(ភ្នំពេញ)៖ លោក ប៉ែន ពេជ្រដារ៉ូ អនុប្រធានការិយាល័យ នៃនាយកដ្ឋានពន្ធចលនទ្រព្យ និងអចលនទ្រព្យ នៃអគ្គនាយកដ្ឋានពន្ធដារ បានបង្ហាញពីប្រភេទដីធ្លី ដែលត្រូវបានលើកលែងពន្ធដីធ្លីមិនបានប្រើប្រាស់។

លោក ប៉ែន ពេជ្រដារ៉ូ បានឲ្យដឹងថា ការលើកលែងពន្ធពន្ធលើដីធ្លីមិនបានប្រើប្រាស់ ត្រូវបានលើកលែងដូចខាងក្រោម៖
* ដីធ្លីមិនបានប្រើប្រាស់ ដែលមានផ្ទៃក្រឡាតិចជាង ឬស្មើ៥ហិកតា សម្រាប់ដីមួយកន្លែង។
* ដីធ្លីមិនបានប្រើប្រាស់ ដែលមានផ្ទៃក្រឡាលើសពី៥ហិកតា ត្រូវបានលើកលែងពន្ធលើដីធ្លីមិនបានប្រើប្រាស់ ស្របតាមលក្ខខណ្ឌណាមួយដូចខាងក្រោម៖
ក៖ ដីកសិកម្មកំពុងបង្កបង្កើនផល ដោយមានការបញ្ជាក់ពីគណៈកម្មការ ឬអនុគណៈកម្មការវាយតម្លៃដី សម្រាប់ពន្ធលើដីធ្លី មិនបានប្រើប្រាស់។
ខ៖ ដីដែលកំពុងបម្រើសកម្មភាពសេដ្ឋកិច្ចរបស់រូបវន្តបុគ្គល ឬនីតិបុគ្គលដែលបានចុះបញ្ជីនៅរដ្ឋបាលសារពើពន្ធ។
គ៖ ដីមានសំណង់ ឬគ្មានសំណង់ស្ថិតក្រោមកិច្ចសន្យាជួល។
ឃ៖ ដីដែលជាកម្មសិទ្ធិរបស់រាជរដ្ឋាភិបាល ឬស្ថាប័នរាជរដ្ឋាភិបាល។
ង៖ ដីដែលជាកម្មសិទ្ធិរបស់សហគមន៍។
ច៖ ដីសម្បទានសេដ្ឋកិច្ចដែលជួលពីរដ្ឋ សម្រាប់ប្រើប្រាស់ជាសកម្មភាពសេដ្ឋកិច្ចផ្សេងៗ។
ឆ៖ ដីជាកម្មសិទ្ធិរបស់រដ្ឋ ដែលបានជួលទៅឱ្យនីតិបុគ្គល ឬរូបវន្តបុគ្គលណាមួយ សម្រាប់ប្រើប្រាស់ជាសកម្មភាពសេដ្ឋកិច្ចផ្សេងៗ តាមកិច្ចសន្យា ឬកិច្ចព្រមព្រៀងរវាងភាគីទាំងពីរ។

លោកបានបញ្ជាក់បន្ថែមថា ក្នុងនោះដីធ្លីមិនបានប្រើប្រាស់ ដែលមានផ្ទៃក្រឡាលើសពី៥ហិកតា ត្រូវបានលើកលែងពន្ធលើដីធ្លីមិនបានប្រើប្រាស់ ស្របតាមលក្ខខណ្ឌណាមួយដូច៖
* ដីដែលស្ថិតនៅក្នុងតំបន់សេដ្ឋកិច្ចពិសេស ដែលបម្រើផ្ទាល់ ដល់សកម្មភាពកសិកម្មឧស្សាហកម្ម និងសេវាកម្ម។
* ដីដែលត្រូវបានចុះបញ្ជីជាទ្រព្យសម្បត្តិរបស់សហគ្រាស ក្នុងវិស័យអប់រំ សិក្សាធិការ និងបណ្តុះបណ្តាលវិជ្ជាជីវៈ សម្រាប់គោលដៅបម្រើការងារ ក្នុងវិស័យដូចបានរៀបរាប់ខាងដើម។

លោកបានបញ្ជាក់ថា ក្នុងករណីដែលដីខាងលើនេះត្រូវបានលក់ ឬមិនត្រូវបានប្រើប្រាស់តាមគោដៅខាងលើ ត្រូវបំពេញកាតព្វកិច្ចពន្ធដារ តាមច្បាប់ និងលិខិតបទដ្ឋានគតិយុត្ត ស្ដីពីពន្ធដារជាធរមាន៕