(សៀមរាប)៖ ក្រុមហ៊ុន Angkor International Airport Investment (Cambodia) Co., Ltd. (AIAI) ដែលអភិវឌ្ឍន៍អាកាសយានដ្ឋានសៀមរាប មានបំណងចង់ប្រែក្លាយទីតាំងអាកាសយានដ្ឋានចាស់ទំហំ ១៩៦.៣២ហិកតា ឱ្យទៅជាមជ្ឈមណ្ឌលពាណិជ្ជកម្ម វប្បធម៌ និងទេសចរណ៍ នាពេលរាត្រី។

គម្រោង «អច្ឆរិយៈអង្គរ - Miracle Angkor» នៅអាកាសយានដ្ឋានសៀមរាបចាស់នេះ រួមមាន៖ មជ្ឈមណ្ឌលពិព័រណ៍អន្តរជាតិ ១៧ ០០០ម៉ែត្រការ៉េ, សារមន្ទីរឌីជីថល និងការសម្តែងទេសចរណ៍ បៃតងឥតកាបូន) ដើម្បីប្រែក្លាយពីទេសចរណ៍ឆ្លងកាត់ (Transit) មកជាទេសចរណ៍ស្នាក់នៅ (Stayover) (បន្ថែមការស្នាក់នៅ ១-២ យប់)។

គម្រោងនេះ ត្រូវបានលើកឡើងនៅក្នុងជំនួបសម្តែងការគួរសម រវាងលោកបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល​ និង nលោក Lu Wei ប្រធានក្រុមប្រឹក្សាភិបាលក្រុមហ៊ុន AIAI នាថ្ងៃទី១២ ខែសីហា ឆ្នាំ២០២៦។ នេះបើតាមការបញ្ជាក់ឱ្យដឹងពីលោក ស៉ីន ចាន់សិរីវុត្ថា ប្រាប់បណ្តាញព័ត៌មាន Fresh News។

នៅក្នុងជំនួបនេះ ថ្នាក់ដឹកនាំរដ្ឋលេខាធិការដ្ឋានអាកាសចរណ៍ស៊ីវិល បានពិភាក្សាការងារ ជាមួយតំណាងក្រុមហ៊ុន AIAI និងភាគីដៃគូ (Yuntou Group) ក្នុងការជំរុញសក្តានុពលទេសចរណ៍ ខេត្តសៀមរាប និងពិនិត្យវឌ្ឍនភាពប្រតិបត្តិការជារួម។

តំណាងក្រុមហ៊ុន AIAI ជាមួយនឹងភាគីដៃគូ (Yuntou Group) ក៏បានរាយការណ៍អំពីសំណើគម្រោងក្នុងការអភិវឌ្ឍ និងធ្វើឱ្យប្រសើរឡើង ក្នុងការប្រើប្រាស់ទីតាំង អាកាសយានដ្ឋានសៀមរាបចាស់ ដែលមានឈ្មោះថា «អច្ឆរិយៈអង្គរ - Miracle Angkor» ស្របទៅតាមផែនការជាដំណាក់កាលៗ និងប្រើឱ្យអស់នូវសក្តានុពលដែលមាន។

សំណើគម្រោងការនេះនឹងត្រូវការសិក្សាវាយតម្លៃបន្ថែម ព្រមទាំងការសម្របសម្រួល ជាមួយអន្តរក្រសួង-ស្ថាប័នមានសមត្ថកិច្ច ដោយគោរពតាមច្បាប់ បទប្បញ្ញត្តិ សុវត្ថិភាពអាកាសចរណ៍ ការគ្រប់គ្រងដីធ្លី និងតម្រូវការការពារបេតិកភណ្ឌ។

គោលដៅរួមនៃគម្រោង គឺពង្រឹងការតភ្ជាប់ផ្លូវអាកាស ស្តារកំណើនអ្នកដំណើរ បង្កើនភាពទាក់ទាញរបស់សៀមរាប និងប្រែក្លាយការតភ្ជាប់អាកាសចរណ៍ ទៅជាកម្លាំងចលករមួយ សម្រាប់ទេសចរណ៍ ការវិនិយោគ និងកំណើនសេដ្ឋកិច្ចប្រកបដោយចីរភាព៕