(ភ្នំពេញ)៖ ប្រទេសអូស្ត្រាលី​ អះអាងបន្តជួយកម្ពុជា ក្នុងការពង្រឹងសក្តានុពលនៃការកែច្នៃគ្រាប់ស្វាយចន្ទី ​ក្នុងស្រុកឱ្យប្រសើរឡើង ដោយវិស័យនេះ ជាវិស័យដ៏សំខាន់មួយ ក្នុងការជំរុញកំណើនសេដ្ឋកិច្ច និងបង្កើតការងារ។

ស្ថានទូតអូស្រ្តាលីប្រចាំនៅកម្ពុជាបានឱ្យដឹងថា បច្ចុប្បន្ននេះ កម្ពុជាជាប្រទេសផលិតគ្រាប់ស្វាយចន្ទីឆៅធំជាងគេលំដាប់ទីពីរ លើពិភពលោក ប៉ុន្តែមានតែប្រមាណ ៥ ភាគរយប៉ុណ្ណោះនៃទិន្នផលសរុប ដែលត្រូវបានកែច្នៃនៅក្នុងប្រទេស។ ការខ្វះខាតសមត្ថភាពកែច្នៃក្នុងស្រុកនេះ បានធ្វើឱ្យកម្ពុជាបាត់បង់ចំណូលសក្តានុពលជាង ១២៥ លានដុល្លារអាមេរិកក្នុងមួយឆ្នាំ ខណៈដែលកសិករ និងពាណិជ្ជករនៅតែប្រឈមនឹងហានិភ័យពីការប្រែប្រួលតម្លៃទីផ្សារ។

ដើម្បីដោះស្រាយបញ្ហានេះ អូស្ត្រាលីកំពុងសហការជាមួយក្រុមហ៊ុន Olam Food Ingredients (ofi) ដែលជាក្រុមហ៊ុនកសិពាណិជ្ជកម្មសកល មានចំណែកពី ២០ ទៅ ២៥ ភាគរយនៃទីផ្សារគ្រាប់ស្វាយចន្ទីពិភពលោក។ កិច្ចសហការនេះមានគោលបំណងបង្កើនសមត្ថភាពកែច្នៃគ្រាប់ស្វាយចន្ទីចំនួន ៨០ តោនក្នុងមួយថ្ងៃ និងជំរុញការវិនិយោគរហូតដល់ ១០ លានដុល្លារអាមេរិកក្នុងវិស័យកែច្នៃគ្រាប់ស្វាយចន្ទីនៅកម្ពុជា។

យោងតាមទិន្នន័យក្រៅផ្លូវការពីសមាគមស្វាយចន្ទីកម្ពុជា ក្នុងឆមាសទី១ ឆ្នាំ២០២៦ កម្ពុជាបាននាំចេញគ្រាប់ស្វាយចន្ទីឆៅប្រមាណ ១ ០៣០ ០០០ តោន ទៅកាន់ប្រទេសវៀតណាម ដែលផ្តល់ចំណូលបានប្រមាណ ១ ៧៥១ លានដុល្លារអាមេរិក កើនឡើង ២៨.៩% បើធៀបនឹងរយៈពេលដូចគ្នាកាលពីឆ្នាំមុន។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ថា ដោយសារតម្លៃគ្រាប់ស្វាយចន្ទីឆៅល្អប្រសើរជាងរាល់ឆ្នាំ ទើបនាំឱ្យពាណិជ្ជករបង្ខំចិត្តលក់គ្រាប់ឆៅទៅក្រៅប្រទេស ធ្វើឱ្យបរិមាណគ្រាប់សម្រាប់បម្រើដល់ការកែច្នៃក្នុងស្រុកមានតិចតួច ស្របពេលដែលលទ្ធភាពនៃការកែច្នៃក្នុងស្រុកនៅមានកម្រិត។ បើតាម លោក អួន ស៊ីឡុត តម្លៃស្វាយចន្ទី​ ក្នុងខែកក្កដាឆ្នាំនេះ ​មានតម្លៃ ៨ ២០០រៀ0លក្នុងមួយគីឡូក្រាម ខណៈកាលពីឆ្នាំ២០២៥ មានតម្លៃត្រឹមតែ ៧ ៥០០រៀលប៉ុណ្ណោះ៕