(ភ្នំពេញ)៖ ឧកញ៉ាបណ្ឌិត ឈិន កេន អគ្គលេខាធិការសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានលើកទឹកចិត្ត​ដល់សហគ្រាសធុនតូច និងមធ្យម (SMEs) ឱ្យកាត់បន្ថយការប្រើប្រាស់សេវាកម្មអ្នករត់ការ​ក្នុងការចុះបញ្ជីអាជីវកម្ម ចុះបញ្ជីផលិតផល ឬស្នើសុំស្តង់ដារផលិតផលនានា​ ហើយងាកមកអនុវត្តនីតិវិធីទាំងនេះ ដោយផ្ទាល់ជាមួយស្ថាប័ន​ពាក់ព័ន្ធដោយខ្លួនឯង ​ដើម្បីកាត់បន្ថយការចំណាយ កាត់បន្ថយហានិភ័យ និងបញ្ហាប្រឈមនានា ដែលកើតឡើងពីការប្រើប្រាស់អ្នកអន្តរការី ឬអ្នក​ទី៣។

​ថ្លែងក្នុងឱកាសចូលរួមកិច្ចពិភាក្សាលើប្រធានបទ «ការពង្រឹងស្តង់ដារផលិតផល ដើម្បីរក្សាទីផ្សារក្នុងស្រុក និងនាំចេញទៅទីផ្សារអន្តរជាតិ​» ក្នុងកម្មវិធី FRESH BUSINESS ឧកញ៉ាបណ្ឌិត ឈិន កេន បានមើលឃើញថា កន្លងមក ម្ចាស់សហគ្រាសមួយចំនួនតែងតែប្រើប្រាស់អ្នករត់ការ ដោយពួកគាត់យល់ថា ងាយស្រួលជាងការធ្វើដោយខ្លួនឯងផ្ទាល់។ តែយ៉ាងនេះក្តី លោកលើកឡើង ការប្រើប្រាស់អ្នកអន្តរការី ឬអ្នក​ទី៣ បានបង្កឱ្យមានបញ្ហាជា​បញ្ហាមួយចំនួនដូចជា ការដាក់ឯកសារមិនពេញលេញ ការពន្យារពេលក្នុងការដំណើរការនីតិវិធី និងកង្វះតម្លាភាព ដែលធ្វើឱ្យម្ចាស់អាជីវកម្មមានការខកចិត្ត និងខាតបង់ពេលវេលា។ ជារឿយៗ ព័ត៌មានសំខាន់ៗអាចបាត់បង់នៅចន្លោះអ្នករត់ការ និងមន្ត្រីជំនាញ ដែលបណ្ដាលឱ្យការងាររាំងស្ទះ និងមិនអាចដោះស្រាយបញ្ហាបានទាន់ពេលវេលា។

ដូច្នេះហើយ លោកលើកទឹកចិត្តឱ្យ​ SMEs ងាកមកអនុវត្តនីតិវិធីទាំងនេះដោយខ្លួនឯងផ្ទាល់ ​តាមរយៈប្រព័ន្ធអនឡាញ ឬតាម FASMEC ដោយលោកអគ្គលេខាធិការបានសង្កត់ធ្ងន់ថា ការធ្វើផ្ទាល់ខ្លួន ឬតាមរយៈ​ FASMEC នឹងជួយឱ្យ SMEs ចំណេញពេលវេលា កាត់បន្ថយការចំណាយមិនចាំបាច់ និងធានាបាននូវភាពត្រឹមត្រូវនៃនីតិវិធី។

​លោកអគ្គលេខាធិការ​ផ្តល់យោបល់ដល់ម្ចាស់ SME គួររៀនប្រើប្រាស់បច្ចេកវិទ្យា​​ក្នុងការចុះបញ្ជី។ បើពួកគេមិនចង់ធ្វើដោយខ្លួនឯង អាចស្វែងរកជំនួយពីយន្តការរបស់ FASMEC ដែលមានក្រុមជំនាញត្រៀមជួយក្នុងការចុះបញ្ជីផ្សេងៗ ដើម្បីកាត់បន្ថយភាពស្មុគស្មាញ និងការឈឺក្បាល។ ​យន្តការទាំងនេះនឹងជួយឱ្យ SME ទទួលបានសេវាកម្មប្រកបដោយប្រសិទ្ធភាព តម្លាភាព និងឆាប់រហ័ស៕

សូមស្តាប់ការលើកឡើងរបស់ឧកញ៉ាបណ្ឌិត ឈិន កេន៖