(ភ្នំពេញ)៖ លោក ហេង កូយ នាយកមជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ បានបញ្ជាក់ពីតួនាទីដ៏សំខាន់របស់មជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ ក្នុងការពង្រឹងកិច្ចការពារបន្ថែមដល់អ្នកប្រើប្រាស់សេវាហិរញ្ញវត្ថុនៅកម្ពុជា តាមរយៈការផ្ដល់ចំណេះដឹង និងជួយដោះស្រាយវិវាទនានាប្រកបដោយប្រសិទ្ធភាព និងឆាប់រហ័ស។

លោក ហេង កូយ បានបន្តថា មជ្ឈមណ្ឌលនេះដើរតួនាទីយ៉ាងសំខាន់ក្នុងការអប់រំ និងផ្ដល់ប្រឹក្សាដល់សាធារណជន ឲ្យយល់ដឹងពីរបៀបជ្រើសរើសគ្រឹះស្ថានហិរញ្ញវត្ថុស្របច្បាប់ និងត្រៀមលក្ខណៈឲ្យបានប្រសើរមុននឹងប្រើប្រាស់សេវា។ ក្រៅពីនេះ មជ្ឈមណ្ឌលក៏ជាមធ្យោបាយបន្ថែមមួយទៀត សម្រាប់ជួយដោះស្រាយវិវាទដែលកើតមានឡើងរវាងអ្នកប្រើប្រាស់ និងគ្រឹះស្ថានហិរញ្ញវត្ថុ ឲ្យទទួលបានដំណោះស្រាយលឿន និងត្រឹមត្រូវ។

លោកបន្ថែមថា មជ្ឈមណ្ឌលការពារអ្នកប្រើប្រាស់សេវាហិរញ្ញវត្ថុ ប្រតិបត្តិការដោយប្រកាន់ខ្ជាប់នូវគោលការណ៍តម្លាភាព ឯករាជ្យភាព និងការរក្សាការសម្ងាត់ព័ត៌មានរបស់អតិថិជន។ អ្វីដែលសំខាន់នោះគឺ អ្នកប្រើប្រាស់សេវាទាំងអស់ មិនតម្រូវឲ្យបង់ថ្លៃសេវាអ្វីឡើយនៅពេលស្វែងរកជំនួយពីមជ្ឈមណ្ឌល។

លោកលើកឡើងបែបនេះ នៅក្នុងកម្មវិធី FRESH BUSINESS ពិភាក្សា ស្តីពី «យន្តការពង្រឹងលើការការពារអ្នកប្រើប្រាស់ក្នុងវិស័យហិរញ្ញវត្ថុនៅកម្ពុជា»។

សូមស្តាប់ការលើកឡើងបន្ថែមរបស់ លោក ហេង កូយ៖