(ភ្នំពេញ)៖ លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ច បានគូសបញ្ជាក់ថា ការសម្រេចចិត្តរបស់ក្រុមហ៊ុនបច្ចេកវិទ្យាដឹកជញ្ជូន ដែលមិនដំឡើងថ្លៃសេវា និងសុខចិត្តរ៉ាប់រងការខាតបង់មួយផ្នែកពីការឡើងថ្លៃនៃប្រេងឥន្ធនៈ គឺជាយុទ្ធសាស្ត្រសេដ្ឋកិច្ចដ៏ត្រឹមត្រូវ ក្នុងការរក្សាស្ថិរភាពចំនួនអតិថិជន និងធានានូវនិរន្តរភាពនៃសេវាកម្មក្នុងរយៈពេលវែង។

លោកបណ្ឌិតបានពន្យល់តាមទ្រឹស្តីសេដ្ឋកិច្ចថា នៅក្នុងទីផ្សារសេវាដឹកជញ្ជូនសាធារណៈ កត្តាតម្លៃដើរតួនាទីយ៉ាងរសើបចំពោះឥរិយាបថរបស់អ្នកប្រើប្រាស់។ ប្រសិនបើតម្លៃសេវាមានការកើនឡើងតែបន្តិចបន្តួច អតិថិជននឹងងាកទៅរកមធ្យោបាយ ឬទំនិញជំនួសផ្សេងទៀតភ្លាមៗ ដែលជាហេតុធ្វើឱ្យចំនួនអ្នកជិះធ្លាក់ចុះ ហើយប្រាក់ចំណូលសរុបរបស់ក្រុមហ៊ុនក៏ត្រូវថមថយទៅតាមនោះដែរ។ ហេតុដូច្នេះហើយ ក្រុមហ៊ុនបច្ចេកវិទ្យាធំៗមកពីក្រៅប្រទេស ដែលមានផ្នែកសេដ្ឋកិច្ច និងអ្នកវិភាគទីផ្សារច្បាស់លាស់ តែងតែសិក្សាស៊ីជម្រៅអំពីភាពបត់បែននៃតម្រូវការធៀបនឹងថ្លៃ (Price Elasticity of Demand) ដើម្បីរៀបចំយុទ្ធសាស្ត្ររក្សាស្ថិរភាពថ្លៃ សំដៅធានាឱ្យអាជីវកម្មអាចបន្តរស់រាននៅលើទីផ្សារប្រកួតប្រជែង។

កាលពីថ្ងៃទី០៩ ខែតុលា ឆ្នាំ២០២៦ ក្រុមហ៊ុន Grab បានប្រកាសពីការបន្តប្តេជ្ញាចិត្តយ៉ាងម៉ឺងម៉ាត់ ក្នុងការលើកកម្ពស់ភាពធន់របស់សហគមន៍កម្ពុជារយៈពេលវែង អំឡុងពេលនៃការប្រឈមមុខនឹងបញ្ហាសេដ្ឋកិច្ចសកល។ ការកើនឡើងនៃភាពតានតឹងនៅតំបន់មជ្ឈិមបូព៌ា បានបណ្តាលឱ្យតម្លៃប្រេងឥន្ធនៈហក់ឡើងខ្ពស់នៅគ្រប់ទីកន្លែង ដែលបានបង្កើតជាសម្ពាធហិរញ្ញវត្ថុដល់អ្នកធ្វើដំណើរប្រចាំថ្ងៃ អាជីវកម្មក្នុងស្រុក និងដៃគូបើកបរដែលពឹងផ្អែកលើឧស្ម័នឥន្ធនៈរាវ (LPG) និងប្រេងសាំងសម្រាប់មធ្យោបាយដឹកជញ្ជូនប្រចាំថ្ងៃ។

