លោក គន់ គីម ផ្តល់ដំបូន្មានមួយចំនួនដល់យុវជនបក្សប្រជាជនកម្ពុជាខេត្តឧត្តរមានជ័យ ដើម្បីជ្រោងទង់បក្សឲ្យកាន់តែរឹងមាំ និងដណ្តើមជោគជ័យក្នុងការបោះឆ្នោត
28-06-2018 18:29
(ឧត្តរមានជ័យ)៖ លោក គន់ គីម សមាជិកអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារគណៈកម្មាធិការកណ្តាលចុះជួយខេត្តឧត្តរមានជ័យនៃគណបក្សប្រជាជនកម្ពុជា នៅថ្ងៃទី២៨ ខែមិថុនា ឆ្នាំ២០១៨នេះ បានចូលរួមក្នុងពិធីបិទវគ្គបំប៉នយុវជន និងអ្នកសង្កេតការណ៍បោះឆ្នោតរបស់ស្រុកអន្លង់វែង និងស្រុកបន្ទាយអំពិល ប្រមាណជា ១,០០០នាក់។
ក្នុងពិធីនោះមន្ត្រីជាន់ខ្ពស់គណបក្សប្រជាជនកម្ពុជារូបនេះ បានធ្វើបទបង្ហាញមួយចំនួនស្តីពីប្រវត្តិគណបក្សប្រជាជនកម្ពុជា និងស្នាដៃធំៗជាច្រើនរបស់ថ្នាក់ដឹកនាំបក្សក្នុងបុព្វហេតុជាតិមាតុភូមិ ជាពិសេសសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលបានប្រើយុទ្ធសាស្ត្រជាច្រើន ដើម្បីបិទបញ្ចប់ភ្លើងសង្គ្រាមនៅកម្ពុជា នាំមកវិញនូវសុខសន្តិភាព និងការបង្រួបបង្រួមជាតិមិនធ្លាប់មានអស់រយៈពេលជាង ៥០០ឆ្នាំក្នុងប្រវត្តិសាស្ត្ររបស់កម្ពុជា តាំងពីក្រោយបែកបាក់អាណាចក្រអង្គរ។
លោក គន់ គីម បានលើកឡើងថា ស្នាដៃក្នុងបុព្វហេតុជាតិរបស់សម្តេចតេជោ ហ៊ុន សែន គឺគុណធម៌ប្រវត្តិសាស្ត្រចារិកក្នុងព្រឹត្តិការណ៍ជាតិមិនអាចមានអ្វីមកគូសលុបបំបាត់បានឡើយ ហើយក៏ជាគុណបំណាចមួយដែលនាំឲ្យប្រជាពលរដ្ឋខ្មែរផ្តល់តម្លៃ និងបោះឆ្នោតគាំទ្រឲ្យគណបក្សប្រជាជនកម្ពុជាដឹកនាំប្រទេសចាប់តាំងពីអាណត្តិទី១រហូតដល់មក។
ក្រៅពីបង្ហាញនូវគុណសម្បត្តិ ក៏ដូចជាស្នាដៃរបស់គណបក្សប្រជាជនកម្ពុជាក្នុងបុព្វហេតុជាតិហើយនោះ លោក គន់ គីម ក៏បានផ្តល់នូវដំបូន្មានមួយចំនួនដល់ក្រុមយុវជនរបស់កម្ពុជា យកទៅអនុវត្តន៍ ដើម្បីចូលរួមជ្រោងទង់បក្សឲ្យកាន់តែរឹងមាំ ជាពិសេសឈានទៅដណ្តើមជោគជ័យសម្រាប់ការបោះឆ្នោតនាខែក្រោយនេះផងដែរ។
ដំបូន្មានដែលលោក គន់ គីម បានផ្តល់ជូនយុវជននោះរួមមាន៖
១. ត្រូវយកចំណេះដឹងទៅអនុវត្តឲ្យក្លាយជាសកម្មភាពជាក់ស្តែង ត្រូវស្វែងយល់ពីកម្មវិធីនយោបាយ សេចក្តីសម្រេចចិត្តរបស់គណបក្ស ការរីកចម្រើនរបស់ប្រទេសជាតិ ពីសភាពការណ៍វិវត្តន៍ទាំងក្នុង និងក្រៅប្រទេស។
២. ពេលធ្វើការងារត្រូវចេះទទួលយកមតិយោបល់របស់មន្ត្រីចាស់ៗនៅមូលដ្ឋានព្រោះគាត់មានបទពិសោធជាង។ ជាយុវជន ត្រូវតែសកម្ម និងគោរពវិន័យ ត្រូវតែធ្វើជាគំរូល្អនៅមូលដ្ឋាន រក្សាភាពស្និទ្ធស្នាលជាមួយប្រជាពលរដ្ឋ ទទួលយកសំណូមពរពីពួកគាត់រាយការណ៍ជូនក្រុមកាងារដើម្បីដោះស្រាយបញ្ហាជូនពួកគាត់វិញ។
៣. ត្រូវរួមជាមួយក្រុមការងារគណបក្សនៅមូលដ្ឋាន ចុះទៅតាមខ្នងផ្ទះ ធ្វើការឃោសនាបំផុសឲ្យប្រជាជនជឿលើគណបក្សប្រជាជន និងទៅបោះឆ្នោតជូនគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រមុខ។ ត្រូវវាយបកការឃោសនារបស់ក្រុមប្រឆាំង ដែលលើកឡើងថា «ដេកផ្ទះឈ្នះឯង»។
៤. ក្នុងនាមជាអ្នកសង្កេតការណ៍របស់គណបក្ស ត្រូវមានការយល់ដឹងពីច្បាប់ និងបច្ចេកទេសគូសសន្លឹកឆ្នោត ណែនាំឲ្យប្រជាពលរដ្ឋដែលដល់អាយុបោះឆ្នោតចេះគូសសន្លឹកឆ្នោត ហ៊ានការពារផលប្រយោជន៍របស់គណបក្ស ហ៊ានការពារសន្លឹកឆ្នោតដែលគូសគាំទ្រគណបក្ស ត្រូវហ៊ានទាមទារឲ្យសមាជិកបក្សបានចូលបោះឆ្នោត។
៥. ត្រូវខិតខំពិនិត្យមើលការខុសឆ្គង ឫការរំលោភបំពានរបស់គណបក្សផ្សេង ដើម្បីតវ៉ា និងដាក់ពាក្យបណ្តឹងឲ្យបានទាន់ពេលវេលា និងរាយការណ៍រាល់សកម្មភាពមិនប្រក្រតីមកគណ:ប្រចាំការស្រុក ខេត្ត៕
