(ភ្នំពេញ)៖ ក្នុងឆមាសទី១ នៃឆ្នាំ២០២៦ រាជរដ្ឋាភិបាលកម្ពុជា បានចុះកិច្ចព្រមព្រៀងហិរញ្ញប្បទានឥតសំណង និងឥណទានសម្បទានសរុបជាង ៤៧០លានដុល្លារអាម៉េរិក សម្រាប់អនុវត្តគម្រោង/កម្មវិធីអភិវឌ្ឍន៍ចំនួន១២។

នេះបើតាមរបាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ដែលចេញដោយក្រសួងសេដ្ឋកិច្ច និងហិរញ្ញវត្ថុ ដែលបណ្ដាញព័ត៌មាន Fresh News ទទួលបាននៅថ្ងៃទី១៨ ខែសីហា ឆ្នាំ២០២៦។

របាយការណ៍បានបញ្ជាក់ថា ក្នុងឆមាសទី១ នៃឆ្នាំ២០២៦ រាជរដ្ឋាភិបាលបានចុះកិច្ចព្រមព្រៀងហិរញ្ញប្បទានឥតសំណង និងឥណទានសម្បទាន មានទឹកប្រាក់សរុបចំនួនប្រមាណ៤៧០.៦៩លានដុល្លារអាម៉េរិក សម្រាប់អនុវត្ត១២ គម្រោង/កម្មវិធីអភិវឌ្ឍន៍ ដែលក្នុងនោះមាន៖

* ហិរញ្ញប្បទានឥតសំណង ចំនួន៥គម្រោង/កម្មវិធី មានទឹកប្រាក់សរុបចំនួនប្រមាណ ១០.៤២លានដុល្លារអាម៉េរិក។ ទឹកប្រាក់នេះ មិនរាប់បញ្ចូលទឹកប្រាក់ហិរញ្ញប្បទាន ដែលដៃគូអភិវឌ្ឍន៍បានផ្តល់ទៅដល់ បណ្តាគោលដៅអនុវត្តដោយផ្ទាល់ ដោយមិនឆ្លងកាត់រាជរដ្ឋាភិបាលទេ។

* ឥណទានសម្បទានចំនួន៧គម្រោង/កម្មវិធី មានទឹកប្រាក់សរុបចំនួនប្រមាណ ៤៦០.២៦លានដុល្លារអាម៉េរិក ឬប្រមាណ៣៣៧.៧១ លានអេសដេអែ គឺស្មើនឹងប្រមាណ ១៥.០១% នៃច្បាប់ហិរញ្ញវត្ថុ។

របាយការណ៍ដដែលបានឲ្យដឹងទៀតថា ច្បាប់ហិរញ្ញវត្ថុឆ្នាំ ២០២៦ មានឥណទានវិនិយោគសាធារណៈ ដោយហិរញ្ញប្បទានក្រៅប្រទេសចំនួន ៧ ០៤៩ ៥៤០ លានរៀល។

ជាក់ស្តែង, ការដកសាច់ប្រាក់យកមកប្រើប្រាស់ក្នុងគម្រោង/កម្មវិធីអភិវឌ្ឍន៍ នៅក្នុងឆមាសទី១ ឆ្នាំ២០២៦ ក្នុងក្របខ័ណ្ឌនៃកិច្ចព្រមព្រៀងឥណទានសម្បទាន និងកិច្ចព្រមព្រៀង ហិរញ្ញប្បទានឥតសំណង តាមបរិបថរបស់ក្រសួងសេដ្ឋកិច្ច និងហិរញ្ញវត្ថុ សម្រេចបានសរុបប្រមាណ៤៥៤.១លានដុល្លារអាម៉េរិក ឬសមមូលនឹង ១ ៨២៣.៦៧ ប៊ីលានរៀល គឺស្មើនឹងប្រមាណ ២៥.៨៧% នៃច្បាប់ហិរញ្ញវត្ថុឆ្នាំ ២០២៦ ក្នុងនោះ៖

* ឥណទានសម្បទានសម្រេចបានចំនួន ៤១៥.៤ លានដុល្លារអាម៉េរិក ឬសមមូលនឹង ១ ៦៦៨.២២ប៊ីលានរៀល គឺស្មើនឹងប្រមាណ ២៥.៥១% នៃឥណទានប្រចាំឆ្នាំ និងហិរញ្ញប្បទានឥតសំណង សម្រេចបាន ចំនួន៣៨.៦៩លានដុល្លារអាម៉េរិក ឬសមមូលនឹង ១៥៥.៤៥ ប៊ីលានរៀល គឺស្មើនឹងប្រមាណ ៣០.៥៣% នៃឥណទានប្រចាំឆ្នាំ។

ទឹកប្រាក់នេះនៅមិនទាន់បញ្ចូលនៅឡើយ នូវហិរញ្ញប្បទានឥតសំណងមួយចំនួនទៀត ដែលត្រូវបានផ្តល់ទៅដល់គោលដៅអនុវត្តផ្ទាល់ដោយដៃគូអភិវឌ្ឍន៍តែម្តង ដោយមិនឆ្លងតាមបរិបថ ក្រសួងសេដ្ឋកិច្ច និងហិរញ្ញវត្ថុ ដោយរួមទាំងគម្រោងវិនិយោគផ្ទាល់ ក្នុងវិស័យហេដ្ឋារចនាសម្ព័ន្ធរូបវន្ដ និងសង្គម និងគម្រោងកសាងសមត្ថភាពផងដែរ៕