(ភ្នំពេញ)៖ នៅរយៈពេល៧ខែ ឆ្នាំ២០២៦ ពោលចាប់ពីខែមករា ដល់ខែកក្កដា អ្នកដំណើរចេញចូលក្នុងប្រទេសកម្ពុជា តាមផ្លូវអាកាសមានជាង ៣លាននាក់ ធ្លាក់ចុះ ៩% បើធៀបនឹងរយៈពេលដូចគ្នានៅឆ្នាំ២០២៥ តែការដឹកជញ្ជូនទំនិញកើនឡើង ២១%។ នេះបើតាមការបញ្ជាក់ឲ្យដឹងពីលោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរស៊ីវិល។

លោក ស៊ីន ចាន់សិរីវុត្ថា បានបញ្ជាក់ថា ក្នុងរយៈពេល៧ខែ ឆ្នាំ២០២៦ នេះ អាកាសយានដ្ឋានអន្តរជាតិទាំង៣ រួមមាន តេជោ (KTI) សៀមរាបអង្គរ (SAI) និងព្រះសីហនុ (KOS) បានទទួលជើងហោះហើរចេញ-ចូលសរុបជាង ៣ម៉ឺនជើង (៣៧,២៤៨ ជើង) ដែលថយចុះ ១%។ ចំណែកអ្នកដំណើរចេញ-ចូលសរុបមានចំនួន ៣,៧១២,៦៣៩ នាក់ ធ្លាក់ចុះ ៩%។

ទោះជាយ៉ាងណា ការដឹកជញ្ជូនទំនិញតាមផ្លូវអាកាសចេញ-ចូល មានចំនួនជាង ៥៧ពាន់តោន (៥៧,១០២ តោន) កើនឡើង ២១% និងជើងហោះហើររំលងមានចំនួនជាង ៥ម៉ឺនជើង (៥៣,២១៣ ជើង) កើនឡើង ៥%។

បើតាមលោក ស៊ិន ចាន់សិរីវុត្ថា, គិតត្រឹមថ្ងៃទី២៧ ខែកក្កដា ដល់ថ្ងៃទី០២ ខែសីហា ឆ្នាំ២០២៦ កម្ពុជាមានក្រុមហ៊ុនអាកាសចរណ៍ចំនួន ៣៣ កំពុងប្រតិបត្តិការ (ជាតិ ៤ និងអន្តរជាតិ ២៩)។

ជើងហោះហើរចេញ-ចូលជាមធ្យមក្នុងមួយសប្តាហ៍ នៅអាកាសយានដ្ឋានអន្តរជាតិតេជោមាន ៧៩២ ជើង, អាកាសយានដ្ឋានអន្តរជាតិសៀមរាបអង្គរមាន ២៦០ ជើង, អាកាសយានដ្ឋានអន្តរជាតិព្រះសីហនុមាន ៦៨ជើង និងអាកាសយានដ្ឋានតារាសាគរមាន ៤ ជើង។ សរុបជើងហោះហើរចេញ-ចូលនៃអាកាសយានដ្ឋានទាំងបួនមានចំនួន ១,១២៤ ជើងក្នុងមួយសប្តាហ៍៕