តើកម្ពុជាចាប់យកឱកាសពង្រីកពាណិជ្ជកម្ម និងវិនិយោគជាមួយបារាំងបានអ្វីខ្លះ ក្នុងពេលធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនី និងវេទិកាធុរកិច្ចកម្ពុជា-បារាំង ? Video inside)
22-09-2026 11:01
(ភ្នំពេញ)៖ នៅខែវិច្ឆិកាខាងមុខនេះ កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី។ ស្របជាពេលជាមួយគ្នានេះ ក៏មានរៀបចំវេទិកាធុរកិច្ចកម្ពុជា-បារាំងរយៈពេល ២ថ្ងៃ ដោយរំពឹងថានឹងមានការចូលរួមពីក្រុមហ៊ុនបារាំងប្រមាណ ៤០០ក្រុមហ៊ុន ដែលនឹងបើកទំព័រថ្មីមួយសម្រាប់ទំនាក់ទំនងសេដ្ឋកិច្ចទ្វេភាគី។
តាមរយៈកិច្ចប្រជុំកំពូលហ្វ្រង់កូហ្វូនី និងវេទិកាធុរកិច្ចកម្ពុជា-បារាំង គឺជាឱកាសដ៏ល្អមួយសម្រាប់កម្ពុជា ក្នុងការត្រៀមខ្លួនដើម្បីចាប់យកឱកាសដ៏ធំធេង ក្នុងការពង្រីកកិច្ចសហប្រតិបត្តិការផ្នែកពាណិជ្ជកម្ម និងវិនិយោគជាមួយប្រទេសបារាំង ក៏ដូចជាវិនិយោគិនផ្សេងទៀតពីអឺរ៉ុបដែលនឹងមកចូលរួមវេទិកានេះ។
ការធ្វើជាម្ចាស់ផ្ទះនៃព្រឹត្តិការណ៍ដ៏ធំនេះ គឺជាសញ្ញាណដ៏សំខាន់មួយដែលបង្ហាញពីការប្តេជ្ញាចិត្តរបស់កម្ពុជាក្នុងការទាក់ទាញការវិនិយោគបរទេស និងពង្រឹងចំណងមិត្តភាពជាមួយបណ្តាប្រទេសនិយាយភាសាបារាំង ជាពិសេសប្រទេសបារាំងផ្ទាល់។ វត្តមានរបស់ក្រុមហ៊ុនបារាំងដ៏ច្រើនសន្ធឹកសន្ធាប់នេះ នឹងផ្តល់ឱកាសមាសសម្រាប់កម្ពុជាក្នុងការបង្ហាញសក្តានុពលសេដ្ឋកិច្ច គោលនយោបាយវិនិយោគអំណោយផល និងទីផ្សារដែលកំពុងរីកចម្រើនរបស់ខ្លួន។ វិនិយោគិនបារាំងអាចនឹងចាប់អារម្មណ៍លើវិស័យសំខាន់ៗដូចជា កសិកម្ម ទេសចរណ៍ ឧស្សាហកម្មកែច្នៃ និងបច្ចេកវិទ្យា ដែលជាវិស័យអាទិភាពរបស់រាជរដ្ឋាភិបាលកម្ពុជា។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានលើកឡើងថា ការរៀបចំវេទិកានេះ គឺជាជំហានដ៏សំខាន់មួយក្នុងការជំរុញទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសទាំងពីរឱ្យកាន់តែរីកចម្រើន ដោយរំពឹងថា ក្រុមហ៊ុនបារាំងប្រមាណ ៤០០ នឹងមកសិក្សា និងវិនិយោគលើវិស័យអាទិភាពមួយចំនួន រួមមានថាមពល សុខាភិបាល និងកែច្នៃកសិកម្ម។
អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជនសម្រាប់យន្តការវេទិការដ្ឋាភិបាល-វិស័យឯកជន បានជំរុញឱ្យវិស័យឯកជន ចាប់យកឱកាសពីកិច្ចប្រជុំកំពូលហ្វ្រង់កូហ្វូនី និងវេទិកាធុរកិច្ចកម្ពុជា-បារាំង ដើម្បីផ្សព្វផ្សាយសក្តានុពលសេដ្ឋកិច្ច និងឱកាសវិនិយោគរបស់កម្ពុជា ទៅកាន់មេដឹកនាំ និងធុរជនអន្តរជាតិនៃបណ្តាប្រទេសនិយាយភាសាបារាំងដែលមានប្រមាណជាង៦០ប្រទេស។ អ្នកឧកញ៉ា បានចាត់ទុកនេះជាឱកាសមាសមួយ ដើម្បីជួយផ្សព្វផ្សាយ និងធ្វើឲ្យពិភពលោកស្គាល់កម្ពុជាកាន់តែច្បាស់ ហើយឱកាសនេះក៏ជាមធ្យោបាយដ៏សំខាន់មួយក្នុងការកែប្រែការយល់ច្រឡំ ដែលគេយល់ថា កម្ពុជាជាកន្លែងប្រព្រឹត្តិបទល្មើស «Scam Online» ផងដែរ។
តាមរយៈវេទិកាធុរកិច្ចកម្ពុជា-បារាំង ធុរជនកម្ពុជា បារាំង និងធុរជនមកពីប្រទេសនិយាយភាសាបារាំងផ្សេងទៀត នឹងមានឱកាសជួបពិភាក្សាគ្នាដោយផ្ទាល់ ដើម្បីស្វែងយល់ពីតម្រូវការទីផ្សារ លទ្ធភាពនៃភាពជាដៃគូ ហើយកម្ពុជាសង្ឃឹមថា ព្រឹត្តិការណ៍នេះនឹងក្លាយជាកាតាលីករដ៏សំខាន់មួយក្នុងការលើកកម្ពស់កិច្ចសហប្រតិបត្តិការសេដ្ឋកិច្ចរវាងកម្ពុជា និងបារាំងឱ្យឈានដល់កម្រិតថ្មីមួយប្រកបដោយផ្លែផ្កា។
លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម បានគូសបញ្ជាក់ថា ការសហការជាមួយបារាំងក្នុងការរៀបចំវេទិកានេះ មិនត្រឹមតែដើម្បីរៀបចំវេទិកាប៉ុណ្ណោះទេ ប៉ុន្តែគឺដើម្បីបើកទីផ្សារសម្រាប់ផលិតផលសម្រេចរបស់កម្ពុជាគ្រប់ប្រភេទ។ វត្តមានរបស់ប្រទេសសមាជិកហ្វ្រង់កូហ្វូនីទូទាំងពិភពលោក គឺជាឱកាសមួយដែលកម្ពុជាជំរុញការផ្សព្វផ្សាយផលិតផលរបស់ខ្លួនឱ្យគេកាន់តែស្គាល់។ លោកបានឱ្យដឹងថា ក្នុងវេទិកានេះ ក៏នឹងមានការរៀបចំពិព័រណ៍ដើម្បីបង្ហាញបន្ថែមនូវផលិតផល និងវិស័យសក្តានុពលរបស់កម្ពុជា ជាពិសេសវិស័យទេសចរណ៍ និងសុខាភិបាល ដើម្បីបង្កើនភាពទាក់ទាញបន្ថែមទៀត។ (វីដេអូ)
ទន្ទឹមគ្នានេះ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា បានកត់សម្គាល់ថា បើទោះបីជា ប្រព័ន្ធអនុគ្រោះពន្ធ EBA បាត់បង់២០% ក៏ដោយ ប៉ុន្តែនៅ៨០% ទៀតដែលជា ឱកាសដ៏ល្អសម្រាប់កម្ពុជាក្នុងការទាក់ទាញអ្នកវិនិយោគ ជាពិសេសពីប្រទេសបារាំង ដើម្បីផលិតនាំចេញទៅបារាំង និងអឺរ៉ុប។
យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា បារាំងគឺជាដៃពាណិជ្ជកម្មដ៏សំខាន់មួយរបស់កម្ពុជា ដោយក្នុងរយៈពេល៧ខែ ឆ្នាំ២០២៦នេះ កម្ពុជា-បារាំងសម្រេចទំហំពាណិជ្ជកម្ម ជាង៤៣៨លានដុល្លារ កើនឡើង១៣.៩% ក្នុងនោះកម្ពុជានាំចេញទៅបារាំងមានតម្លៃ៣៥១លានដុល្លារ កើនឡើង១៤.៨% ខណៈបារាំងនាំចូលវិញមានតម្លៃជាង៨៧លានដុល្លារ កើនឡើង១០.៦%៕
