(ភ្នំពេញ)៖ អ្នកជំនួញជើងចាស់ឧកញ៉ាឱសថបណ្ឌិត ហៃ លីអ៊ាង ប្រធានអគ្គនាយកសហគ្រាស PPM-Confirel លើកឡើងថា សង្គមទាំងមូលត្រូវយល់ដឹងពីតម្លៃពិតប្រាកដនៃផលិតកម្ម ព្រោះការមានលុយតែមួយមុខ ដោយគ្មានផលិតកម្មរឹងមាំ នឹងមិនអាចជួយអភិវឌ្ឍប្រទេសបានឡើយ ដូច្នេះការយល់ដឹងពីតម្លៃពិតប្រាកដនៃផលិតកម្ម នឹងធ្វើឱ្យផលិតកម្មរឹងមាំ រួមចំណែកអភិវឌ្ឍសេដ្ឋកិច្ចជាតិប្រកបដោយចីរភាព។

យ៉ាងណាមិញ លោកបានកត់សម្គាល់ថា សេដ្ឋកិច្ចកម្ពុជាបច្ចុប្បន្នកំពុងពឹងផ្អែកខ្លាំងលើវិស័យសេវាកម្ម ខណៈវិស័យផលិតកម្មនៅមានកម្រិតនៅឡើយ។ ការពឹងផ្អែកនេះបានលើកឡើងនូវសំណួរជាច្រើន អំពីនិរន្តរភាព និងសមត្ថភាពប្រកួតប្រជែងរបស់ប្រទេស។ បញ្ហាប្រឈមចម្បងៗដែលវិស័យផលិតកម្មជួបប្រទះ រួមមានភាពស្មុគស្មាញនៃបទប្បញ្ញត្តិ ច្បាប់មួយចំនួនដែលធ្វើឱ្យការវិនិយោគធ្ងន់ធ្ងរ ព្រមទាំងទំហំផលិតកម្មខ្នាតតូច ដែលពិបាកនឹងប្រកួតប្រជែងជាមួយទីផ្សារអន្តរជាតិ។

ដើម្បីជំរុញវិស័យផលិតកម្មឱ្យមានការរីកចម្រើន និងឈានទៅរកតុល្យភាពជាមួយវិស័យសេវាកម្ម ទាំងធុរជន និងរាជរដ្ឋាភិបាលចាំបាច់ត្រូវសហការគ្នាដើម្បីកំណត់អត្តសញ្ញាណ និងដោះស្រាយឧបសគ្គនានា។

បន្ថែមពីនេះ ឧកញ៉ាឱសថបណ្ឌិត ហៃ លីអ៊ាង បានគូសបញ្ជាក់ថា បច្ចុប្បន្នកម្ពុជានៅមានភាពខ្វះខាតច្រើនក្នុងវិស័យផលិតកម្ម ដោយភាគច្រើនពឹងផ្អែកលើការនាំចូល និងការលក់បន្ត ដែលខុសពីវិស័យផលិតកម្មដែលទាមទារកម្លាំងពលកម្មច្រើន និងការយល់ដឹងស៊ីជម្រៅពីទីផ្សារ និងផលិតផល។

លោកឧកញ៉ាបានសង្កត់ធ្ងន់ថា ការបង្កើតផលិតផលដែលអាចប្រកួតប្រជែងបាន និងស្វែងរកទីផ្សារ គឺជារឿងចាំបាច់។ លើសពីនេះ សង្គមទាំងមូលត្រូវយល់ដឹងពីតម្លៃពិតប្រាកដនៃផលិតកម្ម ព្រោះការមានលុយតែមួយមុខដោយគ្មានផលិតកម្មរឹងមាំ មិនអាចជួយអភិវឌ្ឍប្រទេសបានឡើយ។ ផលិតកម្មនឹងជួយចែកចាយតម្លៃសេដ្ឋកិច្ចដល់គ្រប់ភាគី និងធ្វើឲ្យប្រជាជនមានជីវភាពធូរធារគ្រប់គ្នា ដូចជាប្រទេសវៀតណាមជាដើម ដែលជាគំរូដ៏ល្អក្នុងការបង្កើតផលិតផលរបស់ខ្លួន និងបំពេញតម្រូវការក្នុងស្រុក។ ការយកគំរូតាមវៀតណាមត្រឹមពាក់កណ្ដាល ក៏អាចនាំមកនូវវឌ្ឍនភាពគួរឲ្យកត់សម្គាល់ដល់កម្ពុជាផងដែរ៕