(ភ្នំពេញ)៖ លោក ហេង កូយ នាយកមជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ បានសង្កត់ធ្ងន់ថា ការដោះស្រាយបញ្ហាដែលកើតមានឡើងរវាងអតិថិជន និងស្ថាប័នធនាគារឱ្យមានប្រសិទ្ធភាពខ្ពស់ ទាមទារឱ្យភាគីទាំងពីរមានឆន្ទៈ និងអង្គុយជជែកគ្នាដោយភាពស្មោះត្រង់។

លោកបានពន្យល់ថា នៅពេលមានបញ្ហា អតិថិជនតែងតែសង្ឃឹមថានឹងទទួលបានដំណោះស្រាយភ្លាមៗ ប៉ុន្តែការពិតគឺការដោះស្រាយវិវាទទាមទារឱ្យភាគីទាំងសងខាងមានសុឆន្ទៈក្នុងការរកដំណោះស្រាយរួមគ្នា។ ដូច្នេះ ភាគីអតិថិជន និងភាគីធនាគារ ត្រូវមានភាពស្មោះត្រង់ និងត្រៀមផ្តល់ជម្រើសដំណោះស្រាយ។ គ្រឹះស្ថានធនាគារត្រូវសិក្សាពីបញ្ហា និងផ្តល់ជម្រើសដំណោះស្រាយសមស្រប ខណៈអតិថិជនក៏ត្រូវចូលរួមសហការផ្តល់ព័ត៌មានបន្ថែម និងមានឆន្ទៈក្នុងការដោះស្រាយ។

ប្រសិនបើភាគីទាំងសងខាងយល់ពីគោលការណ៍សម្រុះសម្រួលនេះ ប្រសិទ្ធភាពនៃការដោះស្រាយនឹងមានខ្ពស់។ ផ្ទុយទៅវិញ ប្រសិនបើអតិថិជនមិនចូលរួមសហការ មិនផ្តល់ព័ត៌មានច្បាស់លាស់ ឬមិនអាចទាក់ទងបាន នោះនីតិវិធីដោះស្រាយក៏មិនអាចបន្តទៅមុខបានដែរ។

លោកលើកឡើងបែបនេះ នៅក្នុងកម្មវិធី FRESH BUSINESS ពិភាក្សា ស្តីពី «យន្តការ ពង្រឹងលើការការពារអ្នកប្រើប្រាស់ ក្នុង វិស័យហិរញ្ញវត្ថុនៅកម្ពុជា»៕

សូមស្តាប់ការលើកឡើងរបស់លោក ហេង កូយ៖