះគណនីតេឡេក្រាម ដែលនៅបន្តជាសមាជិក មិនបានចាកចេញពីក្រុមតេឡេក្រាមទុច្ចរិតទាំងនោះ៕