(ភ្នំពេញ)៖ ថ្លែងប្រាប់បណ្ដាញព័ត៌មាន Fresh News ឧកញ៉ាបណ្ឌិត ឡាយ ឈុនហួ ប្រធានសហព័ន្ធស្រូវអង្ករកម្ពុជា បានបញ្ជាក់ឲ្យដឹងថា ការនាំចេញអង្កររបស់កម្ពុជា នៅឆ្នាំ២០២៦នេះ នឹងសម្រេចបាន១លានតោន ក្រោមមានការជួយជ្រោមជ្រែមពីរាជរដ្ឋាភិបាល។

ជាមួយគ្នានេះ លោកជឿថា ការនាំចេញអង្កររបស់កម្ពុជាក្នុងបរិមាណ ១លានតោននឹងមាននិរន្តរភាព ព្រោះរោងម៉ាស៊ីនមានទុនបង្វិលគ្រប់គ្រាន់ និងមានទីផ្សារថ្មីៗផងដែរ។

ឧកញ៉ាបណ្ឌិត ឡាយ ឈុនហួ បានបញ្ជាក់យ៉ាងដូច្នេះថា «ខ្ញុំជឿថា យើងអាចថេរនៅត្រឹម ១លាននេះបាន វាអាចបូកដក៥ ទៅ១០% យើងឃើញថា ឆ្នាំ២០២៥ យើងបាន៩៤ម៉ឺនហើយ ឆ្នាំនេះ យើងអាចថាលើស ១លានតិចតួច។ ឆ្នាំទៅមុខទៀត ដោយសារតែយើងមានទុនរឹងមាំ​ ហើយឃ្លាំងក៏មានច្រើន វាអាចថេរនៅក្នុង១លានតោន»។

សួរថាអនាគត តើយើងចង់ពង្រីក រហូតទៅដល់ប៉ុន្មាន? ឧកញ៉ាបណ្ឌិត បានប្រាប់ថា យើងមើលទុនរយៈពេលវែង តើសហព័ន្ធស្រូវអង្ករអាចធ្វើម៉េច ដើម្បីកៀរគពីខាងរាជរដ្ឋាភិបាល ពីការធានាឥណទាន ទៅលើការវិនិយោគរយៈពេលវែងទៅលើឃ្លាំង និងឡសម្ងួតបន្ថែមទៀត ដើម្បីមានស្រូវឲ្យកាន់តែច្រើន ដើម្បីបម្រើការនាំចេញ។

ជាមួយគ្នានេះដែរ សហព័ន្ធស្រូវអង្ករកម្ពុជា ក៏ជំរុញខ្លាំងលើទីផ្សារ ដោយព្យាយាមរកគោលដៅណាមួយ ដែលអាចនាំចេញទៅច្រើន ហើយយើងឃើញថា នៅក្នុងឆ្នាំនេះមានការរីកម្រើនច្រើន នូវការនាំចេញទៅកាន់ប្រទេសជិតខាង។

បើតាមប្រធានសហព័ន្ធស្រូវអង្ករកម្ពុជា, គោលនយោបាយជំរុញផលិតកម្មស្រូវ និងការនាំចេញអង្ករ បានដាក់ចេញតាំងពីឆ្នាំ២០១០ ហើយកន្លងមក ដែលកម្ពុជាធ្វើអត់ទាន់បាន ដោយសារឃ្លាំងនៅតូចខ្លាំង ហើយទីផ្សារ ក៏នៅមានកម្រិតដែរ ជាពិសេស គឺនៅពេលដែលច្រូតកាត់ម្ដងៗ គឺស្រូវត្រូវបានហូរទៅកាន់ប្រទេសជិតខាង។

បច្ចុប្បន្ននេះ ដោយសារតែមានទុនបង្វិលដែលត្រូវបានរដ្ឋជួយជំរុញច្រើន តាមរយៈធនាគារអភិវឌ្ឍជនបទ ដែលមានភាពបត់បែន ធ្វើការប្រមូលទិញស្រូវបានច្រើន ដើម្បីធ្វើការសម្ងួតទុក និងកិននាំចេញបន្តបន្ទាប់ នៅខែដែលពុំមានស្រូវច្រូតកាត់៕