(ភ្នំពេញ)៖ លោក គីន ឧត្តមមុនី​ស៊ីណាត ប្រធានគ្រប់គ្រងទូទៅនៃក្រុមហ៊ុន PIC TIRE Co., LTD ដែលជាក្រុមហ៊ុនទទួលសិទិ្ធចែកចាយផ្តាច់មុខ នូវផលិតផលសំបកកង់ឡានទាំងក្រៅ និងផលិតផល ដែលផលិតក្នុងប្រទេស ម៉ាក SAILUN ​​បានលើកឡើងថា ​​គោលនយោបាយលើកលែងពន្ធដ៏អំណោយផលរបស់រាជរដ្ឋាភិបាលកម្ពុជា ជាកត្តាគន្លឹះដែលបានទាក់ទាញរោងចក្រផលិតសំបកកង់ឡានជាច្រើន ឱ្យមកបោះទុនវិនិយោគនៅកម្ពុជា​ បើទោះបីជាទំហំទីផ្សារក្នុងស្រុក​តូចក៏ដោយ។

លោក គីន ឧត្តមមុនីស៊ីណាត ​បានគូសបញ្ជាក់ថា បច្ចុប្បន្ននៅកម្ពុជាមានរោងចក្រផលិតសំបកកង់ប្រមាណ ១០ កំពុងប្រតិបត្តិការ​ ​​ហើយត្រឹមតែរោងចក្រសៃឡុនមួយប៉ុណ្ណោះ មានសមត្ថភាពផលិតសរុបចន្លោះពី ២០ ទៅ ២១ លានគ្រាប់ក្នុងមួយឆ្នាំ ខណៈតម្រូវការក្នុងស្រុកមានមិនដល់ ១លានគ្រាប់ផង។

លោកបានបន្តថា មូលហេតុចម្បងដែលធ្វើឱ្យក្រុមហ៊ុនបរទេស សម្រេចចិត្តវិនិយោគនៅកម្ពុជា គឺដោយសារគោលនយោបាយអនុគ្រោះពន្ធនាំចេញ ០ ភាគរយ ដែលធ្វើឱ្យកម្ពុជាមានភាពប្រកួតប្រជែងខ្ពស់បើធៀបនឹងបណ្តាប្រទេសដទៃក្នុងតំបន់។ ជាក់ស្តែង គិតត្រឹមឆ្នាំ ២០២៥-២០២៦ កម្ពុជាបាននាំចេញសំបកកង់ឡានទៅកាន់ ៩៦ ប្រទេសហើយ កើនឡើងគួរឱ្យកត់សម្គាល់ពី ៣០ ប្រទេស កាលពីឆ្នាំ ២០២៣-២០២៤។ ភាពជោគជ័យនេះបានធ្វើឱ្យកម្ពុជាអាចវ៉ាដាច់ប្រទេសថៃ ក្នុងការនាំចេញសំបកកង់ឡានទៅកាន់ទីផ្សារអន្តរជាតិ រួមទាំងសហរដ្ឋអាមេរិក និងបណ្តាប្រទេសអាស៊ានមួយចំនួនទៀត។

លោក គីន ឧត្តមមុនីស៊ីណាត ក៏បានសម្តែងក្តីសង្ឃឹមថា ភាពជោគជ័យនៃវិស័យផលិតកម្មសំបកកង់ឡាននេះ នឹងក្លាយជាគំរូ និងជំរុញឱ្យវិស័យឧស្សាហកម្មផ្សេងៗទៀត ជាពិសេសវិស័យយានយន្ត ដូចជាការដំឡើងរថយន្ត Toyota នៅកម្ពុជា ក៏នឹងទទួលបានការវិនិយោគកាន់តែច្រើននាពេលអនាគត។ លោកបានអំពាវនាវឱ្យរាជរដ្ឋាភិបាល វិស័យឯកជន និងវិស័យរដ្ឋ បន្តសហការគ្នាឱ្យកាន់តែរឹងមាំ ដើម្បីជំរុញកំណើនសេដ្ឋកិច្ចជាតិ និងបង្កើនសមត្ថភាពប្រកួតប្រជែងរបស់កម្ពុជានៅលើឆាកអន្តរជាតិ។ ​

លោក គីន ឧត្តមមុនីស៊ីណាត​ លើកឡើងបែបនេះ ធ្វើឡើងនៅក្នុងកម្មវិធី ​FRESH BUSINESS​ ​ពិភាក្សាលើប្រធានបទ៖ «ឱកាស​ពង្រីក​សក្ដានុពល​ផលិតកម្ម​សំបកកង់នៅកម្ពុជា»៕

សូមស្តាប់ការពន្យល់បន្ថែមរបស់ លោក គីន ឧត្តមមុនីស៊ីណាត៖