(ភ្នំពេញ)៖ រាជរដ្ឋាភិបាលកម្ពុជា​នឹង​ដកប្រាក់សន្សំចំនួន ១៨៦ ៧៧១ លានរៀល ឬប្រមាណ ៤៦ លានដុល្លារអាម៉េរិក សម្រាប់ប្រើប្រាស់ក្នុងឆ្នាំ២០២៦នេះ ប្រសិនបើការប្រមូលចំណូលមិនបានសម្រេច តាមការប៉ាន់ស្មានរហូតដល់ដំណាច់ឆ្នាំ។ នេះបើយោងតាមរបាយការណ៍ ស្តីពីលទ្ធផលនៃការអនុវត្តថវិកាឆមាសទី១ និងលទ្ធផលប៉ាន់ស្មាននៃការអនុវត្តថវិកាឆ្នាំ២០២៦។

របាយការណ៍ដដែលបានបង្ហាញថា ចំណូលថវិកាថ្នាក់ជាតិសម្រាប់ឆមាសទី១ ឆ្នាំ២០២៦ សម្រេចបាន ៥៥.១%នៃច្បាប់ហិរញ្ញវត្ថុ ដែលមានសន្ទុះលឿនជាង ១.២ពិន្ទុភាគរយ បើធៀបនឹងរយៈពេលដូចគ្នាក្នុងឆ្នាំ២០២៥។ ចំណែកឯចំណាយថវិកាថ្នាក់ជាតិវិញ ក៏មានសន្ទុះលឿនជាងឆ្នាំ២០២៥ ផងដែរ ដោយសម្រេចបាន ៤៤% (គិតទាំងបុរេប្រទាន) នៃច្បាប់ហិរញ្ញវត្ថុ។

តាមការប៉ាន់ស្មានដល់ដំណាច់ឆ្នាំ២០២៦ ឱនភាពថវិកាសរុបនឹងមានទំហំ ៧ ១៩៤ ១៥៤ លានរៀល ស្មើនឹងប្រមាណ ១ ៧៨៦ លានដុល្លារអាម៉េរិក ដែលត្រូវជា ៣.២៧% នៃផលិតផលក្នុងស្រុកសរុប (ផ.ស.ស.)។ តួលេខនេះ គឺទាបជាងឱនភាពថវិការដ្ឋសរុប ដែលបានគ្រោងទុកក្នុងច្បាប់ហិរញ្ញវត្ថុឆ្នាំ២០២៦ ដែលមាន ៣.៧២% នៃ ផ.ស.ស.។ ដើម្បីបំពេញតម្រូវការហិរញ្ញប្បទាន រាជរដ្ឋាភិបាលពឹងផ្អែកលើហិរញ្ញប្បទានក្រៅប្រទេស និងហិរញ្ញប្បទានក្នុងប្រទេស តាមរយៈការបោះផ្សាយមូលបត្ររដ្ឋ រួមទាំងការប្រើប្រាស់ប្រាក់សន្សំរបស់រាជរដ្ឋាភិបាលក្នុងទំហំ ០.០៨% នៃ ផ.ស.ស. ស្មើនឹងប្រមាណ ៤៦ លានដុល្លារអាម៉េរិក។ ​

ទោះជាយ៉ាងណា ប្រសិនបើការប្រមូលចំណូល ជាពិសេសចំណូលពន្ធ និងអាករគយ ព្រមទាំងចំណូលពន្ធដារ សម្រេចបានលទ្ធផលប្រសើរជាងការប៉ាន់ស្មាន រាជរដ្ឋាភិបាលអាចនឹងរក្សាបាន នូវគោលការណ៍មិនប្រើប្រាស់ប្រាក់សន្សំ ដូចបានគ្រោងទុកនៅពេលរៀបចំច្បាប់ហិរញ្ញវត្ថុឆ្នាំ២០២៦ ស្របតាមគោលការណ៍ពង្រឹងស័ក្តិសិទ្ធិភាព និងប្រសិទ្ធភាពចំណាយជាជំហានៗ។ ផ្ទុយទៅវិញ ការខកខានមិនអាចសម្រេចបាននូវលទ្ធផលចំណូលតាមការប៉ាន់ស្មាន នឹងធ្វើឱ្យប៉ះពាល់ជាអវិជ្ជមានបន្ថែមទៀតដល់តុល្យភាពដែលបានព្យាករណ៍នេះ។

