(ភ្នំពេញ)៖ លោក សុខ ចិន្តាសោភា ឧបនាយករដ្ឋមន្ត្រី នារសៀលថ្ងៃទី២៨ ខែតុលា ឆ្នាំ២០២៦នេះ បានអញ្ជើញជាអធិបតីក្នុងពិធីបិទវេទិកាថ្នាក់ជាតិ ស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦ ក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs» ដែលបានប្រព្រឹត្តទៅនៅមជ្ឈមណ្ឌលសន្និបាត និងពិព័រណ៍កោះពេជ្រ។

នាឱកាសនោះ លោកបានវាយតម្លៃខ្ពស់ចំពោះធនាគារអភិវឌ្ឍន៍ជនបទ និងកសិកម្ម (ARDB) និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ដែលបានរៀបចំវេទិកាដ៏មានសារៈសំខាន់នេះ។

ទន្ទឹមគ្នានេះ លោកបានលើកឡើងថា រាជរដ្ឋាភិបាលអាណត្តិទី៧ ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី បានបន្តពង្រឹងប្រព័ន្ធគាំទ្រ MSMEs តាមរយៈយុទ្ធសាស្ត្របញ្ចកោណ ដំណាក់កាលទី១ និង «យុទ្ធសាស្ត្រជាតិស្តីពីការអភិវឌ្ឍសហគ្រាសធុនមីក្រូ តូច និងមធ្យម ឆ្នាំ២០២៦-២០៣០» ដែលទើបដាក់ឱ្យអនុវត្តជាផ្លូវការ។ យុទ្ធសាស្ត្រនេះបានកំណត់ទិសដៅច្បាស់លាស់ក្នុងការជំរុញ MSMEs ឱ្យក្លាយជាមូលដ្ឋានគ្រឹះដ៏រឹងមាំនៃកំណើនសេដ្ឋកិច្ចជាតិ។

បន្ថែមពីនេះនេះ លោកបានផ្តល់អនុសាសន៍សំខាន់ៗចំនួនបួន៖ ទីមួយ ជំរុញឱ្យសហគ្រិនរៀបចំខ្លួនឱ្យបានរឹងមាំ តាមរយៈការកែលម្អអភិបាលកិច្ច ការគ្រប់គ្រង និងការប្រើប្រាស់បច្ចេកវិទ្យាឌីជីថល។ ទីពីរ លើកទឹកចិត្តធនាគារ និងគ្រឹះស្ថានហិរញ្ញវត្ថុឱ្យអភិវឌ្ឍផលិតផលហិរញ្ញប្បទានប្រកបដោយនវានុវត្តន៍ និងយន្តការកាត់បន្ថយហានិភ័យ។ ទីបី ជំរុញក្រសួង ស្ថាប័ន និងដៃគូទាំងអស់ឱ្យធ្វើការរួមគ្នាឱ្យកាន់តែជិតស្និទ្ធ ដើម្បីសម្រួលនីតិវិធី ការបណ្តុះបណ្តាល និងការផ្សារភ្ជាប់ទីផ្សារ។ ទីបួន លើកទឹកចិត្តឱ្យបន្តរៀបចំវេទិកាថ្នាក់ជាតិនេះជាបន្តបន្ទាប់ ដើម្បីពិភាក្សា និងកំណត់ទិសដៅអាទិភាពរួម។

លោក ឧបនាយករដ្ឋមន្រ្តី សុខ ចិន្តាសោភា បានសម្តែងនូវជំនឿយ៉ាងមុតមាំថា ក្រោមការដឹកនាំប្រកបដោយចក្ខុវិស័យរបស់សម្តេចមហាបវរធិបតី ហ៊ុន ម៉ាណែត និងដោយមានការចូលរួមពីគ្រប់ភាគីពាក់ព័ន្ធ កម្ពុជានឹងអាចកសាងប្រព័ន្ធអេកូឡូស៊ីហិរញ្ញវត្ថុមួយដែលមានភាពរឹងមាំ បរិយាបន្ន និងប្រសិទ្ធភាព ដើម្បីជំរុញ MSMEs ឱ្យក្លាយជាកម្លាំងចលករដ៏សំខាន់ក្នុងការលើកកម្ពស់ផលិតភាព និងជំរុញកំណើនសេដ្ឋកិច្ចកម្ពុជាប្រកបដោយចីរភាព៕