មេពន្ធដារកម្ពុជា ជំរុញឱ្យភ្នាក់ងារសេវាកម្មពន្ធដារទាំងអស់ ប្រកាន់ខ្ជាប់នូវក្រមសីលធម៌វិជ្ជាជីវៈ ផ្តល់សេវា និងយោបល់ដល់អតិថិជនរបស់ខ្លួនឱ្យបានត្រឹមត្រូវ
27-10-2026 18:22
(ភ្នំពេញ)៖ លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានពន្ធដារ បានជំរុញឱ្យភ្នាក់ងារសេវាកម្មពន្ធដារទាំងអស់ប្រកាន់ខ្ជាប់នូវក្រមសីលធម៌វិជ្ជាជីវៈ ផ្តល់សេវា និងយោបល់ដល់អតិថិជនរបស់ខ្លួនឱ្យបានត្រឹមត្រូវ ស្របតាមច្បាប់ និងលិខិតបទដ្ឋានគតិយុត្តជាធរមាន ព្រមទាំងពង្រឹងគណនេយ្យភាព តម្លាភាព និងគុណភាពនៃការផ្តល់សេវាជូនអ្នកជាប់ពន្ធ ដើម្បីធានាគុណតម្លៃនៃវិជ្ជាជីវៈនេះ។
ការជំរុញរបស់លោក គង់ វិបុល ធ្វើឡើងក្នុងសិក្ខាសាលា ស្តីពី “សិទ្ធិ កាតព្វកិច្ច និងក្រមសីលធម៌របស់ភ្នាក់ងារសេវាកម្មពន្ធដារ” នាព្រឹកថ្ងៃទី២៧ ខែតុលា ឆ្នាំ២០២៦ អគារទីស្នាក់ការកណ្តាលនៃអគ្គនាយកដ្ឋានពន្ធដារ។
បន្ថែមពីនេះ លោកបានស្នើឱ្យសហគ្រាសទាំងអស់ បន្តបំពេញកាតព្វកិច្ចសារពើពន្ធឱ្យបានត្រឹមត្រូវទាំងអស់គ្នា ក្នុងស្មារតីទទួលខុសត្រូវ សាមគ្គីភាព ភាតរភាព និងចូលរួមគ្នាអភិវឌ្ឍឧត្តមប្រយោជន៍ជាតិទាំងអស់គ្នា ហើយការចូលរួមពង្រឹង “អភិបាលកិច្ចសាជីវកម្ម (Corporate Governance)” ដើម្បីចូលរួមលើកកម្ពស់ការប្រកួតប្រជែងស្មើភាព និងបរិយាកាសធុរកិច្ចនៅកម្ពុជា។
លោកអគ្គនាយក ស្នើឱ្យភ្នាក់ងារសេវាកម្មពន្ធដារ ចៀសវាងការជួយជ្រោមជ្រែងដល់សហគ្រាស ដែលប្រកាសពន្ធមិនត្រឹមត្រូវក្នុងចេតនាកេងបន្លំប្រាក់ពន្ធ ដើម្បីការពារប្រយោជន៍របស់សង្គមជាតិយើង។
លោកបានរំលឹកភ្នាក់ងារសេវាកម្មពន្ធដារ អំពីកាតព្វកិច្ចរក្សាការសម្ងាត់នៃព័ត៌មាន ដើម្បីការពារសិទ្ធិ ផលប្រយោជន៍ស្របច្បាប់ និងទំនុកចិត្តរបស់អតិថិជន។
លោកសង្កត់ធ្ងន់ថា «ការឈរឈ្មោះជំនួសសហគ្រាសក្នុងគោលបំណងគេចវេះពន្ធ ការឃុបឃិតរៀបចំផែនការគេចវេះពន្ធ និងការផ្តល់ឯកសារមិនពិត ឬក្លែងបន្លំក្នុងចេតនាកេងបន្លំពន្ធ អាចប្រឈមនឹងការទទួលខុសត្រូវព្រហ្មទណ្ឌតាមច្បាប់ជាធរមាន»។
បន្ថែមពីនេះ លោកសូមលើកទឹកចិត្តឱ្យសហគ្រាសទាំងអស់ធ្វើការជិតស្និទ្ធ និងដោយផ្ទាល់ជាមួយ អពដ. ហើយចំពោះរាល់បញ្ហាដែលមាន សូមមេត្តាទាក់ទងមកអពដ. តាមរយៈលេខ ១២៧៧ ឬអាចសាកសួរព័ត៌មានបានតាម GDT Chatbot “Beauramei” និងសូមឱ្យអ្នកជាប់ពន្ធ និងសាធារណជនទាំងអស់ចូលរួមប្រើប្រាស់កម្មវិធី GDT HomeTax ដែលផ្តល់ភាពងាយស្រួលក្នុងការបំពេញកាតព្វកិច្ច៕
