វិស័យឯកជនស្នើឱ្យរាជរដ្ឋាភិបាលទប់ស្កាត់អំបិលនាំចូលពីក្រៅប្រទេស ដែលយកមកវេចខ្ចប់បន្លំជាផលិតផលខ្មែរ (Video inside)
07-08-2026 16:13
(ភ្នំពេញ)៖ វិស័យឯកជនបានសម្តែងការព្រួយបារម្ភយ៉ាងខ្លាំង ចំពោះការនាំចូលអំបិលពីបរទេស ប៉ុន្តែយកមកវេចខ្ចប់ជាថ្មី ដោយប្រើប្រាស់ស្លាកសញ្ញា និងអក្សរខ្មែរ ព្រមទាំងបញ្ជាក់ថា ជាផលិតផលផលិតនៅប្រទេសកម្ពុជា។ ទង្វើនេះបានបង្កឱ្យមានការភាន់ច្រឡំដល់អ្នកប្រើប្រាស់ និងប៉ះពាល់យ៉ាងធ្ងន់ធ្ងរដល់ខ្សែច្រវាក់ផលិតកម្មអំបិលក្នុងស្រុក ក៏ដូចជាជីវភាពរបស់ប្រជាកសិករអ្នកផលិតអំបិល។
លើកឡើងក្នុងកិច្ចប្រជុំផ្នែកកម្មន្តសាល សហគ្រាសធុនតូច និងមធ្យម និងសេវា ក្រុម «គ» នៃវេទិការាជរដ្ឋាភិបាល-ផ្នែកឯកជន នាថ្ងៃទី៦ ខែសីហា ឆ្នាំ២០២៦នេះ លោក ប៊ុន ណារិន ប្រធានសមាគមអ្នកផលិតម៉ាកសម្គាល់ភូមិសាស្ត្រទំនិញ អំបិលកំពត-កែប បានសម្តែងការព្រួយបារម្ភចំពោះបញ្ហាប្រឈមនានា ដែលកំពុងកើតមានលើវិស័យផលិតកម្មអំបិលធម្មជាតិនៅកម្ពុជា ជាពិសេសការប្រកួតប្រជែងមិនស្មោះត្រង់ ដោយលោកបានសង្កេតឃើញថា អំបិលមួយចំនួន ដែលនាំចូលពីបរទេស ត្រូវបានយកមកវេចខ្ចប់ដោយប្រើអក្សរខ្មែរ និងដាក់ថាជាផលិតផលខ្មែរ ដែរបង្កឱ្យអ្នកប្រើប្រាស់មានការភាន់ច្រឡំថាជាអំបិលខ្មែរ។
បើតាម លោកប៊ុន ណារិន បច្ចុប្បន្ននេះ ក្នុងចំណោមសិប្បកម្ម ឬសហគ្រាសកែច្នៃអំបិលចំនួន ១៥ មូលដ្ឋាន មានតែ ៣ មូលដ្ឋានប៉ុណ្ណោះដែលទិញអំបិលពីខេត្តកំពត និងខេត្តកែប ដើម្បីកែច្នៃ និងវេចខ្ចប់ ក្រៅពីនោះគឺពួកគេជាឈ្មួញដែលបាននាំចូលអំបិល ពីបរទេសទាំងអស់។
ឧកញ៉ាបណ្ឌិត ឈិន កេន អនុប្រធានក្រុមប្រឹក្សាភិបាល សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានស្នើឲ្យរដ្ឋាភិបាលពិចារណាអនុវត្តយន្តការកំណត់កូតានាំចូល ដូចបណ្ដាប្រទេសដទៃ ដើម្បីធានាថាផលិតផលក្នុងស្រុកអាចរក្សាបាននូវចំណែកទីផ្សាររបស់ខ្លួន។
បន្ថែមពីនេះ លោកក៏បានគូសបញ្ជាក់ថា ការបន្លំវេចខ្ចប់ ដាក់ស្លាកសញ្ញាថាជាផលិតផលក្នុងស្រុក មិនត្រឹមតែធ្វើឲ្យប៉ះពាល់ដល់កេរ្តិ៍ឈ្មោះផលិតផលខ្មែរប៉ុណ្ណោះទេ ថែមទាំងបង្កការខាតបង់ដល់អ្នកផលិតពិតប្រាកដទៀតផង។
