(ភ្នំពេញ)៖ ក្នុងរយៈពេលឆមាសទី១ ឆ្នាំ២០២៦ រដ្ឋបានប្រមូលចំណូលពីកាតព្វកិច្ចល្បែងកាស៊ីណូ និងចំណូលពីកាតព្វកិច្ចល្បែងផ្សងសំណាង សរុបចំនួន ១១៥ ៨៨៤ លានរៀល ដែលស្មើនឹងប្រមាណជាង ២៨លានដុល្លារអាមេរិកថយចុះ ២៥.៨% ធៀបនឹងរយៈពេលដូចគ្នាក្នុងឆ្នាំ២០២៥ ប៉ុន្តែស្នើនឹង៥៣.៧% នៃច្បាប់ហិរញ្ញវត្ថុសម្រាប់ឆ្នាំ២០២៦។

តាម​របាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងការវាយតម្លៃលើការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦​ បានបញ្ជាក់ថា ចំណូលដ៏សំខាន់នេះ មួយចំណែកធំ គឺទទួលបានពីកាស៊ីណូណាហ្គាវើលដ៍ ដែលបានបង់បន្ថែមនូវចំណូលកាតព្វកិច្ចពីល្បែង បន្ទាប់ពីការធ្វើសវនកម្មឆ្នាំ២០២៤។

ទោះបីជាមានការថយចុះនេះក៏ដោយ តាមការប៉ាន់ស្មានរហូតដល់ដំណាច់ឆ្នាំ២០២៦ ចំណូលពីវិស័យល្បែងពាណិជ្ជកម្ម អាចនឹងសម្រេចបានប្រមាណ ១១៧.៧% នៃច្បាប់ហិរញ្ញវត្ថុឆ្នាំ២០២៦ ដោយសារការបន្តពង្រឹងការគ្រប់គ្រងប្រមូលចំណូលកាតព្វកិច្ចពីល្បែងកាស៊ីណូ។

របាយការណ៍របស់ក្រសួងសេដ្ឋកិច្ចបាន​​ឱ្យដឹងដែរថា​ នៅក្នុងផ្នែកចំណូលមិនមែនសារពើពន្ធនេះ ទោះបីចំណូលពីកាស៊ីណូ និងឆ្នោតមានការថយចុះក៏ដោយ ក៏ចំណូលពីទ្រព្យសម្បត្តិរដ្ឋមួយចំនួនទៀត កំពុងបន្តងើបឡើងវិញគួរឱ្យកត់សម្គាល់ ជាពិសេសចំណូលពីអាជ្ញាបណ្ណក្នុងស្រុក (អាជ្ញាបណ្ណ 5G) ប្រាក់ចំណេញសហគ្រាសសាធារណៈ ចំណូលពីការត្រួតពិនិត្យគុណភាពផលិតផល និងការគោរពបទដ្ឋាន ចំណូលពីប្រៃសណីយ៍ និងទូរគមនាគមន៍ (ដោយសារការកើនឡើងអត្រាប្រើប្រាស់សេវាទូរស័ព្ទ និងអ៊ីនធឺណិត) និងចំណូលពីវិស័យរ៉ែ។

តាមការប៉ាន់ស្មានរហូតដល់ដំណាច់ឆ្នាំ២០២៦ ចំណូលមិនមែនសារពើពន្ធសរុប អាចនឹងសម្រេចបានប្រមាណ ១០២.១% នៃច្បាប់ហិរញ្ញវត្ថុឆ្នាំ២០២៦។ ការបន្តពង្រឹងការគ្រប់គ្រង និងការងើបឡើងវិញនៃវិស័យសក្តានុពលផ្សេងទៀត នឹងរួមចំណែកដល់ស្ថិរភាព និងកំណើនចំណូលថវិការដ្ឋ៕