(ភ្នំពេញ)៖ លោក តែ ហ្សឺឌី ប្រធាននាយកដ្ឋានសវកម្មសហគ្រាស នៃអគ្គនាយកដ្ឋានពន្ធដារ បានលើកឡើងថា សូមមេត្តាឈប់យល់ច្រឡំថា ការចុះធ្វើសវនកម្មជាការចុះទៅអារ.ក ម្ចាស់អាជីវកម្ម គឺមិនមែននោះទេ រាល់មន្រ្ដីដែលបានចុះទៅដល់ទីតាំង គឺជាមន្រ្ដីដែលជំនាញដែលអគ្គនាយកដ្ឋានពន្ធដារបញ្ជូនទៅប៉ុណ្ណោះ។

លើកឡើងរបស់លោក តែ ហ្សឺឌី ធ្វើឡើងក្នុងកម្មវិធីពន្ធដារកម្ពុជាស្ដីពី កាតព្វកិច្ចសារពើពន្ធ និងសវនកម្មពន្ធដារ ដែលរៀបចំឡើងដោយអគ្គនាយកដ្ឋានពន្ធដារ។

លោក តែ ហ្សឺឌី បានថ្លែងឲ្យដឹងថា ការចុះធ្វើសវនកម្ម គឺជាការអប់រំ ដល់ទីតាំងសហគ្រាស ដូច្នេះសូមអ្នកជាប់ពន្ធទាំងអស់ ពិសេសម្ចាស់សហគ្រាស សូមមេត្តាកុំយល់ច្រឡំថា ការចុះដល់ទីតាំងសុទ្ធតែការចុះទៅចាប់ទោសឲ្យសោះ ឬអ្នកខ្លះនិយាយថា ជាការចុះទៅអារ ក ទៅទៀត ដូច្នេះសូមជ្រាបថា ការចុះដល់ទីតាំងរបស់មន្រ្ដី គឺជាសេវាមួយដែលរដ្ឋបាលសារពើពន្ធ បានបញ្ជូនមន្រ្ដីដែលជាសាវនករជំនាញចុះដល់ទីតាំង។

លោកបានបន្ដថា ចំពោះការចុះដល់ទីតាំងនេះ អាចជាឱកាសផងដែរសម្រាប់ម្ចាស់សហគ្រាស ព្រោះមន្រ្ដីទាំងអស់នឹងជួយពិនិត្យរាល់ការកត់ត្រានានា របស់បុគ្គលិកសហគ្រាសទាំងអស់ថា តើការកត់ត្រាត្រឹមត្រូវតាមជំនាញច្បាប់ឬទេ ប្រសិនជាមិនត្រឹមត្រូវទេ ត្រូវកែតម្រូវបែបណាទើបត្រឹមត្រូវជាដើម ដោយឡែកចំពោះការចុះរបស់មន្រ្ដីទៀតសោត គឺជាការចុះជួយដោយមិនគិតកម្រៃនោះទេ។

លោកបានបញ្ជាក់ថា កត្តាសំខាន់នៃការចុះរបស់មន្រ្ដី គឺបានធានាដល់ម្ចាស់សហគ្រាសយ៉ាងច្បាស់ថា ការធ្វើកន្លងមករបស់ម្ចាស់សហគ្រាសសុទ្ធតែត្រឹមត្រូវតាមច្បាប់ តាមបទប្បញ្ញតិពន្ធដារជាធរមាន។ មួយទៀតគឺធានាបានភាពត្រឹមត្រូវនៃការកាន់កាប់បញ្ជីការគណនី ក្នុងកតព្វកិច្ចសារពើពន្ធ ដូច្នេះការចុះផ្ទាល់ដល់ទីតាំងនេះ ជាការជជែកវែកញែកគ្នាយ៉ាងច្បាស់ពីសំណាក់មន្រ្ដី និងម្ចាស់សហគ្រាស។

លោក តែ ហ្សឺឌី បានថ្លែងឲ្យដឹងថា កត្តាសំខាន់នោះ គឺធានាបានតម្លាភាព និងសមធម៌នៃការបង់ពន្ធ ដូច្នេះសូមម្ចាស់សហគ្រាសទាំងអស់ មេត្តាកុំខ្លាចឲ្យសោះ ចំពោះការចុះដល់ទីតាំងរបស់មន្រ្ដីពន្ធដារយើង៕