មន្ត្រី៖ បច្ចុប្បន្នរោងចក្រស្ករសចំនួន២ នៅកម្ពុជា ផលិតបានត្រឹមតែជាង ១៥ម៉ឺនតោន ខណៈតម្រូវការមានរហូតដល់ ២៥ម៉ឺនតោន
10-09-2026 21:32
(ភ្នំពេញ)៖ មន្ត្រីជាន់ខ្ពស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានបង្ហាញនូវក្តីរំពឹងថា ការផលិតស្ករសក្នុងស្រុក នឹងអាចផ្គត់ផ្គង់តម្រូវការទីផ្សារបានគ្រប់គ្រាន់នៅឆ្នាំ២០២៧ បន្ទាប់ពីរោងចក្រផលិតស្ករសមួយនៅខេត្តកំពង់ស្ពឺ កំពុងពង្រីកខ្សែច្រវាក់ផលិតកម្មរបស់ខ្លួនបន្ថែមទៀត ខណៈបច្ចុប្បន្នរោងចក្រស្ករសចំនួន ២នៅកម្ពុជា ផលិតបានត្រឹមតែជាង១៥ម៉ឺនតោន ខណៈតម្រូវការមានរហូតដល់ ២៥ម៉ឺនតោនក្នុងមួយឆ្នាំ។
ថ្លែងប្រាប់បណ្តាញព័ត៌មាន Fresh News នៅថ្ងៃទី១០ ខែកញ្ញា ឆ្នាំ២០២៦នេះ លោក ហេង សុគង់ រដ្ឋលេខាធិការក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍បានឱ្យដឹងថា គិតមកទល់បច្ចុប្បន្ន កម្ពុជាមានរោងចក្រផលិតស្ករសពីអំពៅចំនួនពីរគឺ រោងចក្រកំពង់ស្ពឺស៊ូហ្គ័រ នៅខេត្តកំពង់ស្ពឺ ដែលមានសមត្ថភាពផលិតប្រមាណ ១៤ម៉ឺនតោនក្នុងមួយឆ្នាំ (ទិន្នន័យឆ្នាំ២០២៥) និងរោងចក្ររបស់ក្រុមហ៊ុនកាម៉ាដេនូ វេនឈរ នៅខេត្តក្រចេះ ដែលមានសមត្ថភាពផលិត ១៥ ០០០តោន ក្នុងមួយឆ្នាំ ដែលទើបតែចាប់ផ្ដើមដំណើរការឡើងវិញ ក្រោយផ្អាកអស់រយៈពេល១០ឆ្នាំ។
លោកបានឱ្យដឹងផងដែរថា បច្ចុប្បន្នតម្រូវការប្រើប្រាស់ស្ករសនៅកម្ពុជា ទាំងសម្រាប់ការបរិភោគ ធ្វើបង្អែម និងឧស្សាហកម្ម មានទំហំជាមធ្យមប្រមាណ ២៥ម៉ឺនតោនក្នុងមួយឆ្នាំ។ ជាមួយសមត្ថភាពផលិតត្រឹមតែជាង ១៥ម៉ឺនតោន តម្រូវឱ្យកម្ពុជានៅតែត្រូវនាំចូលស្ករសពីប្រទេសជិតខាងដូចជា វៀតណាម ថៃ ចិន ឥណ្ឌូនេស៊ី និងម៉ាឡេស៊ី ដើម្បីបំពេញតម្រូវការ។
ទោះជាយ៉ាងណា លោករំពឹងថានៅឆ្នាំ២០២៧ ផលិតកម្មស្ករសនៅកម្ពុជានឹងអាចផលិតបានរហូតដល់ជាង ២៦ម៉ឺនតោន បំពេញបាននូវតម្រូវការប្រើប្រាស់បច្ចុប្បន្នគ្រប់គ្រាន់ ខណៈរោងចក្រកំពង់ស្ពឺ Sugar កំពុងពង្រីកខ្សែច្រវ៉ាក់ផលិតកម្មបន្ថែម។
ជាមួយគ្នានេះ លោកបានឱ្យដឹងដែរថា កន្លងមកកម្ពុជាក៏ធ្លាប់បានផលិតស្ករឆៅ (raw sugar) និងនាំចេញទៅកាន់ប្រទេសជាច្រើនដូចជា វៀតណាម អេស្ប៉ាញ អ៊ីតាលី ព្រុយណេ និងស្រីលង្កា។ លើសពីនេះ ស្ករត្នោតកំពង់ស្ពឺ ដែលជាទំនិញសម្គាល់ភូមិសាស្ត្រ (GI) ក៏មានភាពល្បីល្បាញ និងត្រូវបាននាំចេញទៅកាន់ជាង ២៥ប្រទេសក្នុងសហគមន៍អឺរ៉ុប រួមទាំងចិន ជប៉ុន កូរ៉េខាងត្បូង និងកាណាដាផងដែរ៕
