(ភ្នំពេញ)៖ លោក សុខ ចិន្តាសោភា ឧបនាយករដ្ឋមន្រ្តី បានណែនាំដល់សហគ្រាសធុនមីក្រូ តូច និងមធ្យម (MSMEs) ឱ្យរៀបចំខ្លួនឱ្យបានរឹងមាំ តាមរយៈការកត់ត្រាចំណូលចំណាយឱ្យច្បាស់លាស់ ការគ្រប់គ្រងប្រកបដោយតម្លាភាព ការបង្កើនជំនាញ និងការប្រើប្រាស់បច្ចេកវិទ្យា ដោយលោកបានសង្កត់ធ្ងន់ថា កិច្ចការទាំងមិនមែនជាបន្ទុករដ្ឋបាលទេ ប៉ុន្តែជាការវិនិយោគលើអនាគតអាជីវកម្ម ដើម្បីបង្កើនភាពជឿទុកចិត្តពីគ្រឹះស្ថានហិរញ្ញវត្ថុ និងបង្កើនលទ្ធភាពទទួលបានហិរញ្ញប្បទាន។

ឧបនាយករដ្ឋមន្រ្តី សុខ ចិន្តាសោភា គូសបញ្ជាក់បែបនេះធ្វើឡើង ក្នុងឱកាសអញ្ជើញជាអធិបតីក្នុងពិធីបិទវេទិកាថ្នាក់ជាតិ ស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» ដែលបានប្រព្រឹត្តទៅនៅមជ្ឈមណ្ឌលសន្និបាត និងពិព័រណ៍កោះពេជ្រ នារសៀលថ្ងៃទី២៨ ខែតុលា ឆ្នាំ២០២៦នេះ។

លោកមានប្រសាសន៍បន្តថា «សូមលើកទឹកចិត្តដល់សហគ្រាសធុនមីក្រូ តូច និងមធ្យម ឱ្យបន្តពង្រឹងអភិបាលកិច្ច កែលម្អការគ្រប់គ្រង និងប្រតិបត្តិការអាជីវកម្ម ព្រមទាំងអភិវឌ្ឍចំណេះដឹង និងជំនាញជាប្រចាំ ដើម្បីបង្កើនភាពជឿទុកចិត្តពីគ្រឹះស្ថានហិរញ្ញវត្ថុ និងបង្កើនលទ្ធភាពទទួលបានហិរញ្ញប្បទាន ព្រមទាំងជំរុញការធ្វើបរិវត្តកម្មឌីជីថល តាមរយៈការប្រើប្រាស់បច្ចេកវិទ្យាឌីជីថលក្នុងការគ្រប់គ្រង និងប្រតិបត្តិការអាជីវកម្ម ដើម្បីបង្កើនផលិតភាព ប្រសិទ្ធភាព និងតម្លៃបន្ថែម ព្រមទាំងពង្រឹងសមត្ថភាពប្រកួតប្រជែងក្នុងទីផ្សារជាតិ និងអន្តរជាតិ»។

លោកបានលើកឡើងផងដែរថា លទ្ធភាពទទួលបានហិរញ្ញប្បទាននៅតែជាបញ្ហាប្រឈមចំពោះសហគ្រាសធុនមីក្រូ តូច និងមធ្យម (MSMEs) នៅកម្ពុជា ដោយសារកង្វះឯកសារហិរញ្ញវត្ថុ ទ្រព្យធានា និងប្រព័ន្ធគ្រប់គ្រង។
លោកបានលើកទឹកចិត្តដល់គ្រឹះស្ថានធនាគារ និងហិរញ្ញវត្ថុ ឱ្យបន្តស្វែងរកវិធីឆ្លើយតបនឹងស្ថានភាពពិតរបស់ MSMEs ដោយអភិវឌ្ឍផលិតផល និងឧបករណ៍ហិរញ្ញប្បទានប្រកបដោយនវានុវត្តន៍ ព្រមទាំងដាក់ចេញយន្តការកាត់បន្ថយហានិភ័យ។ ក្នុងន័យនេះ លោកបានស្វាគមន៍វឌ្ឍនភាពរបស់សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ដែលបានអនុវត្តសកម្មភាពអាទិភាពចំនួន ១៦ ក្នុងចំណោម ២២ ដើម្បីពង្រឹងការផ្តល់ហិរញ្ញវត្ថុប្រកបដោយការទទួលខុសត្រូវ។

ជាមួយគ្នានេះ លោកក៏បានអំពាវនាវដល់ក្រសួង ស្ថាប័ន និងដៃគូទាំងអស់ ឱ្យធ្វើការរួមគ្នាឱ្យកាន់តែជិតស្និទ្ធ ដើម្បីសម្រួលនីតិវិធី ការបណ្តុះបណ្តាល ការលើកកម្ពស់ឌីជីថល និងការផ្សារភ្ជាប់ទីផ្សារ ឱ្យដើរទន្ទឹមនឹងការផ្តល់ហិរញ្ញប្បទាន។ទន្ទឹមគ្នានេះ ការបន្តរៀបចំវេទិកាថ្នាក់ជាតិនេះ នឹងជួយពិភាក្សាអំពីបញ្ហាប្រឈម កាលានុវត្តភាព និងដំណោះស្រាយ ដើម្បីរួមចំណែកកសាងប្រព័ន្ធហិរញ្ញវត្ថុប្រកបដោយភាពរឹងមាំ បរិយាបន្ន និងចីរភាពនៅកម្ពុជា៕