នៅក្នុងត្រីមាសទី១ នៃឆ្នាំ ២០២៦ ក្រុមហ៊ុន Grab បានដាក់ចេញនូវវិធានការគាំទ្រចំគោលដៅជាច្រើន ដើម្បីកាត់បន្ថយផលប៉ះពាល់ពីការកើនឡើងនៃតម្លៃប្រេងឥន្ធនៈ និងវិបត្តិថាមពលសកលមកលើដៃគូបើកបរ។ តាមរយៈកម្មវិធីលើកទឹកចិត្តជាក់លាក់ Grab បានចែកជូនប័ណ្ណទិញឧស្ម័ន LPG និងប័ណ្ណសាំង ដោយផ្អែកលើថវិការកាត់ បន្ថយផលប៉ះពាល់សរុបចំនួន ៧០,០០០ ដុល្លារអាមេរិក។ ការបូកបញ្ចូលគ្នានូវគំនិតផ្តួចផ្តើមក្នុងត្រីមាសទី១ ជាមួយនឹងវិធានការសម្រាលបន្ទុកបន្ថែម ក្នុងត្រីមាសទី៤នេះ ធ្វើឱ្យកញ្ចប់ជំនួយសរុបរបស់ Grab ជូនដល់ដៃគូបើកបរក្នុងឆ្នាំ ២០២៦ នេះ កើនឡើងដល់ ១៥៥,០០០ ដុល្លារអាមេរិក។

អ្នកជំនាញសេដ្ឋកិច្ច លោកបណ្ឌិត គី សេរីវឌ្ឍន៍ បានបន្ថែមថា ក្នុងកាលៈទេសៈដែលតម្លៃប្រេងឥន្ធនៈសកលហក់ឡើងថ្លៃ ដែលបណ្តាលមកពីវិបត្តិទំនាស់នៅតំបន់មជ្ឈិមបូព៌ារយៈពេលជិតមួយឆ្នាំមកនេះ ប្រជាពលរដ្ឋជាច្រើន រួមទាំងរូបលោកផ្ទាល់ បានកាត់បន្ថយការចំណាយលើយានយន្តផ្ទាល់ខ្លួន ហើយងាកមកប្រើប្រាស់សេវាដឹកជញ្ជូនសាធារណៈកាន់តែច្រើន ជាពិសេសការជិះម៉ូតូកង់បី។ ដូច្នេះ ការរក្សាថ្លៃសេវាឱ្យនៅថេរពីសំណាក់ក្រុមហ៊ុន មិនត្រឹមតែជួយទប់ស្កាត់ការបាត់បង់អតិថិជនចាស់ប៉ុណ្ណោះទេ ប៉ុន្តែថែមទាំងជាកាតាលីករស្រូបទាញអ្នកប្រើប្រាស់ថ្មីៗឱ្យមកប្រើប្រាស់សេវាកាន់តែច្រើន ដែលជួយឱ្យចរន្តអាជីវកម្មបន្តដំណើរការទៅមុខដោយរលូន។

ទោះជាយ៉ាងណា លោកបណ្ឌិត គី សេរីវឌ្ឍន៍ ក៏បានក្រើនរំលឹកផងដែរថា ស្របពេលដែលក្រុមហ៊ុនបញ្ចេញការចំណាយផ្ទាល់ខ្លួនដើម្បីរក្សាស្ថិរភាពថ្លៃសម្រាប់អតិថិជន ក្រុមហ៊ុនក៏ត្រូវតែគិតគូរឱ្យបានដិតដល់ពីស្ថានភាពជាក់ស្តែងរបស់ដៃគូដឹកជញ្ជូន និងអ្នករត់កង់បីផងដែរ។ ការបែងចែកប្រាក់ចំណេញប្រកបដោយសមធម៌ និងសមរម្យ នឹងជួយកាត់បន្ថយសម្ពាធជីវភាពរបស់បងប្អូនអ្នកដឹកជញ្ជូន ហើយធ្វើឱ្យកិច្ចសហប្រតិបត្តិការរវាងក្រុមហ៊ុន និងដៃគូផ្គត់ផ្គង់សេវាកាន់តែមានភាពរឹងមាំ យូរអង្វែង និងស្របតាមច្បាប់នៃព្រះរាជាណាចក្រកម្ពុជា៕