(ភ្នំពេញ)៖ លោកបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុក ជាអគ្គនាយកធនាគារ ARDB បានលើកឡើងពីបញ្ហាចម្បងចំនួន២ ដែលសហគ្រាសធុនមីក្រូ តូច និងមធ្យម (MSMEs) នៅកម្ពុជា កំពុងប្រឈមនឹងឧបសគ្គគឺ ការទទួលបានហិរញ្ញប្បទាន (ទុន) និងការចូលទៅកាន់ទីផ្សារ ដែលរដ្ឋ និងភាគីពាក់ព័ន្ធត្រូវទទួលស្គាល់ និងជំរុញការដោះស្រាយ។

លោកចាត់ទុកថា អាជីវកម្មមួយខ្វះទុន នោះប្រៀបដូចជាដើមឈើដែលខ្វះជីជាតិ និងខ្វះទឹក។ ហើយប្រសិនបើមានទុនតែខ្វះ ទីផ្សារនោះប្រៀបដូចជាយើងដាំដើមឈើបានផ្លែផ្អែមត្រជាក់ ហើយ តែត្រូវទុកឱ្យជ្រុះរលួយចោលក្រោមដើម ដោយគ្មានអ្នកទទួលទាន។

ថ្លែងក្នុងវេទិកាថ្នាក់ជាតិ ស្តីពីហិរញ្ញប្បទានសម្រាប់សហគ្រាសធុនមីក្រូ តូច និងមធ្យម (MSMEs) លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» នៅថ្ងៃទី២៧ ខែតុលា ឆ្នាំ២០២៦នេះ លោកបណ្ឌិត កៅ ថាច មានប្រសាសាន៍ថា បញ្ហាទុន សហគ្រាសភាគច្រើនជាអាជីវកម្មក្រៅប្រព័ន្ធ ឬលក្ខណៈគ្រួសារ ដែលខ្វះទ្រព្យធានាដូចជាប្លង់រឹង និងកង្វះការកត់ត្រាបញ្ជីគណនេយ្យត្រឹមត្រូវ ធ្វើឱ្យគ្រឹះស្ថានធនាគារពិបាកវាយតម្លៃហានិភ័យ។ នេះបណ្ដាលឱ្យសហគ្រិនមួយចំនួន ងាកទៅរកប្រភពទុនក្រៅប្រព័ន្ធ ដែលមានការប្រាក់ខ្ពស់ ក្លាយជាបន្ទុកបំណុល និងធ្វើឱ្យអាជីវកម្មដួលរលំ។

ចំណែកឯបញ្ហាទីផ្សារវិញ ផលិតផលខ្មែរមានគុណភាពល្អ វត្ថុធាតុដើមធម្មជាតិ និងស្នាដៃកូនខ្មែរពូកែ ប៉ុន្តែនៅតែពិបាកប្រកួតប្រជែង។ កង្វះបច្ចេកវិទ្យាកែច្នៃ ការវេចខ្ចប់ ស្តង់ដារគុណភាព បណ្ដាញចែកចាយ និងការលំបាកក្នុងការដាក់លក់លើធ្នើរផ្សារទំនើបធំៗ ជាពិសេសនៅរាជធានីភ្នំពេញ គឺជាឧបសគ្គចម្បង។ លើសពីនេះ យុទ្ធនាការជំរុញឱ្យប្រជាពលរដ្ឋគាំទ្រផលិតផលក្នុងស្រុកក៏នៅមានកម្រិតនៅឡើយ។

លោកគូសបញ្ជាក់ថា បញ្ហាប្រឈមទាំងពីរនេះ ទាមទារឱ្យភាគីពាក់ព័ន្ធទាំងអស់រួបរួមគ្នាដោះស្រាយ ដើម្បីរក្សាតុល្យភាពសេដ្ឋកិច្ចជាតិ និងធានាភាពម្ចាស់ការលើសន្តិសុខស្បៀង និងផលិតកម្មក្នុងស្រុក៕