(ភ្នំពេញ)៖ ធនាគារជាតិនៃកម្ពុជា និង និយ័តករមូលបត្រកម្ពុជា (ន.ម.ក.) តម្រូវឱ្យធនាគារពាណិជ្ជ ដែលមានអាជ្ញាបណ្ណពីធនាគារជាតិនៃកម្ពុជា និង ​និតិបុគ្គដែលមានបំណងផ្តល់សេវាពាក់ព័ន្ធនឹងការប្រើប្រាស់ទ្រព្យនិម្មិតដល់អតិថិជន ត្រូវស្នើសុំការអនុញ្ញាតជាមុនពីធនាគារជាតិនៃកម្ពុជា។ នេះបើយោងតាមសេចក្តីថ្លែងការណ៍រួម ធនាគារជាតិនៃកម្ពុជា និងនិយ័តករមូលបត្រកម្ពុជា ដែលចេញផ្សាយនៅថ្ងៃទី២៤ ខែកញ្ញា ឆ្នាំ២០២៦នេះ​។

សេចក្តីថ្លែងការណ៍នេះបានបញ្ជាក់ថា «ធនាគារពាណិជ្ជ ដែលមានអាជ្ញាបណ្ណពីធនាគារជាតិនៃកម្ពុជា ហើយមានបំណងផ្តល់សេវាដែលពាក់ព័ន្ធ នឹងការប្រើប្រាស់ទ្រព្យនិម្មិតដល់អតិថិជន ត្រូវស្នើសុំការអនុញ្ញាតជាមុនពី ធនាគារជាតិនៃកម្ពុជា​វិសាលភាពនៃសកម្មភាពដែលអនុញ្ញាតនឹងត្រូវកំណត់ក្នុងបទប្បញ្ញត្តិដាច់ដោយឡែក»។

ចំណែកឯ នីតិបុគ្គលក្រៅពីធនាគារពាណិជ្ជ ដែលមានបំណងផ្តល់សេវាទ្រព្យនិម្មិតដល់អតិថិជន ត្រូវស្នើសុំអាជ្ញាបណ្ណជាមុនពីនិយ័តករមូលបត្រកម្ពុជា (ន.ម.ក.)។ បុគ្គលដែលទទួលបានអាជ្ញាបណ្ណ ឬការអនុញ្ញាតទាំងនេះ នឹងត្រូវចាត់ទុកជាបុគ្គលរាយការណ៍ ដែលស្ថិតក្រោមសមត្ថកិច្ចរបស់អង្គភាពស៊ើបការណ៍ហិរញ្ញវត្ថុកម្ពុជា និងត្រូវអនុវត្តកាតព្វកិច្ចស្របតាមច្បាប់ ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។

ជាមួយគ្នា ធនាគារជាតិនៃកម្ពុជា និយ័តករមូលបត្រកម្ពុជាបានរំលឹកដល់សាធារណជន ឱ្យមានការប្រុងប្រយ័ត្នខ្ពស់ចំពោះការជួញដូរ និងការវិនិយោគលើទ្រព្យនិម្មិត ​ឬគ្រីបតូ​ ដើម្បីជៀសវាងការខាតបង់ផងដែរ។

ធនាគារជាតិនៃកម្ពុជា និង ន.ម.ក. មានបំណងរៀបចំក្របខ័ណ្ឌបទប្បញ្ញត្តិរួមគ្នា សម្រាប់អនុវត្តចំពោះសកម្មភាពពាក់ព័ន្ធនឹងទ្រព្យនិម្មិត ដោយផ្អែកលើគោលការណ៍ស្នូលចំនួនបី រួមមាន ការការពារវិនិយោគិននិងអ្នកប្រើប្រាស់ សុចរិតភាពទីផ្សារ និងការគាំទ្រនវានុវត្តន៍។ ស្ថាប័នទាំងពីរបានប្តេជ្ញាជំរុញក្របខ័ណ្ឌត្រួតពិនិត្យប្រកបដោយប្រសិទ្ធភាពសម្រាប់ឧបករណ៍ហិរញ្ញវត្ថុ អ្នកចូលរួមក្នុងទីផ្សារ និងហេដ្ឋារចនាសម្ព័ន្ធទីផ្សារ រួមបញ្ចូលទាំងក្របខ័ណ្ឌពាក់ព័ន្ធនឹងទ្រព្យនិម្មិត។

ការងារអាទិភាពមួយសម្រាប់ស្ថាប័នទាំងពីរ គឺការដាក់ចេញនូវបទប្បញ្ញត្តិច្បាស់លាស់ចំពោះសកម្មភាពដូចជា ការបោះផ្សាយ ការប្តូរ ការជួញដូរ និងការថែរក្សាសុវត្ថិភាពពាក់ព័ន្ធនឹងទ្រព្យនិម្មិត ដើម្បីទប់ស្កាត់ជនទុច្ចរិតរួចផុតពីការបំពានច្បាប់។

ធនាគារជាតិនៃកម្ពុជា និង ន.ម.ក. នឹងបន្តធ្វើការពិគ្រោះយោបល់ជាប្រចាំ និងស្វែងរកការបន្ស៊ីលក្ខខណ្ឌផ្នែកបទប្បញ្ញត្តិ ដើម្បីកាត់បន្ថយបន្ទុក និងទប់ស្កាត់ការទាញយកផលប្រយោជន៍ពីកម្រិតខុសគ្នានៃបទប្បញ្ញត្តិ។ ស្ថាប័នទាំងពីរនឹងសហការលើយន្តការសម្របសម្រួលសម្រាប់ការអភិវឌ្ឍទីផ្សារទ្រព្យនិម្មិតនាពេលអនាគត ដើម្បីធានាបាននូវប្រសិទ្ធភាព និងភាពស័ក្តិសិទ្ធិភាពនៃបទប្បញ្ញត្តិ៕