(ភ្នំពេញ)៖ ក្រុមហ៊ុន D2 Legal Technology ដែលជាក្រុមហ៊ុនប្រឹក្សាយោបល់ដែលមានទីស្នាក់ការកណ្តាលនៅចក្រភពអង់គ្លេស ក្រោមជំនួយបច្ចេកទេស របស់ធនាគារអភិវឌ្ឍន៍អាស៊ី (ADB) បានដាក់ជូនផែនការការងាររៀបចំ និងតាក់តែងច្បាប់ស្តីពីការគ្រប់គ្រងទ្រព្យសកម្មនិម្មិត/ទ្រព្យឌីជីថល ជូននិយ័តករមូលបត្រកម្ពុជា (ន.ម.ក.) ដែលជាអនុប្រធានប្រចាំការ និងជាលេខាធិការដ្ឋាននៃក្រុមការងារអន្តរក្រសួងទទួលបន្ទុករៀបចំ និងតាក់តែងច្បាប់ស្តីពីការគ្រប់គ្រងទ្រព្យសកម្មនិម្មិត/ទ្រព្យឌីជីថល និងឯកសារលិខិតបទដ្ឋានគតិយុត្តពាក់ព័ន្ធ (ក្រុមការងារ) ស្របតាមស្មារតីនៃកិច្ចប្រជុំក្រុមការងារកាលពីថ្ងៃទី១០ ខែសីហា ឆ្នាំ២០២៦។

អ្នកជំនាញការដឹកនាំគម្រោងនេះ គឺលោកបណ្ឌិត Jason de Mink ដែលជាអ្នកជំនាញផ្នែកច្បាប់និងបទប្បញ្ញត្តិ និងជាទីប្រឹក្សាគោលនយោបាយ ដែលមានបទពិសោធការងារ ជាង២៥ឆ្នាំ លើផ្នែកទ្រព្យឌីជីថល បទប្បញ្ញត្តិបច្ចេកវិទ្យាហិរញ្ញវត្ថុ អនុលោមភាពពាក់ព័ន្ធនឹងឧក្រិដ្ឋកម្មហិរញ្ញវត្ថុ ការអនុវត្តផ្នែកច្បាប់ និងការអប់រំកម្រិតឧត្តមសិក្សា

លោក ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក. និងជាអនុប្រធានប្រចាំការនៃក្រុមការងារ នៅថ្ងៃទី៧ ខែកញ្ញា ឆ្នាំ២០២៦ បានដឹកនាំសហការី ជួបប្រជុំតាមប្រព័ន្ធអនឡាញ ជាមួយលោក Ahmad Faris Rabidin ប្រធានផ្នែកហិរញ្ញវត្ថុឯកទេសនៃ ADB ដើម្បីពិភាក្សាលើផែនការការងារនេះ។

ក្នុងកិច្ចប្រជុំនេះ ADB បានឯកភាពលើផែនការការងារ និងបញ្ជាក់ជាថ្មីនូវការប្តេជ្ញាចិត្តរបស់ខ្លួន ក្នុងការគាំទ្រដល់រាជរដ្ឋាភិបាលកម្ពុជា ក្នុងការរៀបចំសេចក្តីព្រាងច្បាប់នេះ។

អនុវត្តតាមផែនការការងារ គម្រោងនេះចាប់ផ្តើមពីខែឧសភា ដល់ខែធ្នូ ឆ្នាំ២០២៦ និងផ្តល់នូវសេចក្តីព្រាងច្បាប់ដែលត្រៀមរួចរាល់សម្រាប់ការអនុម័ត ស្របតាមអនុសាសន៍ របស់ក្រុមការងារសកម្មភាពហិរញ្ញវត្ថុ (FATF) (រួមទាំងអនុសាសន៍ R.15/INR.15 ស្តីពីទ្រព្យសកម្មនិម្មិត និងវិធាន Travel Rule ក្រោមអនុសាសន៍ R.16) និងគោលការណ៍របស់អង្គការអន្តរជាតិនៃគណៈកម្មការមូលបត្រ (IOSCO)។

ស្ថិតក្នុងក្របខ័ណ្ឌពេលវេលានេះ អ្នកជំនាញការ នឹងរៀបចំសេចក្តីព្រាងច្បាប់នេះ ដែលគ្របដណ្តប់លើសសរស្តម្ភចំនួន ៣ ដូចជា អាជ្ញាធរមានសមត្ថកិច្ច ការប្រឆាំងការសម្អាតប្រាក់ និងការប្រឆាំងហិរញ្ញប្បទានភេរវកម្ម (AML/CFT) និងការពង្រឹងការអនុវត្តច្បាប់ នៅត្រឹមសប្តាហ៍ទី៤ ខែកញ្ញា ឆ្នាំ២០២៦។

សសរស្តម្ភទាំងបីនេះ ឆ្លើយតបដោយផ្ទាល់ទៅនឹងអនុសាសន៍របស់ FATF ពាក់ព័ន្ធនឹងទ្រព្យសកម្មនិម្មិត និងក្រុមហ៊ុនផ្តល់សេវាទ្រព្យសកម្មនិម្មិត។នៅក្នុងពេលស្របគ្នានេះ ផ្នែកផ្សេងទៀតនៃសេចក្តីព្រាងច្បាប់នឹងត្រូវបានរៀបចំឡើងជាបឋមផងដែរ ដែលរួមមាន ចំណងជើង ខ្លឹមសារចម្បង និងភាពប្រទាក់ក្រឡា ទៅនឹងបទប្បញ្ញត្តិបន្តបន្ទាប់ ដែលផ្នែកទាំងនេះ នឹងត្រូវបញ្ចប់នៅក្នុងខែវិច្ឆិកា ព្រមទាំងរៀបចំបញ្ចប់សេចក្តីព្រាងច្បាប់ សំណៅចុងក្រោយសម្រាប់ដាក់ស្នើសុំការ អនុម័ត នៅក្នុងខែធ្នូ ឆ្នាំ២០២៦។

ក្នុងពេលដំណាលគ្នា អ្នកជំនាញការព្រាងផ្នែកផ្សេងទៀតទាំងអស់ផងដែរជាគ្រោងឆ្អឹង ដូចជាចំណងជើង ខ្លឹមសារចម្បង និងភាពប្រទាក់ក្រឡាទៅនឹងបទប្បញ្ញត្តិបន្តបន្ទាប់ ដែលនឹងបញ្ចប់ក្នុងខែវិច្ឆិកា និងបញ្ចប់សេចក្តីព្រាងច្បាប់ដែលត្រៀមរួចរាល់សម្រាប់ការអនុម័តក្នុងខែធ្នូ ឆ្នាំ២០២៦។ ការពិគ្រោះយោបល់លើសេចក្តីព្រាងច្បាប់នេះ នឹងត្រូវធ្វើឡើងនៅគ្រប់ដំណាក់កាល៕