ដើម្បីបង្ហាញនូវការប្តេជ្ញាចិត្តរបស់រាជរដ្ឋាភិបាល ក្នុងការរក្សាគោលការណ៍មិនប្រើប្រាស់ប្រាក់សន្សំ ដូចបានគ្រោងទុកក្នុងច្បាប់ហិរញ្ញវត្ថុឆ្នាំ២០២៦ ក្រសួងសេដ្ឋកិច្ចនិងហិរញ្ញវត្ថុបានដាក់ចេញនូវវិធានការអនុវត្តចាំបាច់នានា ទាំងផ្នែកចំណូល និងផ្នែកចំណាយ សម្រាប់ឆមាសទី២ ឆ្នាំ២០២៦។ វិធានការទាំងនេះមានគោលបំណងធានា បាននូវការប្រមូលចំណូលប្រកបដោយប្រសិទ្ធភាពខ្ពស់ និងការគ្រប់គ្រងចំណាយប្រកបដោយគណនេយ្យភាព។

ចំពោះវិធានការលើការប្រមូលចំណូល ក្រសួងនឹងបន្តពង្រឹងការកៀរគរចំណូលពន្ធដារ ដោយជំរុញការចុះបញ្ជីពន្ធដារដោយស្ម័គ្រចិត្ត ជាពិសេសសម្រាប់សហគ្រាសធុនតូច និងមធ្យម។ ជាមួយគ្នានេះ ក្រសួងនឹងបង្កើនប្រសិទ្ធភាពនៃការស៊ើបអង្កេតបទល្មើសពន្ធដារ តាមរយៈការអនុវត្តសៀវភៅណែនាំ ស្តីពីការស៊ើបអង្កេតបទល្មើសព្រហ្មទណ្ឌពីពន្ធដារ និងអនុវត្តសាកល្បងប្រព័ន្ធវិក្កយបត្រអេឡិចត្រូនិក (E-invoicing system)។

ក្រសួងក៏នឹងពង្រឹងការប្រមូលចំណូលពន្ធ និងអាករគយ ដោយបន្តអនុវត្តវិធានការមុតស្រួចក្នុងការបង្ការ និងបង្ក្រាបអំពើរត់គេចពន្ធ ព្រមទាំងធ្វើទំនើបកម្មរដ្ឋបាលគយ និងពង្រីកវិសាលភាពនៃប្រតិបត្តិការសវនកម្មក្រោយពេលបញ្ចេញទំនិញពីគយ។ ចំណែកឯចំណូលមិនមែនសារពើពន្ធ ក្រសួងនឹងរៀបចំលិខិតបទដ្ឋានបន្តទៀត ដើម្បីពង្រីកការប្រមូលចំណូលដែលមានសក្តានុពល ជំរុញការគ្រប់គ្រងចំណូលពីវិស័យទេសចរណ៍ និងធនធានរ៉ែឱ្យអស់សក្តានុពល ព្រមទាំងពង្រឹងការប្រើប្រាស់ប្រព័ន្ធបច្ចេកវិទ្យាព័ត៌មានគ្រប់គ្រងចំណូលមិនមែនសារពើពន្ធ (NRMIS)។

ទាក់ទងនឹងវិធានការផ្នែកចំណាយ ក្រសួងសេដ្ឋកិច្ច និងហិរញ្ញវត្ថុនឹងត្បិតត្បៀតចំណាយកញ្ចប់ត្រៀមបម្រុងរាជរដ្ឋាភិបាល និងបង្កើនការពង្រឹងប្រសិទ្ធភាពចំណាយរបស់ក្រសួង-ស្ថាប័ន ដោយតម្រង់ទិសការចាយឱ្យចំទិសដៅ។

ក្រសួងក៏នឹងពង្រឹងការគ្រប់គ្រងការអនុវត្តគម្រោងវិនិយោគសាធារណៈ និងបន្តពិនិត្យកែសម្រួលនីតិវិធីចំណាយបន្ថែមទៀតតាមការចាំបាច់ ដើម្បីធានាបាន «តម្លៃនៃលុយ» និងសមិទ្ធកម្មនៃកម្មវិធី។ ការពង្រឹងសមត្ថភាពអង្គភាពថវិកា ជំរុញការដាក់ឱ្យអនុវត្តប្រព័ន្ធ FMIS និងការធ្វើអធិការកិច្ចហិរញ្ញវត្ថុ ក៏ជាចំណុចគន្លឹះផងដែរ៕