លោកបានស្នើឲ្យមានកិច្ចសហការរវាងរដ្ឋាភិបាល និងឯកជន ដើម្បីចុះស្រាវជ្រាវរកទីតាំងដែលបន្លំ និងចាត់វិធានការណែនាំ ឬបង្ខំឲ្យរក្សាការវេចខ្ចប់ក្នុងទម្រង់ដើម។
ឆ្លើយតបនឹងសំណើរនេះ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងថា ក្រសួងកំពុងយកចិត្តទុកដាក់លើបញ្ហានេះ។ ដោយឡែក ពាក់ព័ន្ធនឹងការកំណត់កូតានាំចូល គឺទាមទារឱ្យមានការពិភាក្សាជាមួយក្រសួងពាក់ព័ន្ធជាច្រើនទៀតដូចជា ក្រសួងសេដ្ឋកិច្ចនិងហិរញ្ញវត្ថុ និងក្រសួងពាណិជ្ជកម្មជាដើម។
ជាមួយគ្នា លោកក៏បានសង្កត់ធ្ងន់លើសារៈសំខាន់នៃការអប់រំ និងផ្តល់ព័ត៌មានដល់អ្នកប្រើប្រាស់ផងដែរ ដើម្បីឱ្យពួកគេអាចធ្វើការសម្រេចចិត្តបានត្រឹមត្រូវ និងគាំទ្រផលិតផលក្នុងស្រុក។
លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានលើកឡើងថា ដល់ពេលហើយដែលកម្ពុជា ត្រូវគិតគូរជាយុទ្ធសាស្រ្ត ក្នុងការអភិវឌ្ឍវិស័យអំបិលក្នុងស្រុក ដើម្បីធានាបាននូវការផ្គត់ផ្គង់គ្រប់គ្រាន់ និងកាត់បន្ថយការពឹងផ្អែកលើការនាំចូលនាពេលអនាគត។
ជាមួយគ្នានេះ លោកបានបង្ហាញការមិនគាំទ្រចំពោះការនាំចូលអំបិលពីក្រៅប្រទេស យកមកខ្ចប់ជាផលិតផល ដែលបង្កផលប៉ះពាល់ដល់ឧស្សាហកម្មអំបិលក្នុងស្រុក និងកសិករផលិតអំបិល។
ដោយសារតម្លៃអំបិលក្នុងស្រុកទាប និងការប្រកួតប្រជែងជាមួយអំបិលនាំចូល បានធ្វើឱ្យកសិករផលិតអំបិលនៅកម្ពុជាថយចុះជាបន្តបន្ទាប់ ដោយកាលមុន មានចំនួន២០០ក្រុម ក្រោយមកបានថយចុះមក១៧០ក្រុម និងមកទល់ឆ្នាំ២០២៦នេះ បានថយមកជាង១៤០ក្រុមប៉ុណ្ណោះ។ នេះតាមការលើកឡើងរបស់ លោក ប៊ុន ណារិន។
លោក ប៊ុន ណារិន បានឱ្យដឹងផងដែរ ក្នុងមួយឆ្នាំៗ កម្ពុជាមានតម្រូវការអំបិលក្នុងរង្វង់៦ម៉ឺនទៅ៧ម៉ឺនតោន។ ក្នុងឆ្នាំ២០២៦នេះ ការផលិតអំបិលនៅកម្ពុជាមានបរិមាណ ៦ម៉ឺនទៅ៧ម៉ឺនតោន សមមូលនឹងតម្រូវការ។ តែយ៉ាងណា លោក ប៊ុន ណារិនសង្ឃឹមថា ការផលិតផលនៅដើមឆ្នាំក្រោយនឹងកើនឡើងជាងឆ្នាំនេះ ដោយសារបាតុភូតអែលនីណូ។
តាមព័ត៌មាន បានឲ្យដឹងថា ក្រុមឈ្មួញបាននាំចូលអំបិលពីប្រទេសឡាវ៕
