(ភ្នំពេញ)៖ ធនាគាររដ្ឋចំនួនពីរ រួមមាន ធនាគារអភិវឌ្ឍន៍ជនបទ និងកសិកម្ម (ARDB) និងធនាគារសហគ្រាសធុនតូច និងមធ្យម កម្ពុជា (SME Bank) បានរួមចំណែកយ៉ាងសំខាន់ក្នុងការផ្តល់ឥណទានសរុបប្រមាណជាង ១,១ ពាន់លានដុល្លារអាម៉េរិក ដល់សហគ្រាសធុនមីក្រូ តូច និងមធ្យម (MSMEs) សម្រាប់ទ្រទ្រង់ និងពង្រីកដំណើរការអាជីវកម្មរបស់ខ្លួន។ នេះបើយោងតាមប្រសាសន៍របស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅក្នុងវេទិកាថ្នាក់ជាតិ ស្តីពីហិរញ្ញប្បទានសម្រាប់ MSMEs លើកទី១ នាថ្ងៃទី២៧ ខែតុលា ឆ្នាំ២០២៦នេះ។

អគ្គបណ្ឌិតសភាចារ្យ អូន ព័ន្ធមុនីរ័ត្ន បានគូសបញ្ជាក់ថា ក្នុងការផ្តល់ឥណទាន ដែលមានការប្រាក់សមរម្យ និង លក្ខខណ្ឌអនុគ្រោះខ្ពស់ ធនាគារអភិវឌ្ឍន៍ជនបទ និង កសិកម្ម រួមចំណែកផ្ដល់ ហិរញ្ញប្បទានបៃតង និងហិរញ្ញប្បទាន ប្រកបដោយចីរភាព ក្នុងការគាំទ្រដល់វិស័យកសិកម្ម និងការអភិវឌ្ឍសេដ្ឋកិច្ចជនបទ ដោយបានផ្តល់សំពៀតឥណទាន សរុបប្រមាណ ៥៣០ លានដុល្លារអាម៉េរិក ជូនដល់ MSMEs ក្រុមហ៊ុន សហគមន៍កសិកម្ម និងតួអង្គពាក់ព័ន្ធ ក្នុងខ្សែច្រវាក់តម្លៃកសិកម្ម និងកសិ-ឧស្សាហកម្ម ។

រីឯ ធនាគារសហគ្រាសធុនតូច និង មធ្យមកម្ពុជា (SME Bank) ចូលរួមផ្ដល់ហិរញ្ញប្បទានដល់ MSMEs ក្នុងវិស័យអាទិភាពនានា ស្របតាមគោលនយោបាយ របស់រាជរដ្ឋាភិបាល ដោយបានបញ្ចេញ នូវហិរញ្ញប្បទានផ្ទាល់ និងតាមរយៈគម្រោងសហហិរញ្ញប្បទាន នូវទឹកប្រាក់សរុប ចំនួនប្រមាណ ៦៥០ លានដុល្លារអាម៉េរិក ជូនដល់សហគ្រាសធុនតូច និង មធ្យម ចំនួនប្រមាណ ៤ ០០០។

បន្ថែមពីលើនេះ MSMEs ក៏ទទួលបានអត្ថប្រយោជន៍ពីការធានាឥណទានពីសាជីវកម្មធានាឥណទានកម្ពុជា ដែលបានផ្តល់ការធានាលើឥណទានជិត ៦០០ លានដុល្លារអាម៉េរិក ដល់គណនីសរុប ៩ ៨៩១ គណនី ដែលក្នុងនោះ ៩២% ជាគណនីរបស់ MSMEs។

ទន្ទឹមនឹងនេះ ផ្សារមូលបត្រកម្ពុជាក៏បានបើកទូលាយលទ្ធភាពកៀរគរទុនសម្រាប់ SMEs តាមរយៈទីផ្សារកំណើន ដោយមានលក្ខខណ្ឌអំណោយផល និងតម្រូវការដើមទុនអប្បបរមាត្រឹម ៥០ ម៉ឺនដុល្លារអាម៉េរិក និងប្រាក់ចំណេញត្រឹមមួយឆ្នាំប៉ុណ្ណោះ។

ជាក់ស្តែង ក្រុមហ៊ុនចំនួន ៣ បានចុះបញ្ជីជួញដូរដោយរលូនក្នុងទីផ្សារនេះ ជាមួយនឹងទំហំទឹកប្រាក់សរុបប្រមាណ ១៤ លានដុល្លារអាម៉េរិក។ ការគាំទ្រទាំងនេះបង្ហាញពីការប្តេជ្ញាចិត្តរបស់រាជរដ្ឋាភិបាលក្នុងការជំរុញកំណើន និងនិរន្តរភាពរបស់ MSMEs ដែលជាឆ្អឹងខ្នងនៃសេដ្ឋកិច្ចជាតិ៕