(ភ្នំពេញ)៖ រឿង «កូនក្រក» ​ដែលជារឿងនិយាយអំពីមន្តអាគមកូនក្រក ដោយបានវះយកពីស្រ្ដីមានផ្ទៃពោះនោះ ​ត្រូវបានផលិតកម្ម LD Picture ដាក់រៀបចំកម្មវិធីសម្ពោធ​បញ្ចាំងជាផ្លូវការ កាលពីថ្ងៃទី ០៧ ខែតុលា ឆ្នាំ ២០១៨ យប់មិញនេះ ស្ថិតនៅក្នុងផ្សារទំនើបអ៊ីអនម៉ល សាខាទី១ ជាន់ទី២ ដោយមានការចូលរួមពីសំណាក់ តារាសម្ដែង ផលិតករ អ្នកគាំទ្រ និង ភ្ញៀវកិត្តិយសយ៉ាងច្រើនកុះករ។

ម្ចាស់ផលិតកម្ម LD Picture លោក លៀក លីដា បានឲ្យដឹងថា នេះគឺជាទស្សនិយភាពប្លែកមួយ ខណៈកាលពីកន្លងមក រឿងព្រែង​ពាក់ព័ន្ធទៅនឹង​កូនក្រក ដែលក្មេងជំនាក់ក្រោយ ពុំសូវមានការយល់ដឹង មិនចាប់អារម្មណ៍ និងមិនសូវស្គាល់​នោះទេ។ តាមពិតទៅ រឿង «កូនក្រក» មិនបានភ្ជាប់ជាមួយនឹងរឿងអា រ៉ាស្មាច់នោះទេ ប៉ុន្តែគ្រាន់តែលើកយកប្រវត្តិត្រួសៗ និយាយពាក់ព័ន្ធនឹងរឿងកូនក្រក តែប៉ុណ្ណោះ។

លោកបានបញ្ជាក់ថា «សម្រាប់រឿងមួយនេះ មិនមែន​បង្កើតឡើង ដើម្បីឲ្យទស្សនិកជន ជឿទៅលើកូនក្រកនេះទេ ហើយក៏មិនមែនចង់ឲ្យមហាជន អនុវត្តន៍ ឬ​ប្រព្រឹត្តអំពើអាក្រក់ ដើរសម្លាប់ស្រ្ដីមានផ្ទៃពោះ​នោះដែរ ប៉ុន្តែគ្រាន់តែចង់ឲ្យមហាជន បានស្គាល់អំពីសាច់រឿង និង​ដំណើរដើមទង នៃកូនក្រក​តែប៉ុណ្ណោះ។ ម្យ៉ាងវិញទៀត រឿងមួយនេះ គឺជាស្នាដៃសម្រិតសម្រាំងមួយ របស់ផលិតកម្ម សម្រាប់ជាចំណីអារម្មណ៍របស់ទស្សនិកជន នាចុងឆ្នាំ ២០១៨នេះ។ អ្វីដែលកាន់តែពិសេស ស្នាដៃមួយនេះ គឺផ្ដោតសំខាន់ទៅលើជំនឿ កូនក្រក ដែលប្រជាជនខ្មែរ តែងមានជំនឿខ្លាំង កាលពីបុរាណកាលមក»។

លោក លៀក លីដា បង្ហាញពីការរំពឹងទុកថា ស្នាដៃថ្មីរបស់ផលិតកម្ម LD Picture មួយនេះ ពិតជាទាក់ទាញខ្លាំងសម្រាប់អ្នកទស្សនា ព្រោះមិនត្រឹមតែបង្ហាញពីការជំនឿ លើកូនក្រកប៉ុណ្ណោះទេ គឺថែមទាំងមានឈុតឆាកជាច្រើនទៀត ប្រជុំដោយតារាល្បីៗចូលរួមសម្ដែង​។​ រយៈពេល៥ខែកន្លង ទៅរឿងខ្មែរ​ស្ទើរ៩០% ជារឿងខ្មោច។ ដោយឡែករឿង «កូនក្រក» ជារសជាតិថ្មីខុសពីគេ ព្រោះជារឿងឃាតកម្ម ដូចនេះលោកគិតថា​ទស្សនិកជននឹងគាំទ្រ។

សូមជម្រាបថា រឿង «កូនក្រក» ជាការដឹកនាំសម្ដែងដោយ លោក ពែក មី និង​មានការចូលរួមសម្ដែងពីសំណាក់តារាល្បីៗជាច្រើន មានដូចជា អ្នកនាង សុខ សោម៉ាវត្តី, សួង សុខារ៉ានីត, កញ្ញា ហេង ចន្ថា, នាយគ្រឿន, លោក សុវណ្ណ ដានីន, លោក ឡាយ វណ្ណាយុទ្ធ និង​តារាសម្ដែងជាច្រើនដួងទៀត៕